អន្តរជាតិ
នយោបាយអន្តរជាតិ
លោក អូបាម៉ា៖ សង្គ្រាមអាចកើតឡើង បើហ៊ានទាត់ចោលកិច្ចព្រមព្រៀងនុយក្លេអ៊ែរអ៊ីរ៉ង់
×
ភាពចម្រូងចម្រាសកើនឡើងខ្លាំង ក្រោយពេលដែលនាយករដ្ឋមន្ត្រីអ៊ីស្រាអែលប្រើប្រាស់ក្រុមជនជាតិជ្វីវនៅអាមេរិកបញ្ចុះបញ្ចូលក្រុមសមាជិកសភាគណបក្សសាធារណរដ្ឋដែលកំពុងកាន់កាប់អាសនៈច្រើននៅសភាអាមេរិកឲ្យទាត់ចោលកិច្ចព្រមព្រៀងអ៊ីរ៉ង់។ ឆ្លើយតបបញ្ហានេះ ប្រធានាធិបតីអាមេរិក បារ៉ាក់ អូបាម៉ា បានព្រមានសមាជិកសភាបក្សសាធារណរដ្ឋ និងអ៊ីស្រាអែលខ្លាំងៗ ដោយអះអាងថាការបោះបង់កិច្ចព្រមព្រៀងអាចនាំឲ្យមានសង្គ្រាមនៅមជ្ឈិមបូព៌ាជាថ្មីនិងបំផ្លាញកិត្តិនាមអាមេរិកនៅលើឆាកអន្តរជាតិផង។
ថ្លែងសុន្ទរកថានៅសាកលវិទ្យាល័យ វ៉ាស៊ីនតោន លោក បារ៉ាក់ អូបាម៉ា បានប្រើប្រាស់ពាក្យសម្តីខ្លាំងៗព្រមានក្រុមសមាជិកសភាជាពិសេសសមាជិកបក្សសាធារណរដ្ឋដែលកំពុងរៀបចំផែនការទាត់ចោលកិច្ចព្រមព្រៀងនុយក្លេអ៊ែរអ៊ីរ៉ង់ តម្រូវចិត្តក្រុមជនជាតិជី្វវនៅអាមេរិក និងរដ្ឋាភិបាលក្រុងជេរ៉ូសាឡិម។ លោកបានសង្កត់ធ្ងន់ថា បើបោះបង់ចោលកិច្ចព្រមព្រៀងនេះ ជម្រើសចុងក្រោយគឺមានតែធ្វើសង្គ្រាមប៉ុណ្ណោះ។
យោងតាមទីភ្នាក់ងារព័ត៌មាន AFP ពាក្យថាសង្គ្រាមនោះ សម្តៅលើសង្គ្រាមដែលរដ្ឋបាលអាមេរិកក្រោយៗទៀតបន្ទាប់ពីរដ្ឋបាលលោកអូបាម៉ា ប្រើប្រាស់ដើម្បីកម្ទេចកម្មវិធីនុយក្លេអ៊ែរអ៊ីរ៉ង់ ប្រសិនបើកិច្ចព្រមព្រៀងលើកនេះមិនត្រូវសមាជិកសភាទទួលយកទេ។ លោក អូបាម៉ា ក៏លើកយកសង្គ្រាមអាមេរិកនៅអ៊ីរ៉ាក់កាលពីឆ្នាំ២០០៣ដើម្បីកម្ទេចកម្មវិធីនុយក្លេអ៊ែររបស់មេដឹកនាំផ្តាច់ការសាដាម ហ៊ូសេនជាសម្អាងដែរ។
សូមបញ្ជាក់បន្តិចថា កិច្ចព្រមព្រៀងអ៊ីរ៉ង់ជាមួយមហាអំណាចប្រាំមួយរួមទាំងអាមេរិកផងសម្រេចបានកាលពីខែមុននេះ ត្រូវបានសហគមន៍អន្តរជាតិសាទរ និងជំរុញឲ្យអ៊ីរ៉ង់កាត់បន្ថយការចម្រាញ់សារធាតុគីមីដើម្បីឈានទៅផលិតអាវុធនុយក្លេអ៊ែរជាថ្នូនឹងការដកទណ្ឌកម្មនិងការហ៊ុំព័ទ្ធសេដ្ឋកិច្ច។
ការប្រើប្រាស់ពាក្យសម្តីធ្ងន់ៗនេះ ទំនងមកពីលោក អូបាម៉ា មិនអាចទ្រាំបានចំពោះសកម្មភាពរដ្ឋាភិបាលលោក បេនចាម៊ិន ណេតាន់យ៉ាហ៊ូ (Benjamin Netanyahu) ថ្មីៗនេះបានប្រើប្រាស់ជនជាតិជ្វីវរស់នៅអាមេរិកឲ្យចេញប្រតិបត្តិការបញ្ចុះបញ្ចូលសមាជិកសភាអាមេរិកឲ្យបោះបង់ចោលកិច្ចព្រមព្រៀងនេះ។ ពេលថ្លែងសុន្ទកថា លោក អូបាម៉ា ក៏បានវាយប្រហារនាយករដ្ឋមន្ត្រីអ៊ីស្រាអែលដែលព្យាយាមរារាំងកិច្ចព្រមព្រៀងនុយក្លេអ៊ែរអ៊ីរ៉ង់។ លោកលើកឡើងថាលោកយល់ថា លោកណេតាន់យ៉ាហ៊ូ មិនពេញចិត្តកិច្ចព្រមព្រៀងនេះទេ ប៉ុន្តែវាជារឿងខុសឆ្គងដ៏ធំមួយ ព្រោះពិភពលោកទាំងមូលសុទ្ធតែគាំទ្រកិច្ចព្រមព្រៀងនេះ។ លោកបានបន្តទៀតថា អ្នកដែលប្រឆាំងកិច្ចព្រមព្រៀងអ៊ីរ៉ង់បច្ចុប្បន្ន ជាមនុស្សតែមួយដែលបានគាំទ្រឲ្យមានសង្គ្រាមនៅអ៊ីរ៉ាក់កាលពីឆ្នាំ២០០៣ ។
ផ្អែកលើកប្រតិកម្មរបស់លោក អូបាម៉ា គេវាយតម្លៃថា ទោះត្រូវប្រឈមបញ្ហាអ្វីក៏ដោយ លោក ត្រូវធានាឲ្យកិច្ចព្រមព្រៀងអ៊ីរ៉ង់ត្រូវសភាផ្តល់សច្ចាប័ននិងត្រូវអនុវត្តមុនពេលលោកចប់អាណត្តិលោកឆ្នាំក្រោយ ព្រោះលោកបារម្ភពីលទ្ធផលចុងក្រោយនិងការអាប់មុខអាប់មាត់របស់មហាអំណាចអាមេរិកនៅលើឆាកអន្តរជាតិនាពេលខាងមុខ។ លោក បារ៉ាក់ អូបាម៉ា បានលើកឡើងជាថ្មីម្តងទៀតថា កិច្ចព្រមព្រៀងដែលមហាអំណាច៦សម្រេចបានជាមួយរដ្ឋាភិបាលក្រុងតេអ៊ីរ៉ង់កន្លងមកជាកិច្ចព្រមព្រៀងដ៏ល្អមួយ ហើយវាក៏អាចទប់ស្កាត់មិនឲ្យអ៊ីរ៉ង់ផលិតអាវុធនុយក្លេអ៊ែរដែរ ហើយវាជារឿងលំបាកបំផុតទម្រាំសម្រេចបានកិច្ចព្រមព្រៀងមួយនេះ។ វាប្រាកដណាស់ថា អាមេរិកនឹងក្លាយជាមហាអំណាចឯកោ បាត់បង់កិត្តិនាមនៅលើឆាកអន្តរជាតិ ដោយសារតែបោះបង់កិច្ចព្រមព្រៀងនុយក្លេអ៊ែរនេះ ព្រោះមហាអំណាចប្រាំផ្សេងទៀតនឹងដើរផ្លូវផ្សេងពីអាមេរិកដោយបន្តទទួលយកកិច្ចព្រមព្រៀង។ អាមេរិក មិនអាចគូសនឹងដៃ ហើយក្រោយមកលុបនឹងជើងឡើយ។ បើសិន លោក ព្រមចុះហត្ថលេខាលើកិច្ចព្រមព្រៀងនេះហើយ វាក៏ត្រូវតែត្រូវសភាផ្តល់សច្ចាប័នដូចគ្នាដែរ៕
Tag:
សភាអាមេរិក
នុយក្លេអ៊ែរអ៊ីរ៉ង់
© រក្សាសិទ្ធិដោយ thmeythmey.com