ជាតិ
សង្គមជាតិ
អាដហុករកឃើញករណីរំលោភក្មេងអាយុក្រោម១៨ឆ្នាំ ចំនួន១០០ករណី
× រយៈពេល៦ខែ ដើមឆ្នាំ២០១៥នេះ សមាគមអាដហុក ធ្វើការស៊ើបអង្កេត និងអន្តរាគមន៍បានចំនួន១៣១ករណី ក្នុងនោះមានករណីរំលោភក្មេងអាយុក្រោម១៨ឆ្នាំ ចំនួន១០០ករណី និងក្មេងអាយុ១៨ឆ្នាំមានចំនួន៣១ករណី។ ក្នុងចំណោម១៣១ករណីនេះ មានទាំងករណីរំលោភសម្លាប់ រំលោភបូក និងរំលោភជនពិការផងដែរ។
យោងតាមរបាយការណ៍ស៊ើបអង្កេត និងអន្តរាគមន៍របស់សមាគមអាដហុក នៅក្នុងរយៈពេល៦ខែ ដើមឆ្នាំ២០១៥នេះ មានចំនួន១៣១ករណី ក្នុងនោះមានរំលោភក្មេងអាយុក្រោម៥ឆ្នាំ ចំនួន៥ករណី។ ក្មេងអាយុក្រោម១០ឆ្នាំ ចំនួន៣១ករណី។ ក្មេងក្រោម១៨ឆ្នាំ ៦៣ករណី និងក្មេងអាយុ១៨ឆ្នាំ ចំនួន៣១ករណី។ ក្នុងចំណោម១៣១ករណីនេះ រួមមានករណីរំលោភសម្លាប់ចំនួន៣ករណី រំលោភបូកចំនួន៦ករណី និងរំលោភជនពិការចំនួន១៥ករណី។ ករណីទាំងនេះក៏មានជីតាបង្កើតរំលោភចៅស្រីរហូតដល់មានផ្ទៃពោះ និងឪពុកបង្កើតរំលោភកូនស្រីខ្លួនឯង។ ល។
នៅក្នុងរបាយការណ៍អាដហុកស្តីពី ស្ថានភាពសិទ្ធិស្ត្រី និងកុមារ នៅក្នុងឆមាសទី១ ឆ្នាំ២០១៥នេះ បើធៀបទៅនឹងរយៈពេលដូចគ្នាក្នុងឆ្នាំ២០១៤ មានការកើនឡើងចំនួន៥១ករណី។
របាយការណ៍ដដែលនេះក៏បានបង្ហាញពីមូលហេតុចម្បងចំនួន៣ចំណុច ដែលបណ្តាលឲ្យមានករណីរលោភនេះកើនឡើង គឺទី១/ ការផ្សព្វផ្សាយពាណិជ្ជកម្មស្រាបៀរតាមប្រព័ន្ធផ្សព្វផ្សាយនានា ដែលមាននូវរូបភាពនារីផ្សព្វផ្សាយទាំងនោះមើលទៅមានភាពស្រើបស្រាល ដែលធ្វើឲ្យបុរសមួយចំនួនភ្លើតភ្លើន មានគំនិតចង់រួមភេទ និងវង្វេងស្មារតី ក្រោយពេលពួកគេទទួលទានគ្រឿងស្រវឹងរួច។ ទី២/ ការហូចូលនូវវីដេអូអាសអាភាសតាមប្រព័ន្ធផ្សព្វផ្សាយសង្គម វេបសាយ វីស៊ីឌី ដែលមានលក់នៅតាមទីផ្សារ។ នៅពេលដែលមើលវីដេអូទាំងនេះហើយ ធ្វើឲ្យជនប្រព្រឹត្តចង់សាក់ល្បង និងអនុវត្តជាក់ស្តែង គួបផ្សំនឹងឱកាសស្ងាត់ជាដើម។ និងទី៣/ ការរីករាលដាលនូវក្លឹបកម្សាន្ត និងការប្រើប្រាស់គ្រឿងញៀន ក៏ជាបញ្ហាមួយដែលនាំឲ្យមានការរំលោភសេពសន្ថវៈកើនឡើងផងដែរ។
សូមបញ្ជាក់ថា តួលេខខាងលើនេះ គ្រាន់តែបង្ហាញពីចំនួនដែលសមាគមអាដហុក និងក្រសួងមហាផ្ទៃបានចាត់វិធានការនៅទូទាំងប្រទេសប៉ុណ្ណោះ។ នៅមានករណីសេពសន្ថវៈផ្សេងទៀត ដែលជនរងគ្រោះមិនបានមកប្តឹងដល់អាជ្ញាធរពាក់ព័ន្ធ និងករណីខ្លះទៀតគ្រាន់តែមានការសម្រុះសម្រួល និងការទទួលយកសំណងប៉ុណ្ណោះ៕
© រក្សាសិទ្ធិដោយ thmeythmey.com