ជាតិ
សង្គមជាតិ
ស្ត្រីខ្មែររងគ្រោះនៅចិនម្នាក់ទៀត នឹងមកដល់កម្ពុជានៅថ្ងៃនេះ
×
ស្ថានអគ្គកុងស៊ុលកម្ពុជាប្រចាំទីក្រុងណាននីង ប្រទេសចិន បានអន្តរាគមន៍ជួយសង្គ្រោ ស្ត្រីខ្មែររងគ្រោះ ម្នាក់ទៀត ដែលត្រូវបានមេខ្យល់បោកនាំយកទៅធ្វើការ និងរៀបការជាមួយបុរសជនជាតិចិន នៅប្រទេសចិន។
នារីរងគ្រោះមានឈ្មោះ កែវ វិន មានស្រុកកំណើតនៅស្រុកអង្គបូរី ខេត្ត តាកែវ នឹងត្រូវបញ្ជូនមកដល់ប្រទេសកម្ពុជាវិញ នៅម៉ោង១២និង៤០នាទីថ្ងៃត្រង់ ថ្ងៃទី៦ខែសីហា នេះ នាអាកាសយានដ្ឋានអន្តរជាតិភ្នំពេញ។ នេះជាការបញ្ជាក់របស់ក្រសួងការបរទេស និងសហប្រតិបត្តិការអន្តរជាតិកម្ពុជា។
បច្ចុប្បន្នក្រសួងការបរទេស និងសហប្រតិបត្តិការអន្តរជាតិ ហើយនិងស្ថានឯកអគ្គ-រាជទូត និងស្ថានអគ្គកុងស៊ុលកម្ពុជាប្រចាំនៅប្រទេសចិន បាននិងកំពុងមមាញឹកក្នុងការខិតខំជួយសង្គ្រោះស្ត្រីខ្មែរ ដែលចាញ់បោកមេខ្យល់ទៅរៀបការជាមួយបុរសជនជាតិចិន ឲ្យបានវិលត្រឡប់មកកម្ពុជាវិញ។
ក្រសួងក៏អំពាវនាវដល់ពលរដ្ឋខ្មែរ ជាពិសេសស្ត្រីខ្មែរដែលជាជនងាយរងគ្រោះ ត្រូវបង្កើនការប្រុងប្រយ័ត្នចំពោះការឆបោក ការសន្យាភូតកុហក ឬបញ្ចុះបញ្ចូលពីសំណាក់មេខ្យល់ ដែលមានគំនិតទុច្ចរិត ប៉ុនប៉ងនាំបងប្អូនទៅធ្វើការ ដោយភូតកុហកថានឹងទទួលបានប្រាក់ខែច្រើន ឬនាំទៅ រៀបការជាមួយបុរសជនជាតិចិន នៅប្រទេសចិន ៕
© រក្សាសិទ្ធិដោយ thmeythmey.com