ជាតិ
សង្គមជាតិ
អាដហុក៖ ស្ថានភាពរំលោភសិទ្ធិស្ត្រី និងកុមារកម្ពុជា កាន់តែធ្ងន់ធ្ងរ
×
សមាគមការពារសិទ្ធិមនុស្សអាដហុក បានចេញរបាយការណ៍បីប្រភេទពាក់ព័ន្ធនឹងស្ថានភាពរំលោភសិទ្ធិស្ត្រី និងកុមារ ទូទាំងប្រទេស ក្នុងរយៈពេល៦ខែ ដើមឆ្នាំ២០១៥នេះ។ ស្ថានភាពដែលប៉ះពាល់ដល់សិទ្ធិស្ត្រី និងកុមារ ដ៏ធ្ងន់ធ្ងរនោះគឺ អំពើហិង្សាក្នុងគ្រួសារ មានចំនួន៧៤ករណី អំពើសេពសន្ថវៈ មានចំនួន១៣១ ករណី និងអំពើជួញដូរមនុស្សមានចំនួន៩០ករណី។
យោងតាមរបាយការណ៍អាដហុក អំពើហិង្សាក្នុងគ្រួសារ មានចំនួន ៧៤ករណី។ ទម្រង់នៃអំពើហិង្សាដែលធ្ងន់ធ្ងន់បំផុតនោះ គឺការសម្លាប់ឪពុក សម្លាប់បងប្អូនបង្កើត វាយដំម្តាយបង្កើត។ មូលហេតុនៃការកើតឡើងនូវអំពើហិង្សា គឺបណ្តាលមកពីកត្តាផ្សេងៗ ដូចជា ការប្រើប្រាស់គ្រឿងស្រវឹង ការសេពគ្រឿងញៀន ការលេងល្បែងស៊ីសង និងវិបត្តិផ្លូវចិត្ត ជាដើម។
ចំណែកឯ បទល្មើសសេពសន្ថវៈលើស្ត្រី និងកុមារ មានចំនួន ១៣១ករណី។ ករណីរំលោភនេះរួមមាន រំលោភក្មេងស្រីអាយុក្រោម៥ឆ្នាំ មាន៥ករណី រំលោភក្មេងស្រីអាយុក្រោម១០ឆ្នាំ មាន៣២ករណី រំលោភក្មេងស្រីក្រោមអាយុ១៨ឆ្នាំ មាន៦៣ករណី រំលោភក្មេងស្រីអាយុ១៨ឆ្នាំ មាន៣១ករណី។ ក្នុងចំណោម១៣១ករណីនេះ ការរំលោភសម្លាប់ មានចំនួន៣ករណី ការរំលោភបូក មានចំនួន៦ករណី និងការរំលោភជនពិការ មានចំនួន១៥ករណី។
ការកើតឡើងនូវអំពើសេពសន្ថវៈនេះ បើតាមការរកឃើញរបស់អាដហុក ភាគច្រើនបណ្តាលមកពីការមើលវីដេអូអាសអាភាស តាមរយៈវេបសាយ បណ្តាញសង្គម និងឌីសអាសអាភាស ដែលលក់តាមតូបផ្សេងៗ ។ លើសពីនេះទៅទៀត ការប្រើប្រាស់គ្រឿងស្រវឹង និងការសេពគ្រឿងញៀន ក៏ជាកត្តាដែលបណ្តាលឲ្យមានអំពើចាប់រំលោភដែរ។ នេះបើតាមការកត់សម្គាល់របស់អាដហុកចំពោះអំពើជួញដូរមនុស្ស សមាគមអាដហុក ទទួលបានពាក្យបណ្តឹងចំនួន ៩០ ករណី។ ក្នុងចំណោម៩០ករណីនេះ ការជួញដូរកម្លាំងពលកម្ម មានចំនួន ៧៤ករណី ការជួញដូរតាមរូបភាពរៀបអាពាហ៍ពិពាហ៍ មានចំនួន ១២ករណី និងការជួញដូរភេទ មានចំនួន៤ករណី។ ការជួញដូរមនុស្ស ទៅក្រៅប្រទេស កើតឡើងតាមទ្រង់ទ្រាយផ្សេងៗ ដូចជាតាមរយៈមេខ្យល់ ក្រុមហ៊ុនស្របច្បាប់ និងក្រុមហ៊ុនទិញអាជ្ញាបណ្ណបន្ត ជាដើម។ បទល្មើសជួញដូរមនុស្សនេះ បណ្តាលឲ្យមានជនរងគ្រោះសរុប ចំនួន៤៣៨នាក់ (ស្រី្ត១៥២នាក់)។
កត្តាដែលនាំឲ្យមានការជួញដូរមនុស្ស ដោយសារតែជនរងគ្រោះមិនបានពិចារណាឲ្យបានគ្រប់ជ្រុងជ្រោយ និងឆាប់ជឿតាមការឃោសនារបស់ប្រពន្ធផ្សព្វផ្សាយ និងការបញ្ចុះបញ្ចូលរបស់ក្រុមមេខ្យល់។ ម្យ៉ាងទៀត យោងតាមការការវាយតម្លៃរបស់អាដហុក ភាពក្រីក្រ កង្វះការងារក្នុងស្រុក និងការទទួលបានកម្រៃទាប ក៏ជាហេតុជំរុញឲ្យពលរដ្ឋឆាប់សម្រេចចិត្តក្នុងការចំណាក់ស្រុកដែរ៕
© រក្សាសិទ្ធិដោយ thmeythmey.com