ជាតិ
សង្គមជាតិ
ប្រធានតុលាការស្វាយរៀងចាត់តំណាងអយ្យការត្រៀមទទួលលោក ឈូក បណ្ឌិត
× ប្រធានតុលាការខេត្តស្វាយរៀង លោក ពេជ្រ ឈឿត អះអាងថា លោក ឈូក បណ្ឌិត ត្រូវបានបញ្ជូនទៅតុលាការខេត្តស្វាយរៀង បន្ទាប់ពីទណ្ឌិតមួយនេះ ចូលខ្លួនសារភាព។ យ៉ាងណា លោកប្រធានតុលាការខេត្តស្វាយរៀង មិនបានបញ្ជាក់លម្អិតពីប្រភពដែលត្រូវបានបញ្ជូនទៅខាងលោកនោះទេ។
បើទោះជាមិនបានរៀបរាប់លម្អិតពីដំណើរការ ការបញ្ជូនលោក ឈូក បណ្ឌិត ទៅតុលាការខេត្តស្វាយរៀងយ៉ាងណាក្តី ប៉ុន្តែប្រធានតុលាការខេត្ត លោក ពេជ្រ ឈឿត អះអាងថា លោកបានចាត់តាំងតំណាងអយ្យការ ដើម្បីត្រៀមទទួលរួចរាល់ហើយ។ បញ្ជូនដល់ពេលណា និងអ្នកណាជាអ្នកបញ្ជូនទៅនោះ គឺលោក ពេជ្រ ឈឿត មិនបានបញ្ជាក់នោះទេ។
ក្នុងបទសម្ភាសន៍ខ្លីតាមទូរសព្ទនឹងសារព័ត៌មានថ្មីៗ ប្រធានតុលាការខេត្តស្វាយរៀង ក៏មិនបញ្ជាក់ពីការអនុវត្តសាលដីកាឃុំខ្លួនលោក ឈូក បណ្ឌិត នៅពេលណានោះដែរ។
គួរបញ្ជាក់ថា តាមប្រភពព័ត៌មាននានាបានចុះផ្សាយថា កាលពីព្រឹកថ្ងៃទី៨ សីហានេះ លោក ឈូក បណ្ឌិត ដែលជាប់ចោទពីបទបាញ់កម្មការិនី២នាក់នៅក្រុងបាវិត បានចូលខ្លួនមកសារភាពនៅស្នងការដ្ឋាននគរបាលក្រុងភ្នំពេញ ហើយក៏ត្រូវបានបញ្ជូនបន្តទៅតុលាការខេត្តស្វាយរៀងនៅរសៀលនេះ។ ការចូលខ្លួនមកសារភាពរបស់លោក ឈូក បណ្ឌិត ធ្វើឡើងក្រោយប្រសាសន៍របស់លោកនាយករដ្ឋមន្ត្រី ហ៊ុន សែន កន្លងទៅថ្មីៗនេះ និងការប្រកាសឲ្យតាមចាប់ខ្លួន ពីសំណាក់រដ្ឋមន្ត្រីក្រសួងមហាផ្ទៃ លោក ស ខេង៕
© រក្សាសិទ្ធិដោយ thmeythmey.com