សង្គមជាតិ
អន្តរជាតិ
×![]()
ដោយ: ថ្មីៗ
វៀតណាមក្លាយជាគោលដៅចុងក្រោយនៃដំណើរទស្សនកិច្ចរបស់ប្រមុខការទូតអាមេរិក ចនឃឺរី។ លោក ឃឺរី បានថ្លែងសរសើរការវិវត្តន៍នៃចំណងការទូត និងកិច្ចសហប្រតិបត្តិការរវាងអតីតសត្រូវចាស់ទាំងពីរ ហើយលោកបង្ហាញក្តីសង្ឃឹមថានៅពេលខាងមុខវៀតណាមនឹងក្លាយជាដៃគូដ៏ជិតស្និទ្ធនិងយូរអង្វែងមួយក្នុងតំបន់។ យ៉ាងណាក៏ដោយលោក ឃឺរី បានឆ្លៀតព្រមានវៀតណាមឲ្យដោះស្រាយបញ្ហាសិទ្ធិមនុស្សនៅក្នុងប្រទេសឲ្យបានល្អប្រសើរផង។ 
អតីតនាយទាហានអាមេរិកច្បាំងក្នុងសង្គ្រាមវៀតណាមនិងជារដ្ឋមន្ត្រីការបរទេសអាមេរិក លោក ចន ឃឺរី កំពុងស្ថិតនៅក្នុងប្រទេសវៀតណាមដែលជាគោលដៅចុងក្រោយនៃដំណើរទស្សនកិច្ចរបស់លោកមកកាន់តំបន់អាស៊ី។ តាមពិតទៅលោកមកទស្សនកិច្ចនៅវៀតណាមក៏ដើម្បីចូលរួមកម្មវិធីរំលឹកខួបលើកទី២០នៃការស្តារចំណងការទូតប្រទេសទាំងពីរអាមេរិកនិងវៀតណាមផងដែរ។
ទៅដល់ភ្លាម ប្រមុខការទូតអាមេរិក ចន ឃឺរី បានចាប់ដៃប្រធានាធិបតីវៀតណាមលោក Truong Tan Sang មុខរូបសំណាកបិតាឯករាជ្យវៀតណាម ហូ ជីមិញ មុនចាប់ផ្តើមការពិភាក្សា ផ្តោតលើការលូតលាស់នៃទំនាក់ទំនងទ្វេភាគីប្រទេសទាំងពីររយៈពេលប៉ុន្មានឆ្នាំចុងក្រោយ។ ភាគីទាំងពីរប្តេជ្ញាថានឹងបន្តប្រឹងប្រែងលើកកម្ពស់កិច្ចសហប្រតិបត្តិការទ្វេភាគីឲ្យកាន់តែល្អប្រសើរ ហើយលោក ឃឺរី សង្ឃឹមថាវៀតណានឹងក្លាយជាដៃគូជិតស្និទ្ធនិងយូរអង្វែងរបស់អាមេរិកផង។ លោក ឃឺរី បង្ហាញក្តីរំភើប ព្រោះវៀតណាមនិងអាមេរិកអាចប្រែក្លាយខ្លួនពីសត្រូវមកជាមិត្តជិតស្និទ្ធដែលអាចធ្វើការជាមួយគ្នាបានយ៉ាងល្អប្រសើរ។
ក្រៅពីជួបជាមួយប្រធានាធិបតីវៀតណាម លោក ឃឺរី ក៏បានជួបសំណេះសំណាលទ្វេភាគីជាមួយសមភាគីលោក រដ្ឋមន្ត្រីការបរទេសវៀតណាម Pham Binh Minh ផងដែរ។ ក្នុងជំនួបភាគីទាំងពីរ បញ្ហា សន្តិសុខ សេដ្ឋកិច្ច និង បញ្ហាសិទ្ធិមនុស្ស ជាពិសេសសិទ្ធិការងារក្លាយជាប្រធានបទដែលតំណាងក្រុងវ៉ាស៊ីនតោនយកមកពិភាក្សាជាមួយប្រមុខការទូតវៀតណាម។ ជុំវិញចំណងពាណិជ្ជកម្មទ្វេភាគី យោងតាមទីភ្នាក់ងារព័ត៌មាន AFP ទំហំពាណិជ្ជកម្មកើនឡើងយ៉ាងរហ័សពី ៤៥០លានដុល្លារអាមេរិកក្នុងឆ្នាំ ១៩៩៥ ទៅដល់៣៦ពាន់លានដុល្លារអាមេរិកនាពេលបច្ចុប្បន្ន។ ភាគីទាំងពីរក៏កំពុងស្វះស្វែងចរចាគ្នាបន្ថែមជាមួយបណ្តារដ្ឋអាស៊ីប៉ាស៊ីហ្វិកមួយចំនួនផងដែរដើម្បីសម្រេចឲ្យបាននូវកិច្ចព្រមព្រៀងពាណិជ្ជកម្មភាពជាដៃគូអន្តរប៉ាស៊ីហ្វិកដឹកនាំដោយអាមេរិកផ្ទាល់ផងដែរ។
ចំណែកបើក្រឡេកមើលបញ្ហាសិទ្ធិមនុស្សឯណោះវិញ អាចនិយាយបានថាជារឿងសាមញ្ញទៅហើយដែលរដ្ឋមន្ត្រីការបរទេសអាមេរិកត្រូវឆ្លៀតលើកឡើងក្នុងពេលជួបជាមួយមន្ត្រីវៀតណាម។ស្ថានភាពសិទ្ធិមនុស្សនៅវៀតណាមអាក្រក់ខ្លាំង បើប្រៀបធៀបបណ្តារដ្ឋឯទៀតក្នុងតំបន់ ហើយវៀតណាមក៏ស្ថិតក្នុងចំណោមដែលមានកម្រិតនៃការគោរពសិទ្ធិមនុស្សទាបដែរក្នុងរបាយការណ៍សិទ្ធិមនុស្សអាមេរិកប្រចាំឆ្នាំ។ ចង់មិនចង់អាមេរិកក្នុងនាមជាមហាអំណាចប្រជាធិបតេយ្យផង ត្រូវដាស់តឿនវៀតណាមឲ្យប្រឹងប្រែងលើកកម្ពស់ការគោរពសិទ្ធិមនុស្សនៅក្នុងប្រទេសឲ្យបានប្រសើរ។
បើនិយាយពីប្រធានបទបញ្ហាសន្តិសុខវិញ គ្មានអ្វីក្រៅពីជម្លោះសមុទ្រចិនខាងត្បូងឡើយ។ អាមេរិកគឺជាខ្នងបង្អែកសំខាន់សម្រាប់វៀតណាមក្នុងការតតាំងជាមួយមហាយក្សចិនក្នុងជម្លោះសមុទ្រចិនខាងត្បូង ហើយអាមេរិកក៏ត្រូវការវៀតណាមដូចគ្នាដែរដើម្បីរាំងខ្ទប់ឥទិ្ធពលចិននៅអាស៊ីអាគ្នេយ៍។ កន្លងមកវៀតណាមបានទទួលជំនួយច្រើនពីរដ្ឋបាលក្រុងវ៉ាស៊ីនតោនដើម្បីពង្រឹងសមត្ថភាពយោធារបស់ខ្លួន ហើយសមាជិកសភាអាមេរិកមួយចំនួនចង់ឲ្យអាមេរិកដកការហាមឃាត់ការលក់អាវុធឲ្យវៀតណាមទាំងស្រុងផងដែរ។ កាលពីខែមករា រដ្ឋមន្ត្រីការពារជាតិអាមេរិកលោក Ashton Carter បានប្រកាសផ្តល់ជំនួយ១៨លានដុល្លារអាមេរិកដើម្បីជួយវៀតណាមទិញនាវាល្បាតសម្រាប់ពង្រឹងសន្តិសុខជើងទឹកផង។
វៀតណាមនិងអាមេរិកស្តារចំណងការទូតកាលពីឆ្នាំ ១៩៩៥ ដោយសុខចិត្តទុករឿងប្រវត្តិសាស្ត្រដ៏ចូរចត់សម័យសង្គ្រាមត្រជាក់មួយឡែកសិន។ ពីមួយឆ្នាំទៅមួយឆ្នាំទំនាក់ទំនងប្រទេសទាំងពីរចេះតែរីកចម្រើនទៅមុខ ថ្វីបើវៀតណាមប្រកាន់របបសង្គមនិយមក្តី។ គេមើលឃើញ ទំនាក់ទំនងពាណិជ្ជកម្មរីកលូតលាស់រហ័សខ្លាំងជាគេ ហើយថ្មីៗនេះទំនាក់ទំនងនយោបាយក៏កាន់តែល្អឡើងទៀត។ រឿងជាក់ស្តែង កាលពីខែមុន ប្រធានបក្សកុម្មុយនីស្ត Nguyen Phu Trong ធ្វើទស្សនកិច្ចទៅកាន់សហរដ្ឋអាមេរិកដោយជួបជជែកពិភាក្សាជាមួយប្រធានាធិបតីអាមេរិកលោក បារ៉ាក់ អូបាម៉ាផងដែរ។ នេះជារូបភាពមួយបង្ហាញច្បាស់ពីកម្រិតចំណងទំនាក់ទំនងពិសេសរវាងក្រុងវ៉ាស៊ីនតោននិងក្រុងហាណូយ ពេលបច្ចុប្បន្ននេះ៕
Tag:
វៀតណាម
លោក ចនឃឺរី
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
3 ម៉ោង
