អន្តរជាតិ
×![]()
នៅថ្ងៃសៅរ៍ម្សិលមិញ កូរ៉េខាងជើងបានគំរាមវាយប្រហារកូរ៉េខាងត្បូងឥតរើសមុខ បើក្រុងសេអ៊ូលមិនបញ្ឈប់ការចាក់មេក្រូឃោសនានៅតាមព្រំដែនកូរ៉េទាំង២ទេ។ ក្រុងព្យុងយ៉ាងក៏ឆ្លៀតគំរាមប្រើនុយក្លេអ៊ែរវាយប្រហារអាមេរិកផងដែរ។ ជម្លោះរវាងបងប្អូនកូរ៉េទាំង២កំពុងតែជួបភាពតានតឹងកាន់តែធ្ងន់ ពិសេសជិតដល់ពេលដែលក្រុងសេអ៊ូល និងអាមេរិកធ្វើសមយុទ្ធយោធាប្រចាំឆ្នាំ រួមគ្នា នៅថ្ងៃចន្ទស្អែកនេះ។ 
កូរ៉េខាងជើងទាមទារអោយកូរ៉េខាងត្បូងបញ្ឈប់ការចាក់ផ្សាយមេក្រូបរិហាររដ្ឋាភិបាលក្រុងព្យុងយ៉ាង នៅតាមព្រំដែនកូរ៉េទាំង២ មិនដូច្នោះទេ នឹងវាយប្រហារខ្លាំងក្លាលើក្រុងសេអ៊ូល។
ការចាក់មេក្រូនេះ ជាការសងសឹកនឹងការផ្ទុះមីន កាលពីថ្ងៃ៤សីហា នៅតាមតំបន់គ្មានអាវុធយោធារវាងប្រទេសទាំង២ ។ ការផ្ទុះមីននេះបានបង្ករបួសដល់ទាហានកូរ៉េខាងត្បូង២នាក់។ ក្រុងសេអ៊ូលបានទំលាក់កំហុសលើក្រុងព្យុងយ៉ាង និងគំរាមសងសឹកវិញ។ ប៉ុន្តែ ក្រុងព្យុងយ៉ាងបានបដិសេធដាច់អហង្កា ថាខ្លួនមិនបានបំផ្ទុះមីន ដូចការចោទប្រកាន់នេះទេ។
សមយុទ្ធយោធារួមគ្នា ប្រចាំឆ្នាំ រវាងអាមេរិកនិងកូរ៉េខាងត្បូង ដែលនឹងប្រព្រឹត្តទៅចាប់ពីថ្ងៃចន្ទស្អែក រឹតតែបង្កើនកំហឹងកូរ៉េខាងជើងថែមទៀត។ សមយុទ្ធនេះនឹងមានវត្តមានទាហានជាង១សែននាក់ ជាសមយុទ្ធដែលក្រុងសេអ៊ូលនិងក្រុងវ៉ាស៊ីនតោន ហាត់សម ករណីមានការឈ្លានពានពីក្រុងព្យុងយ៉ាង។ ក្រុងព្យុងយ៉ាងបានឆ្លៀតគំរាមអាមេរិក នៅថ្ងៃសៅរ៍ម្សិលមិញថា នឹងប្រើអាវុធនុយក្លេអ៊ែរវាយប្រហារអាមេរិក បើសមយុទ្ធយោធានេះប្រព្រឹត្តទៅដូចការគ្រោងទុក៕
Tag:
កូរ៉េខាងជើង
នុយក្លេអ៊ែរ
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ថ្ងៃ
