ជាតិ
សង្គមជាតិ
បាក់ឌុប៖ មន្ត្រីអប់រំជាង១ម៉ឺននាក់ធ្វើអត្រាកំណែវិញ្ញាសាក្នុងមណ្ឌលចំនួន ៩ នៅភ្នំពេញ
× ភ្នំពេញ៖ នៅថ្ងៃទី២៧ ខែសីហានេះ ប្រធានគណៈមេប្រយោគ និងប្រធានគណៈកម្មការអប្បមាទទូទាំងប្រទេស បានប្រគល់ហឹបសន្លឹកកិច្ចការបេក្ខជនឲ្យប្រធាន អនុប្រធានមណ្ឌលកំណែ និងគណៈកម្មការកំណែតាមមុខវិជ្ជា នៅវិទ្យាល័យព្រះស៊ីសុវត្ថិ ដើម្បីចាប់ផ្តើមដំណើរការកំណែវិញ្ញាសាបាក់ឌុបក្នុងឆ្នាំ ២០១៥។
អ្នកនាំពាក្យក្រសួងអប់រំលោក រស់ សាលីន បានឲ្យដឹងនៅថ្ងៃព្រហស្បតិ៍នេះថា ក្រសួងអប់រំបានចាត់មន្ត្រីអប់រំចំនួន ១១២០៥នាក់ សម្រាប់ដំណើរការអត្រាកំណែវិញ្ញាសាបាក់ឌុប ចាប់ពីថ្ងៃទី២៧ សីហា ដល់ថ្ងៃទី១៣ កញ្ញា ឆ្នាំ២០១៥។
«មណ្ឌលអត្រាកំណែឆ្នាំនេះ មានចំនួន ៩មណ្ឌលដូចឆ្នាំមុន ហើយតាមបន្ទប់កំណែមណ្ឌលនីមួយៗ មានដាក់កាម៉េរ៉ាសុវត្ថិភាព និងអ្នកសង្កេតការណ៍អង្គភាពប្រឆាំងអំពើពុករលួយចូលរួមសង្កេតការណ៍ និងឃ្លាំមើលដំណើរការកំណែ»។ នេះជាប្រសាសន៍បញ្ជាក់របស់លោក រស់ សាលីន ពីការធានាតម្លាភាព យុត្តិធម៌ ក្នុងដំណើរការអត្រាកំណែវិញ្ញាសាបេក្ខជនបាក់ឌុបទូទាំងប្រទេស។
អ្នកពាក្យបញ្ជាក់ថា មណ្ឌលកំណែទាំងថ្នាក់វិទ្យាសាស្ត្រ និងវិទ្យាសាស្ត្រសង្គមចំនួន ៩ ក្នុងនោះ រួមមាន ទីមួយ, មណ្ឌលកំណែវិទ្យាល័យបាក់ទូក សម្រាប់មុខវិជ្ជាគណិតវិទ្យា។ ទីពីរ,មណ្ឌលកំណែវិទ្យាល័យ ព្រះស៊ីសុវត្ថិ សម្រាប់មុខវិជ្ជាអក្សរសាស្ត្រខ្មែរ។ ទីបី,មណ្ឌលកំណែវិទ្យាល័យព្រះយុគន្ធរ សម្រាប់មុខវិជ្ជាគីមីវិទ្យា។ ទីបួន,មណ្ឌលកំណែវិទ្យាល័យទូលទំពូង សម្រាប់មុខវិជ្ជាជីវវិទ្យា។ ទីប្រាំ,មណ្ឌលកំណែវិទ្យាល័យវត្តកោះ សម្រាប់វិជ្ជារូបវិទ្យា។ ទីប្រាំមួយ,មណ្ឌលកំណែ វិទ្យាល័យ ហ៊ុនសែន ប៊ុនរ៉ានី វត្តភ្នំ សម្រាប់មុខវិជ្ជាប្រវត្តិវិទ្យា ។ ទីប្រាំពីរ,មណ្ឌលកំណែ វិទ្យាល័យ ជា ស៊ីម បឹងកេងកង សម្រាប់មុខវិជ្ជាភូមិវិទ្យា។ ទីប្រាំបី,មណ្ឌលកំណែវិទ្យាល័យ ជា ស៊ីម សន្ធរម៉ុក សម្រាប់មុខវិជ្ជា សីលធម៌ពលរដ្ឋវិជ្ជា និងទីប្រាំបួន មណ្ឌលកំណែ អនុវិទ្យាល័យចតុមុខ សម្រាប់មុខវិជ្ជាភាសាបរទេស។
បន្ទាប់ពីអត្រាកំណែវិញ្ញាសារួច លោក រស់ សាលីន និយាយថា ដំណើរការស្រង់បូកពិន្ទុដោយកុំព្យូទ័រនឹងប្រព្រឹត្តឡើងចាប់ពីថ្ងៃទី០៣ ដល់ថ្ងៃទី១៣ ខែកញ្ញា។ ការប្រឡងរយៈពេល ២ថ្ងៃ ស្មើនឹង ៦៣០នាទី មានរបបពិន្ទុប្រឡង អតិបរមា ៥០០ពិន្ទុ ប៉ុន្តែមុខវិជ្ជាភាសាបរទេសជាវិញ្ញាសាតាមស្ម័គ្រ ដូច្នេះពិន្ទុប្រឡងជាប់គឺ ៥០០ពិន្ទុ ដក ២៥រួច ចែកនឹង ២ ស្មើនឹង ២៣៧,៥ពិន្ទុ។
ដំណើរការប្រឡងរយៈពេលពីរថ្ងៃកន្លងទៅ បេក្ខជនចុះឈ្មោះប្រឡងសរុបចំនួន ៨៤៩៣០ នាក់ ស្រី ៤០៩៧២នាក់ និង មណ្ឌល ប្រឡងចំនួន ១៥០មណ្ឌល ក្នុងនោះ វិទ្យាសាស្ត្រមាន ១២៦មណ្ឌល និងថ្នាក់វិទ្យាសាស្ត្រសង្គមមាន ២៤មណ្ឌល ត្រូវជា ៣៤២៧ បន្ទប់ទូទាំងប្រទេស។ បេក្ខជនអវត្តមានសរុបចំនួន ១៥៨៩នាក់ ស្រី ៥៥២នាក់ ត្រូវជា ១,៨៧ ភាគរយ នៃចំនួនបេក្ខជនចុះឈ្មោះប្រឡងសរុប។ មុខវិជ្ជាប្រឡង មានចំនួន ៧ ចែកចេញជា ថ្នាក់វិទ្យាសាស្ត្រ និងថ្នាក់វិទ្យាសាស្ត្រសង្គម។
លទ្ធផលប្រឡងសញ្ញាបត្រមធ្យមសិក្សាទុតិយភូមិ នឹងត្រូវប្រកាសនៅរសៀលនៅថ្ងៃទី១៥ ខែកញ្ញា សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្តាល និងនៅថ្ងៃទី១៦ ខែកញ្ញា ឆ្នាំ២០១៥ សម្រាប់មណ្ឌលប្រឡងនៅតាមបណ្តាខេត្តទាំង ២៣ទៀត ព្រមទាំង ផ្សព្វផ្សាយតាមហេ្វសប៊ុកផ្លូវការក្រសួងអប់រំ យុវជន និងកីឡា www.facebook.com/ moeys.gov.kh ៕
© រក្សាសិទ្ធិដោយ thmeythmey.com