ជាតិ
លោក ហ៊ុន សែន ថា លោក សម រង្ស៊ី កេងចំណេញនយោបាយសូម្បីតែហូបបាយជួបជុំគ្រួសារ
× លោកនាយករដ្ឋមន្ត្រី ហ៊ុន សែន ចោទលោក សម រង្ស៊ី ថា បានប្រព្រឹត្តអំពើទុច្ចរិត កេងចំណេញនយោបាយ សូម្បីតែនៅពេលហូបបាយជួបជុំគ្រួសារជាមួយគ្នា។ លោក ហ៊ុន សែន បញ្ជាក់ថា លោក សម រង្ស៊ី បានបំបាក់មុខលោក ដោយបានផ្ដល់បទសម្ភាសន៍ដល់កាសែតបារាំង មួយថា «លោក ហ៊ុន សែន ដូចជាដឹងខ្លួនបានជាខិតខំឲ្យកូនគាត់ស្គាល់កូនខ្ញុំ» ដែលជាពាក្យសម្ដីមួយ មិនអាចទទួលយកបាន។ ប្រមុខរដ្ឋាភិបាល អះអាងថា រូបលោកផ្ទាល់មិនដែលសុំថតរូបជាមួយប្រធានាធិបតីប្រទេសណាមួយឡើយ ព្រោះលោកមានសេចក្ដីថ្លៃថ្នូរណាស់។
ការថ្លែងរបស់ប្រមុខរដ្ឋាភិបាលបែបនេះធ្វើឡើង នៅក្នុងពិធីប្រកាសផ្សព្វផ្សាយនិងដាក់ឲ្យអនុវត្តគោលនយោបាយអភិវឌ្ឍវិស័យឧស្សាហកម្មកម្ពុជាឆ្នាំ២០១៥-២០២៥ នាព្រឹកថ្ងៃពុធនេះ នៅវិមានសន្ដិភាព។
សូមបញ្ជាក់ថា កាលពីថ្ងៃទី១១ កក្កដាកន្លងមក គ្រួសារលោក ហ៊ុន សែន និងគ្រួសារលោក សម រង្ស៊ី បានជួបជុំពិសារអាហារពេលល្ងាច នាសណ្ឋាគារកាំបូឌីយ៉ាណា។នៅក្នុងពិធីពិសាអាហារជុំគ្នានេះ ខាងគ្រួសារ លោក ហ៊ុន សែន មានវត្តមានអ្នកស្រី ប៊ុនរ៉ានី ហ៊ុន សែន និងកូនបង្កើត រួមនឹងកូនប្រសារ ៥ នាក់។ រីឯខាងគ្រួសារលោក សម រង្ស៊ី មានវត្តមានអ្នកស្រី ជូឡុង សូមូរ៉ា និងកូន ៣ នាក់ ក្នុងនោះមានកូនប្រសារផងដែរ។
នៅពេលនោះ លោក ហ៊ុន សែន បាននិយាយថា មូលហេតុសំខាន់ដែលលោកចង់ពិសាអាហារជុំគ្នាជាមួយគ្រួសារលោក សម រង្ស៊ី គឺចង់ឲ្យកូនចៅលោក និងលោក សម រង្ស៊ី ប្រកាន់យកវប្បធម៌សន្ទនាគ្នាបន្តពីរូបលោក៕
© រក្សាសិទ្ធិដោយ thmeythmey.com