ជាតិ
សង្គមជាតិ
×![]()
សមាគមអាដហុក បានរកឃើញពីល្បិចមេខ្យល់ជួញដូរស្រី្តខ្មែរឲ្យទៅរៀបអាពាហ៍ពិពាហ៍ជាមួយបុរសជនជាតិចិន ជាច្រើនករណី។ ក្រុមមេខ្យល់ទាំងនោះ បានរៀបចំជាពីរដំណាក់កាល ទី១ ក្រុមមេខ្យល់ចងក្រងជាបណ្តាញ ដោយមួយក្រុមនៅក្នុងប្រទេស និងមួយក្រុមទៀតនៅក្រៅប្រទេស។ ដំណាក់កាលទី២ ក្រុមមេខ្យល់បានរៀបចំល្បិចបញ្ជូនស្រី្តរងគ្រោះឆ្លងប្រទេស។
នៅក្នុងឆមាសទី១ នៃរបាយការណ៍អាដហុកស្តីពី«ស្ថានភាពសិទ្ធិស្ត្រីនិងកុមារ» បានរកឃើញពីរបៀបនៃការជួញដូរស្ត្រីខ្មែរឲ្យទៅរៀបការជាមួយបុរសចិន មានពីរដំណាក់កាល។ ដំណាក់កាលទី១ មេខ្យល់បានចងក្រងគ្នាជាបណ្តាញដោយមួយក្រុមនៅក្នុងប្រទេសកម្ពុជា និងមួយក្រុមទៀតនៅប្រទេសចិន ក្រុមទាំងពីរនេះមានទំនាក់ទំនងគ្នាយ៉ាងជិតស្និតជាមួយឪពុកម្តាយ និងជនរងគ្រោះផ្ទាល់។
ក្រុមនៅក្នុងប្រទេស មេខ្យល់មានគ្នាច្រើនត្រូវដើរតាមភូមិ ឃុំ និងរោងចក្រកាត់ដេរ ដើម្បីធ្វើការទាក់ទាញយកនារី ដោយធ្វើសកម្មភាពបង្អូតពីកូនឬសាច់ញាតិរបស់ខ្លួន ដែលមានប្តីជាជនជាតិចិន កំពុងរស់នៅប្រទេសចិនថា មានជីវភាពធូធា និងបង្ហាញពីទ្រព្យសម្បិត្តិរបស់នារីមានប្តីចិននោះ ថាមានទ្រព្យសម្បត្តិស្តុកស្តម្ភ។ ពេលខ្លះមេខ្យល់ទាំងនោះអះអាងថា រកការងារធ្វើនៅប្រទេសផ្សេងៗដោយទទួលបានប្រាក់ខែច្រើន និងមានសុវត្ថិភាព។ នេះបើតាមរបាយការណ៍ស្ត្រីពីស្ថានភាពសិទ្ធិស្ត្រីនិងកុមារ របស់សមាគមអាដហុកបានចុះផ្សាយកាលពីថ្ងៃទី៥ សីហាកន្លងទៅ។
របាយការណ៍ដដែលបានសរសេរទៀតថា បន្ទាប់មកមេខ្យល់ទាំងនោះ បានបញ្ជូនការងារបន្តទៅឲ្យក្រុមមេខ្យល់នៅប្រទេសចិន ដើម្បីផលិតឯកសារ ដូចជា លិខិតឆ្លងដែន ទិដ្ឋាការ និងឯកសារអត្តសញ្ញាណប័ណ្ណ ដែលភាគច្រើនធ្វើដោយក្លែងបន្លំឈ្មោះ អាយុ និងអាសយដ្ឋានរបស់ជនរងគ្រោះ។ ខាងលើនេះជាដំណាក់កាលទី១ ដែលក្រុមមេខ្យល់ទាំងនោះធ្លាប់អនុវត្តន៍កន្លងមក។
ចំពោះដំណាក់កាលទី២វិញ គឺការបញ្ជូនឆ្លងប្រទេស។ ករណីខ្លះត្រូវជិះយន្តហោះតាមច្រកអន្តរជាតិភ្នំពេញ និងករណីខ្លះទៀត ត្រូវបានមេខ្យល់ជាជនជាតិខ្មែរ ចិន និងវៀតណាម នាំចេញតាមចក្រព្រំដែនបាវិត ឬច្រកប្រទេសឡាវ។
នៅពេលទៅដល់ប្រទេសចិន ក្រុមមេខ្យល់ភាគច្រើនដែលជាអតីតស្ត្រីខ្មែររងគ្រោះដោយសារការជួញដូរទៅលក់ឲ្យមានប្តីជាជនជាតិចិន ជាអ្នកទទួលយកនារីជនរងគ្រោះទាំងនោះ។ ហើយក្រុមមេខ្យល់ទាំងនោះ នាំទៅរកកន្លែងស្នាក់នៅក្នុងរយៈពេលខ្លីឬវែង ដោយរងចាំបុរសចិន មកទិញធ្វើជាប្រពន្ធក្នុងតម្លៃចន្លោះពី៨-១២ម៉ឺនយ័ន។ ស្ត្រីខ្លះរៀបការដោយការចុះសំបុត្រអាពាហ៍ពិពាហ៍ និងខ្លះទៀតមិនបានចុះសំបុត្រនេះឡើយ។ ការចុះសំបុត្រនេះត្រូវឆ្លងកាត់ស្ថានទូតឬស្ថានកុងស៊ុលខ្មែរប្រចាំនៅប្រទេសចិន។
របាយការណ៍ដដែលក៏បានរកឃើញករណីខ្លះទៀតដែរថា នារីរងគ្រោះប្រកែកមិនព្រមទទួលយកបុរសជនជាតិចិនឡើយ ព្រោះខុសពាក្យសន្យថា ទៅរកការងារធ្វើ មិនមែនទៅរៀបការនោះទេ។ នៅពេលដែលនារីរងគ្រោះទាំងនោះសុំវិលត្រឡប់មកផ្ទះវិញ បែរជាមេខ្យល់គំរាមឲ្យប្រគល់ប្រាក់ចន្លោះពី៨ពាន់ទៅ២០ម៉ឺនដុល្លារ ជាថ្នូនឹងការចំណាយរបស់គេ។
សូមបញ្ជាក់ថា នៅក្នុងឆមាសទី១ ឆ្នាំ២០១៥នេះ សមាគមអាដហុកទទួលបានពាក្យបណ្តឹងពីនារីរងគ្រោះចំនួន១២ករណី បើធៀបទៅនឹងឆ្នាំ២០១៤ មានការថយចុះចំនួន១៤ករណី ដោយសារជនរងគ្រោះទៅប្តឹងផ្ទាស់នៅក្រសួងការបរទេស និងនៅអង្គការដៃគូផ្សេងៗទៀត។ កាលពីឆមាសទី១ ឆ្នាំ២០១៤កន្លងទៅ អាដហុកទទួលបានពាក្យបណ្តឹកនេះចំនួន២៦ករណី៕
Tag:
អាដហុក
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
1 នាទី
