កីឡាជាតិ
Asia Champions Trophy៖ យុវជនភ្នំពេញក្រោនទទួលក្រុមខ្លាំង Frenz United លោក ប៊ួយ ដារី គ្រូបង្វឹកឈុតយុវជនភ្នំពេញក្រោន
×
ក្រុមយុវជនអាយុក្រោម១៨ឆ្នាំ របស់ភ្នំពេញក្រោន ត្រូវទទួលភ្ញៀវម៉ាឡេស៊ី Frenz United ក្នុងកម្មវិធីប្រកួតពានរង្វាន់ Asia Champions Trophy 2015 (ACT)នាវេលាម៉ោង៦ល្ងាចថ្ងៃសុក្រ ទី១៤ ខែសីហា ឆ្នាំ២០១៥ នៅកីឡដ្ឋាន RSN។ នេះជាការប្រកួតលើកទីពីររបស់យុវជនភ្នំពេញក្រោន បន្ទាប់ពីពួកគេបានចាញ់ក្រុមជប៉ុន Kashima Antlers ៥-០ នៅក្នុងទីកដីជប៉ុន កាលពីថ្ងៃទី៥ ខែសីហា។
Frenz United ដែលជាគូប្រជែងរបស់ភ្នំពេញ គឺក្លិបដ៏ខ្លាំងមួយក្នុងកម្មវិធីប្រកួត Asia Champions Trophy ដែលបានឈានដល់ឆ្នាំទី៣ ។ កាលពីរដូវកាលដំបូងនាឆ្នាំ២០១៣ ក្លឹបម៉ាឡេស៊ីមួយនេះបានចាញ់ Chonburiរបស់ថៃ ក្នុងលទ្ធផល ៤-១ ទាំងពីរជើង ប៉ុន្តែពួកគេបានដណ្តើមយកចំណាត់ថ្នាក់លេខ៣ វិញកាលពីរដូវកាលមុន។
កាលពីឆ្នាំ២០១៤ កន្លងទៅ យុវជនភ្នំពេញក្រោន បានចាញ់ Frenz United ក្នុងលទ្ធផល ៣-២ នៅកីឡដ្ឋាន Janda Baik និងបន្តចាញ់ ២-១ នៅពហុកីឡដ្ឋានជាតិអូឡាំពិក។ សម្រាប់ឆ្នាំនេះ Frenz United មានក្រុមយុវជន ២ ក្រុមដើម្បីចូលរួមប្រកួតក្នុងកម្មវិធី ACT ហើយយុវជនភ្នំពេញក្រោន ត្រូវជួបជាមួយក្រុម B របស់ក្លឹប Frenz ដែលមានសុទ្ធតែកីឡាករវ័យក្មេង និងមានសញ្ជាតិម៉ាឡេស៊ីទាំងអស់តែម្តង ហើយក្រុមយុវជនភ្នំពេញក្រោនក៏ធ្លាប់ប្រកួតជាមួយពួកគេដែរកាលពីឆ្នាំ២០១៣ និង២០១៤ កន្លងទៅ។
ខណៈក្រុមយុវជនរបស់ក្លឹបភ្នំពេញក្រោនបានបរាជ័យកាលពីជំនួបជាមួយក្រុមជប៉ុន Kashima កាលពីសប្តាហ៍មុនក្នុងលទ្ធផល ៥-០ ក្រុម Frenz United បានត្រឹមស្មើជាមួយក្រុម PVF ១-១ ដែលក្រុមទាំងពីរតែងតែទទួលបានលទ្ធផលយ៉ាងប្រកៀតប្រកិតគ្នា។
សម្រាប់តម្លៃសំបុត្រគឺដូចគ្នាទៅនឹងតម្លៃសំបុត្រនៃការប្រកួតមិត្តហ្វូនខេមបូឌានលីកដែរ (៤០០០ រៀល នៅកន្លែងមានដំបូល និង ២០០០ រៀល នៅកន្លែងគ្មានដំបូល) ហើយសម្រាប់សមាជិកអ្នកគាំទ្ររបស់ក្លឹបអាចចូលរួមទស្សនាដោយសេរី។ ការប្រកួតក៏នឹងមានផ្សាយបន្តផ្ទាល់លើកញ្ចក់ទូរទស្សន៍ BTV Newsផងដែរ។ ការប្រកួតពានរង្វាន ACT 2015 នេះនឹងដំណើរការរហូតដល់ខែវិច្ឆិកាដោយនេះជាឆ្នាំទី៣ហើយដែលក្រុមយុវជនភ្នំពេញក្រោនបានចូលរួម។
យុវជនភ្នំពេញក្រោនដែលដឹកនាំបង្វឹកដោយលោក ប៊ួយ ដារី ស្ថិតនៅក្នុងពូល B ដែល មានក្រុម Frenz United (ម៉ាឡេស៊ី) Kashima Antlers (ជប៉ុន) និងក្រុម PVF (វៀតណាម)។ ចំណែកឯពូល A វិញមានក្រុម Chonburi (ថៃ) AIFF (ឥណ្ឌា) Frenz United A (ម៉ាឡេស៊ី/ឥណ្ឌូនេស៊ី) Felda United (ម៉ាឡេស៊ី)ហើយក្រុមទាំងពីរដែលឈរនៅកំពូលតារាងនៃពូលទាំងពីរនឹងមានសិទ្ធិក្នុងការប្រកួតនៅវគ្គពាក់កណ្តាលផ្តាច់ព្រ័ត្របន្តទៀត។ សម្រាប់ការប្រកួតផ្តាច់ព្រ័ត្រទាំងពីរជើងនៅធ្វើឡើងនៅថ្ងៃទី១១ និង ថ្ងៃទី១៨ ខែវិចិ្ឆកា ឆ្នាំ២០១៥ខាងមុខនេះ។
កាលវិភាគប្រកួតរបស់ក្រុមយុវជនក្លឹបភ្នំពេញក្រោន៖
ថ្ងៃសុក្រ ១៤ សីហា vs Frenz United B កីឡដ្ឋាន RSN វេលាម៉ោង ៦ ល្ងាច
ថ្ងៃពុធ ៩ កញ្ញា vs PVF @ Away ៣:៣០ រសៀល
ថ្ងៃពុធ ១៦ កញ្ញា vs Frenz United B Away ៨:១៥ យប់
ថ្ងៃពុធ ១៤ តុលា vs Kashima Antlers កីឡដ្ឋាន RSN វេលាម៉ោង ៦ ល្ងាច
ថ្ងៃសុក្រ ២៣ តុលា vs PVF កីឡដ្ឋាន RSN វេលាម៉ោង ៦ ល្ងាច
Tag:
Asia Champions Trophy
U18 ភ្នំពេញក្រោន
© រក្សាសិទ្ធិដោយ thmeythmey.com