ជាតិ
លោក ហ៊ុន សែន បញ្ជាឲ្យសមត្ថកិច្ចចាត់វិធានការលើអ្នកបន្ដចោទរដ្ឋាភិបាលប្រើផែនទីក្លែងក្លាយ
× នៅព្រឹកថ្ងៃសុក្រនេះ លោកនាយករដ្ឋមន្ត្រី ហ៊ុន សែន បានព្រមានចាត់វិធានការផ្លូវច្បាប់ ទៅលើបុគ្គលទាំងអស់ ដែលនៅតែបន្តចោទប្រកាន់រដ្ឋាភិបាល ប្រើប្រាស់ផែនទីក្លែងក្លាយ។ការព្រមានរបស់លោក ហ៊ុន សែន ធ្វើឡើងនៅក្នុងកិច្ចប្រជុំគណៈរដ្ឋមន្ត្រីនៅវិមានសន្តិភាព និងក្រោយពេលដែលលោក បានផ្ញើសារទៅប្រធានគណបក្សសង្គ្រោះជាតិ លោក សម រង្ស៊ី ដោយអំពាវនាវកុំឲ្យមានការចោទប្រកាន់ថារដ្ឋាភិបាលប្រើប្រាស់ផែនទីក្លែងក្លាយទៀត។
ការចេញបញ្ជារបស់លោកនាយករដ្ឋមន្ត្រី ហ៊ុន សែន នេះត្រូវបានស្រង់សំដីដោយលោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី សរសេរនៅលើទំព័រហ្វេសបុកខ្លួនថា ក្នុងកិច្ចពង្រឹងនីតិរដ្ឋ និងសណ្តាប់ធ្នាប់សង្គមជាមួយនិងកាតព្វកិច្ចរបស់រាជរដ្ឋាភិបាលក្នុងន័យ ដែលមានចែងនៅក្នុងរដ្ឋធម្មនុញ្ញនោះ រាជរដ្ឋាភិបាលកម្ពុជា ត្រូវការពារនីត្យានុកូលភាព ធានាសណ្តាប់ធ្នាប់ និងសន្តិសុខសាធារណៈ ។
អ្នកនាំពាក្យរូបនេះសរសេរទៀតថា ៖«សម្តេច ហ៊ុន សែន បានបញ្ជាឲ្យចាត់វិធានការជាបន្ទាន់ រាល់រូបភាពទាំងអស់ដែលជាសមត្ថកិច្ច និងអំណាចរដ្ឋគ្រប់ទីកន្លែង ដល់រាល់បុគ្គល ក្រុម ឬអង្គការណាមួយ ដែលនៅតែបន្តសកម្មភាព រូបភាព និងទិដ្ឋភាព បំពុលក្នុងការលើកឡើងថា រាជរដ្ឋាភិបាលប្រើប្រាស់ផែនទីក្លែងក្លាយ ដែលទង្វើនេះបានចាត់ទុកថាជាការញុះញង់ ប៉ះពាល់ដល់ដែនសមត្ថកិច្ចនីត្យានុកូលភាព សណ្តាប់ធ្នាប់ និងសន្តិសុខសាធារណៈ ដែលបណ្តាលឲ្យសាធារណៈជនយល់ច្រឡំ អំពីបញ្ហាព្រំដែន ដែលត្រូវបានពិនិត្យ និងផ្ទៀងផ្ទាត់ដោយ អង្គការសហប្រជាជាតិ (អ.ស.ប) ជាមួយផែនទីរបស់រាជរដ្ឋាភិបាលរួចមកហើយ»។
គួរបញ្ជាក់ថា ការព្រមានចាត់វិធានការរបស់លោករដ្ឋមន្ត្រី ហ៊ុន សែន ពេលនេះធ្វើឡើងក្រោយពីផែនទីផែនទីដែលកម្ពុជាកំពុងប្រើប្រាស់ និងផែនទីដែលទើបនឹងទទួលបានពីមន្ត្រីអង្គការសហប្រជាជាតិ មានលក្ខណៈដូចគ្នានឹងផែនទីរដ្ឋាភិបាលចំនួន ១៨ផ្ទាំង ខណៈដែលរដ្ឋាភិបាលមានផែនទីប្រើប្រាស់ចំនួន២៦ផ្ទាំង។
កន្លងមក តំណាងរាស្ត្រគណបក្សសង្គ្រោះជាតិលោក អ៊ុំ សំអាន និងលោក រៀល ខេមរិន្ទ្រ ដែលតែងតែចេញមុខឈឺឆ្អាលបញ្ហាព្រំដែននោះ តែងតែចោទរដ្ឋាភិបាលប្រើប្រាស់ផែនទីក្លែងក្លាយ។ មន្ត្រីជាន់ខ្ពស់គណបក្សសង្គ្រោះជាតិ លោក អ៊ូ ច័ន្ទឬទ្ធិ បញ្ជាក់ថា គណបក្សសង្គ្រោះជាតិមិនដែលចោទប្រកាន់រដ្ឋាភិប្រើប្រាស់ផែនទីក្លែងក្លាយទេ ហើយការចោទប្រកាន់នោះគឺជារឿងបុគ្គលប៉ុណ្ណោះ។
កាលពីថ្ងៃទី១៦ សីហា លោក ហុង សុខហួរ ត្រូវបានបញ្ជូនទៅឃុំបណ្តោះអាសន្ននៅពន្ធនាគារព្រៃស ដើម្បីរង់ចាំថ្ងៃកំណត់សវនាការ ក្រោយពីចៅក្រមស៊ើបសួរសាលាដំបូងរាជធានីភ្នំពេញ បានសម្រេចចោទប្រកាន់លោកលោក ហុង សុខហួរ សមាជិកព្រឹទ្ធសភាគណបក្ស សម រង្ស៊ី លើបទចោទប្រកាន់ចំនួន៣ គឺបទក្លែង និងប្រើ ឯកសារសាធារណៈ រួមទាំងញុះញង់ឲ្យមានអសន្តិសុខ ពាក់ព័ន្ធនឹងសន្ធិសញ្ញាកម្ពុជានិងវៀតណាមនៅឆ្នាំ១៩៧៩៕
© រក្សាសិទ្ធិដោយ thmeythmey.com