ជាតិ
សង្គមជាតិ
បិទផ្លូវមួយចំនួននៅតំបន់អង្គរដើម្បីរៀបចំទិវារត់ប្រណាំងម៉ារ៉ាតុងចក្រភពអង្គរ
×
សៀមរាប៖ ផ្លូវមួយចំនួនក្នុងរមណីយដ្ឋានឧទ្យានអង្គរ នឹងត្រូវបិទជាបណ្តោះអាសន្ន ខណៈដែលផ្លូវទាំងនោះ នឹងត្រូវប្រើប្រាស់សម្រាប់ទិវារត់ប្រណាំងម៉ារ៉ាតុងចក្រភពអង្គរ។ នេះបើយោងតាមសេចក្តីប្រកាសព័ត៌មានរបស់អាជ្ញាធរអប្សរា។
អាជ្ញាធរអប្សរា ក្នុងសេចក្តីប្រកាសព័ត៌មានរបស់ខ្លួនបានពន្យល់ថា ផ្លូវមួយផ្នែកក្នុងតំបន់អង្គរ នឹងផ្អាកចរាចរណ៍ជាបណ្តោះអាសន្ន ដើម្បីរៀបចំទិវារត់ប្រណាំងម៉ារ៉ាតុងចក្រភពអង្គរ ដែលនឹងប្រព្រឹត្តិទៅនៅថ្ងៃអាទិត្យស្អែក។ ការរត់ប្រណាំងនេះ នឹងផ្តល់ផលប្រយោជន៍សម្រាប់កម្ពុជា ដូចជាអភិវឌ្ឍន៍វិស័យទេសចរណ៍ និងកីឡាជាដើម។
«ដោយការរត់ប្រណាំងត្រូវធ្វើដំណើរឆ្លងកាត់ផ្លូវនានាក្នុងរមណីយដ្ឋានអង្គរនោះ សមត្ថកិច្ចជំនាញ នឹងធ្វើការបិទផ្លូវដើម្បីសម្រួលចរាចរតាមគោលដៅខ្លះៗ ដែលអាចបង្កឲ្យកកស្ទះជាអន្លើ»។ នេះជាខ្លឹមសារបញ្ជាក់បន្ថែមរបស់អាជ្ញាធរអប្សរា មិននឹងស្នើសុំការយោគយល់ពីសាធារណជន ក៏ដូចជាភ្ញៀវទេសចរជាតិ និងអន្តរជាតិ។
ទាក់ទងនឹងចំនួនអ្នកចូលរួមរត់ប្រណាំង សារព័ត៌មានថ្មីៗមិនទាន់អាចទំនាក់ទំនងជាមួយអគ្គលេខាធិការ គណៈកម្មាធិការជាតិអូឡាំពិក លោក វ៉ាត់ ចំរើន បាននៅឡើយទេ។
គួរបញ្ជាក់ថា ការរត់ប្រណាំងម៉ារ៉ាតុងចក្រភពអង្គរ នឹងចាប់ផ្តើមពីម៉ោង ៤និង៣០នាទីព្រឹក ថ្ងៃទី៩ សីហា តទៅ នៅមុខប្រាសាទអង្គរវត្ត។ ការរត់ប្រណាំងមានចម្ងាយ ៤២គ.ម ២១គ.ម ១០គ.ម និង៣គ.ម៕
© រក្សាសិទ្ធិដោយ thmeythmey.com