ជាតិ
បាក់ឌុប៖ គ្រូបង្រៀនប្តឹងនាយកវិទ្យាល័យថ្មគោលពីបទស៊ីសំណូកសិស្សធ្លាក់ពិន្ទុឆមាស
× ភ្នំពេញ៖ គ្រូបង្រៀន និងបុគ្គលិកសិក្សាបម្រើការងារនៅវិទ្យាល័យថ្មគោល ខេត្តបាត់ដំបង បានប្តឹងលោក ហ៊ីង ស៊ុនថារិទ្ធ នាយកវិទ្យាល័យថ្មគោលពីបទជំរិតទារប្រាក់ពីសិស្សធ្លាក់ពិន្ទុឆមាសជាថ្នូរនឹងបេក្ខភាពចូលប្រឡងបាក់ឌុប ទៅកាន់អង្គភាពប្រឆាំងអំពើពុករលួយ។ តែយ៉ាងណា លោក ហ៊ីង ស៊ុនថារិទ្ធ ឆ្លើយបដិសេធថា លោកមិនបានប្រព្រឹត្តដូចពាក្យបណ្តឹងនោះទេ។
តំណាងដើមបណ្តឹងលោកគ្រូ ទោ លឿន និយាយថា លោក ហ៊ីង ស៊ុនថារិទ្ធ បានទទួល សំណូកថវិកាពី ៦ម៉ឺនទៅ ១៤ម៉ឺនរៀលពីសិស្សថ្នាក់ទី១២ ចំនួន ១៩នាក់ ដែលធ្លាក់មធ្យមភាគប្រចាំឆមាស ជាថ្នូរនឹងការដាក់ឲ្យមានឈ្មោះប្រឡងបាក់ឌុបឆ្នាំ ២០១៥។ គ្រូបង្រៀនមុខវិជ្ជាសេដ្ឋកិច្ច និងភាសាអង់គ្លេសរូបនេះ ចាត់ទុកថា ទង្វើនេះបាននិងកំពុងធ្វើឲ្យខូចគុណភាពអប់រំកម្ពុជា ស្របពេលក្រសួងអប់រំកំពុងកែទម្រង់ប្រព័ន្ធអប់រំ តាមរយៈការរឹតបន្តឹងការប្រឡងបាក់ឌុប។
«ខ្ញុំមិនអាចឈរមើលទង្វើអយុត្តិធម៌នេះបានទេ ព្រោះនេះជាអំពើអយុត្តិធម៌សម្រាប់សិស្សព្យាយាមចូលសិក្សារៀនសូត្រ។ ខ្ញុំមានឯកសារភស្តុតាងគ្រប់គ្រាន់ក្នុងពាក្យបណ្តឹងទៅ អង្គភាពប្រឆាំងអំពើពុករលួយ។ ហេតុអ្វីបានជាសិស្សធ្លាក់ពិន្ទុឆមាសអាចចូលប្រឡងបាក់ឌុប»? នេះជាការបញ្ជាក់របស់លោក ទោ លឿន ដែលងឿងឆ្ងល់ពីការបូកពិន្ទុរបស់លោក នាយកវិទ្យាល័យថ្មគោល ខេត្តបាត់ដំបង។
ជាងនេះទៀត លោក ទោ លឿន បន្ថែមថា សិស្សទី១២ ដែលធ្លាក់ឆមាសផ្សេងទៀត ដែលមិនបានបង់លុយឲ្យលោកនាយក ពួកគេមិនមានឈ្មោះប្រឡងថ្នាក់ជាតិនោះទេ ដោយ លោកលើកឡើងថា លោក ហ៊ីង ស៊ុនថារិទ្ធ ថា តាមច្បាប់សិស្សដែលធ្លាក់ឆមាសមិនអាចចុះឈ្មោះប្រឡងជាដាច់ខាត។
សិស្សវិទ្យាល័យថ្មគោលម្នាក់សុំមិនបញ្ចេញឈ្មោះ ដែលអះអាងខ្លួនជាអ្នកសូកផ្ទាល់និយាយថា លោក ហ៊ីង ស៊ុនថារិទ្ធ នាយកវិទ្យាល័យថ្មគោល ពិតជាបានទទួលថវិកាពីសិស្ស ពិតមែន ជាថ្នូរនឹងបេក្ខភាពប្រឡងបាក់ឌុបឆ្នាំ ២០១៥។ កូនសិស្សរូបនេះ និយាយរដិបរដុបថា៖«គាត់យកលុយខ្ញុំ ដោយសារខ្ញុំធា្លក់ពិន្ទុឆមាសក្រោម ២៥ពិន្ទុ។ គាត់ថា គាត់នឹង យកលុយទៅទិញស៊ីម៉ង់ ថ្ម ដើម្បីរៀបចំក្រាលបេតុងមុខសាលាប៉ុណ្ណោះ»។
ឆ្លើយតបនឹងការចោទប្រកាន់នេះ លោក ហ៊ីង ស៊ុនថារិទ្ធ នាយកវិទ្យាល័យថ្មគោល បាន និយាយ បដិសេធថា លោកពុំបានទទួលសំណូកពីកូនសិស្សណាម្នាក់នោះទេ។ លោកអះអាង យ៉ាងខ្លីថា៖«ខ្ញុំអត់ដឹងរឿងនេះទេ។ គេប្រឌិតរឿងចោទខ្ញុំប៉ុណ្ណោះ»។
ខុស ឬត្រូវយ៉ាងណានោះ យើងនឹងរង់ចាំមើលនីតិវិធីរបស់អង្គភាពប្រឆាំងអំពើពុករលួយ៕
© រក្សាសិទ្ធិដោយ thmeythmey.com