ជាតិ
×![]()
ភ្នំពេញ៖ តំណាង NGO និងប្រជាសហគមន៍មានក្តីបារម្ភជាខ្លាំង ចំពោះការកាប់បំផ្លាញព្រៃឈើ ដើម្បីដាំដំណាំកសិឧស្សាហកម្ម ពិសេសគឺដំណាំកៅស៊ូ នៅក្នុងខេត្តរតនគិរី និងស្ទឹងត្រែង។ ពួកគេស្រាវជ្រាវឃើញថា ក្នុងរយៈពេលជាង ១០ ឆ្នាំចុងក្រោយនេះ ក្រុមហ៊ុនដែលទទួលបានដីសម្បទានសេដ្ឋកិច្ចពីរដ្ឋាភិបាលបានធ្វើសកម្មភាពកាប់បំផ្លាញគម្របព្រៃឈើរាប់ម៉ឺនហិកតា។
ក្រុមហ៊ុនវិនិយោគចំនួន ៣៤ ដែលទទួលបានដីសម្បទាន សេដ្ឋកិច្ចពីរដ្ឋាភិបាល បាននិងកំពុងប្រតិបត្តិការកាប់បំផ្លាញព្រៃឈើលើផ្ទៃដីទំហំជាង ២៣២,១៦៨ហិកតា ដោយឡែក ក្រុមហ៊ុន ១១ទៀត កំពុងធ្វើអាជីវកម្មរុករករ៉ែ លើផ្ទៃដី ៥៨៨,៧៣២ ហិកតា នៅក្នុងខេត្តរតនគីរី។នេះបើយោងតាមរបាយការណ៍ស្រាវជ្រាវស្តីពីការកាប់ឈើព្រៃរដ្ឋជាប្រព័ន្ធនៅតំបន់ការពារនៅខេត្ត រតនគីរី និងខេត្តស្ទឹងត្រែង វេទិកានៃអង្គការមិនមែនរដ្ឋាភិបាលស្តីពីកម្ពុជា (NGO Forum) បានផ្សព្វផ្សាយនៅថ្ងៃទី២៦នេះ។
តាមលទ្ធផលស្រាវជ្រាវរបស់ក្រុមការងារ NGO Forum ក្នុងឆ្នាំ២០១៤ ក្រុមហ៊ុនវិនិយោគបាន និងកំពុងកាប់ឈើបំផ្លាញព្រៃឈើក្នុងតំបន់អភរក្សនានា រួមមាន តំបន់ឧទ្យាន ជាតិវីរៈជ័យ ដែនជម្រកសត្វព្រៃលំផាត់ តំបន់អភិរក្សវ៉ឺនសៃ និងតំបន់ការពារសហគមន៍ អូរចាយ អូរទុង អូរតាបូក ។ល។ NGO Forum បានបង្ហាញផលប៉ះពាល់ពីសកម្មភាពកាប់បំផ្លាញព្រៃឈើថា ក្រុមហ៊ុនវិនិយោគ បាន និងកំពុងបំផ្លាញជំរកសត្វព្រៃ ធនធានធម្មជាតិរបស់កម្ពុជា ព្រមទាំង ព្រៃអារក្ស ព្រៃទីស្មសាន ព្រៃដូនតា ដែលជាតំបន់វប្បធម៌ប្រពៃណីទំនៀមទំលាប់ជនជាតិ ភាគតិច ក្នុងខេត្តរតនគីរី និងខេត្តស្ទឹងត្រែង។
ទាក់ទិននឹងលទ្ធផលរបាយការណ៍នេះ លោក ស្រ៊ុន ដារឹទ្ធិ ទីប្រឹក្សាក្រសួងបរិស្ថាន បានថ្លែង ការពារគោលនយោបាយផ្តល់ដីសម្បទានសេដ្ឋកិច្ចឲ្យក្រុមហ៊ុនឯកជនថា រដ្ឋាភិបាលពុំ អនុញ្ញាតឲ្យក្រុមហ៊ុនធ្វើអាជីវកម្មព្រៃឈើខុសច្បាប់នោះទេ។ លោកថា៖«ក្រុមហ៊ុនទាំងអស់ មានច្បាប់អនុញ្ញាតវិនិយោគដំណាំដុះដំណាំកៅស៊ូរាប់ម៉ឺនហិកតា ក្នុងតំបន់អភិវឌ្ឍលើទំហំ ផ្ទៃដីត្រឹមត្រូវ។ ក្រុមហ៊ុននឹងប្រឈមមុខនឹងវិធានការច្បាប់ ប្រសិនបើប្រព្រឹត្តផ្ទុយពី គោលការណ៍របស់រាជរដ្ឋាភិបាល»។
ជាមួយគ្នានេះ លោក តឹក សុវណ្ណារ៉ា នាយកប្រតិបត្តិវេទិកា NGO Forum បានស្នើរដ្ឋាភិបាល និងភាគីពាក់ព័ន្ធពង្រឹងច្បាប់គ្រប់គ្រងធនធានធម្មជាតិ និងព្រៃឈើក្នុងខេត្តរតនគីរី និងស្ទឹងត្រែង ពិសេសគឺ តំបន់អភិរក្សព្រៃឈើធម្មជាតិ។ លោកនិយាយថា រដ្ឋាភិបាលគួរចាត់ វិធានការជាបន្ទាន់ ដើម្បីការពារឧទ្យានជាតិវីរៈជ័យ តាមរយៈការអនុវត្តន៍ច្បាប់ ព្រមទាំង ជម្រុញការងារល្បាតរួមគ្នា រវាងក្រុមល្បាតរបស់ឧទ្យានជាតិ និងប្រជាសហគមន៍ក្នុងតំបន់។
តំណាងប្រជាសហគមន៍ព្រៃឈើមកពីខេត្តស្ទឹងត្រែង លោកស្រី សេក ម៉ុន បានអះអាងថា ក្រុមហ៊ុនវិនិយោគដែលទទួលបានដីសម្បទានសេដ្ឋកិច្ចពីរដ្ឋាភិបាល មិនបានជួយអភិវឌ្ឍ សហគមន៍ពួកគាត់នោះទេ។ លោកស្រីថា៖«ក្រុមហ៊ុនបានចូលកាប់បំផ្លាញព្រៃអារក្ស ព្រៃដូនតាយើង។ យើងរស់នៅពឹងអាស្រ័យលើព្រៃភ្នំធម្មជាតិ ប្រសិនក្រុមហ៊ុនចូលកាប់ព្រៃអស់ តើយើងរស់នៅបានដោយរបៀបណា»?
Tag:
NGO
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
5 ម៉ោង
