នីហ្សេរីយ៉ា ៖ តុលាការអនុញ្ញាតឲ្យបុរសម្នាក់លែងប្រពន្ធ ដោយសារតែបម្រើអាហារយឺតពេក

អន្តរជាតិ

នីហ្សេរីយ៉ា ៖ តុលាការអនុញ្ញាតឲ្យបុរសម្នាក់លែងប្រពន្ធ ដោយសារតែបម្រើអាហារយឺតពេក

14, Aug 2015 , 7:59 pm

រូបភាព

ដោយ: ធីតា

តុលាការនៃប្រទេសនីហ្សេរីយ៉ាបានយល់ព្រមតាមសំណើសុំលែងលះរបស់បុរសអាយុ ៥៧ ឆ្នាំម្នាក់ដែលបានយកហេតុផលថា ប្រពន្ធរបស់ខ្លួនរៀបចំបាយពេលល្ងាចយឺតពេក នេះបើតាមសេចក្តីផ្សព្វផ្សាយរបស់សារព័ត៌មានជាតិ Vanguard កាលពីថ្ងៃព្រហស្បតិ៍នេះ។

បុរសជាស្វាមីបាននិយាយនៅចំពោះមុខតុលាការនៅទីក្រុង Lagos ថា៖ « ប្រពន្ធខ្ញុំមិនបានគោរពកាតព្វកិច្ចជាស្ត្រីមេផ្ទះឲ្យបានល្អទេ។ នាងរៀបចំអាហារមិនទាន់ពេលវេលា។ ខ្ញុំបានដាស់តឿននាងច្រើនដងហើយ ប៉ុន្តែ នាងនៅតែធ្វើតាមចិត្តឯងដដែល »។ « គ្មានហេតុផលអ្វីដែលខ្ញុំត្រូវទុកប្រពន្ធដែលបណ្តោយឲ្យខ្ញុំឃ្លាននោះទេ។ ខ្ញុំមិនអាចទ្រាំរស់នៅជាមួយនាងបានទៀតឡើយ »។

ចំណែកស្ត្រីជាប្រពន្ធដែលបានរស់នៅជាមួយស្វាមីរូបនេះរយៈពេល ២៥ ឆ្នាំមកហើយនោះ បានច្រានចោលនូវពាក្យចោទប្រកាន់ទាំងនេះ ហើយបន្ទោសប្តីថា ចង់លែងលះជាមួយខ្លួនដើម្បីទៅរស់នៅជាមួយមនុស្សស្រីម្នាក់ទៀត។

នៅទីបំផុត ប្រធានតុលាការបានប្រកាសបញ្ចប់ភាពជាប្តីប្រពន្ធរវាងអ្នកទាំងពីរ ដោយបញ្ចប់សេចក្តីថា តុលាការបានព្យាយាមផ្សះផ្សាជាច្រើនលើកច្រើនសាមកហើយ ប៉ុន្តែ ការខិតខំប្រឹងប្រែងនៅតែគ្មានលទ្ធផលដដែល។ នេះជាលើកទីមួយហើយដែលស្វាមីបានទទួលការអនុញ្ញាតឲ្យលែងលះតាមផ្លូវច្បាប់ ដោយសារតែហេតុផលបម្រើអាហារយឺតពេក៕