ជាតិ
សង្គមជាតិ
×![]()
ដោយ: ធឿន បញ្ញាឬទិ្ធ
បណ្ដាញសហគមន៍ព្រៃឡង់ចំនួន៤ នឹងបើកយុទ្ធនាការទប់ស្កាត់បទល្មើសទ្រង់ទ្រាយធំជុំវិញតំបន់ព្រៃឡង់រយៈពេល៥ថ្ងៃ ដើម្បីប្រមូលនូវភស្ដុតាងនានាទាក់ទងនឹងកាប់បំផ្លាញព្រៃឈើដាក់ជូនរដ្ឋាភិបាលឲ្យចាត់វិធានការជាបន្ទាន់ ក្នុងការការពារព្រៃឡង់។ បណ្ដាញសហគមន៍ទាំង៤នោះរួមមាន ខេត្តកំពង់ធំ ព្រះវិហារ ស្ទឹងត្រែង និងក្រចេះ មានគ្នាប្រមាណ៣០០នាក់ នឹងទៅតំបន់ស្នូលព្រៃឡង់ ចាប់ពីថ្ងៃទី១០ ដល់ថ្ងៃទី១៤ សីហា។
សេចក្ដីប្រកាសព័ត៌មានបណ្ដាញរបស់សហគមន៍ទាំងនេះបានឲ្យដឹងថា រយៈពេល១០ឆ្នាំចុងក្រោយនេះ ព្រៃឡង់កំពុងរងនូវការកាប់បំផ្លាញធ្ងន់ធ្ងរ និងការគំរាមកំហែង ពីគម្រោងអភិវឌ្ឍន៍ដីសម្បទានសេដ្ឋកិច្ច សម្បទានរ៉ែ ប្រជាពលរដ្ឋចំណូលស្រុករានដីធ្វើកម្មសិទ្ធិ ការកាប់ឈើដោយគ្មានច្បាប់យ៉ាងអនាធិបតេយ្យ និងគ្មានការគ្រប់គ្រងច្បាស់លាស់។ សហគមន៍ព្រៃឡង់ទាំង៤នោះ បានបញ្ជាក់យ៉ាងដូច្នេះថា៖«រហូតមកដល់ពេលបច្ចុប្បន្ននេះ ឈើរាប់ពាន់ឡានកុងទីន័រ និងរថយន្តកែច្នៃត្រូវបានដឹកចេញពីព្រៃឡង់ ដើមជ័រច្បោះរបស់សហគមន៍រាប់សិបម៉ឺនដើមត្រូវបានកាប់បំផ្លាញ សត្វព្រៃជាច្រើនរាប់ពាន់ក្បាលត្រូវបានចាប់ និងសម្លាប់ធ្វើអាជីវកម្ម»។
កន្លងមកក្រសួងកសិកម្ម បានអំពាវនាវដល់មន្ត្រីរដ្ឋាភិបាលគ្រប់លំដាប់ថ្នាក់ ទប់ស្កាត់ការនាំចេញ នាំចូល និងដកហូតម៉ាស៊ីនត្រង់តឺន័រទូទាំងប្រទេស រួមទាំងការខិតខំប្រឹងប្រែងរបស់មន្ត្រីជំនាញ និងអាជ្ញាធរដែនដីមួយចំនួនក្នុងការការពារ ទប់ស្កាត់បទល្មើសព្រៃឈើ។ ជាពិសេសប្រមុខរដ្ឋាភិបាល ក៏បានដាក់ចេញវិធានការយ៉ាងតឹងរ៉ឹង និងវិធានការដកមន្ត្រីរដ្ឋាភិបាលទាំងឡាយណា ដែលពាក់ព័ន្ធនិងការកាប់បំផ្លាញព្រៃឈើ តែសកម្មភាពកាប់បំផ្លាញព្រៃឈើនៅតំបន់ព្រៃឡង់មិនទាន់មានភាពថមថយនោះឡើយ។
បណ្ដាញសហគមន៍ព្រៃឡង់ទាំង៤នោះ ព្រួយបារម្ភពីការបាត់បង់ជីវៈចម្រុះ សត្វព្រៃ ដើមជ័រច្បោះ និងអនុផលព្រៃឈើនានាដែលសហគមន៍បានអាស្រ័យផលនៅក្នុងព្រៃឡង់ នឹងអាចធ្វើឲ្យប៉ះពាល់ដល់មុខរបរ និងជីវភាពនៅពេលខាងមុខ បើមិនមានចំណាត់ការទាន់ពេលនោះទេ។ព្រៃឡង់គឺជាព្រៃដ៏ធំសេសសល់ចុងក្រោយគេនៅកម្ពុជា ដែលមានសារៈសំខាន់ដល់ប្រជាជនជាតិភាគតិច៕
Tag:
ព្រៃឡង់
បទល្មើសព្រៃឈើ
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
3 ម៉ោង
