អត្ថបទពាណិជ្ជកម្ម
សហរដ្ឋអាមេរិក ៖ បុរសម្នាក់រកប្រាក់បាន ១ ម៉ឺនដុល្លារក្នុងមួយខែពីការសរសេរសារលើដំឡូងបារាំង
× យុវជនវ័យក្មេងរស់នៅរដ្ឋ Texas ម្នាក់បានបង្កើតសេវាកម្មផ្ញើសារលើដំឡូងបារាំងដែលមានឈ្មោះថា Potato Parcel កាលពីខែឧសភា ឆ្នាំ២០១៥ កន្លងទៅនេះ ។ វាគឺជាគំនិតដ៏ចម្លែកមួយ តែវាបានហុចប្រាក់កម្រៃចំនួន ៣ ម៉ឺនដុល្លាររួចទៅហើយ ក្រោយពីបង្កើតបានបីខែ នេះបើតាមការចុះផ្សាយនៅលើគេហទំព័រ Mashable ។
សេវាកម្មនេះផ្តល់ជូនការផ្ញើសារជាលក្ខណៈផ្ទាល់ខ្លួន និងអនាមិក ដោយការសរសេរពាក្យពេចន៍មួយចំនួននៅលើដំឡូងបារាំង សម្រាប់គ្រប់ឱកាសទាំងអស់ មិនថាខួបកំណើត សារស្នេហា សារជូនពរ ឬក៏អ្វីផ្សេងនោះទេ។ Alex Craig អាយុ ២៥ ឆ្នាំបាននិយាយថា៖ « ពេលនេះ មានកម្មវិធីទំនើបៗ និងបច្ចេកវិទ្យាថ្មីៗជាច្រើនដែលធ្វើឲ្យការទំនាក់ទំនងមានការវិវត្តទៅមុខ។ តែខ្ញុំចង់ធ្វើឲ្យការទំនាក់ទំនងមានលក្ខណៈសាមញ្ញ »។
នៅពេលដែល Alex ប្រាប់គំនិតនេះដល់មិត្តស្រី នាងបាននិយាថា វាគឺជាគំនិតដ៏ល្ងង់ជាទីបំផុតដែលនាងមិនធ្លាប់បានឮ។ ប៉ុន្តែ នៅពេលដែលមិត្តប្រុសផ្សព្វផ្សាយសេវាកម្មរបស់ខ្លួននៅលើបណ្តាញសង្គម គេបានទទួលការបញ្ជាទិញដែលមានតម្លៃជាទឹកប្រាក់ ២ ពាន់ដុល្លារ ដោយប្រើរយៈពេលត្រឹមតែ ២៤ ម៉ោងប៉ុណ្ណោះ។ ចាប់តាំងពីពេលនោះមក សេវាកម្មនេះក៏បានការទទួលការគាំទ្រកាន់តែច្រើនឡើង ដោយមានការបញ្ជាទិញពី ៧៥០ ទៅ ១ ០០០ ក្នុងមួយខែៗ ហើយ Alex ក៏ដាក់ចិត្តប្រកបរបរដោយការសរសេរសារផ្សេងៗជាមួយនឹងប៊ិចហ្វឺតលុបមិនជ្រះនៅលើដំឡូង។
គេហទំហ័រ Potato Parcell ផ្តល់ជូននូវដំឡូងបារាំងពីរប្រភេទសម្រាប់ការផ្ញើសារ។ ប្រភេទទីមួយមានតម្លៃ ៧,៩៩ ដុល្លារ សម្រាប់សារ ១០០ អក្សរ។ ប្រភេទទីពីរមានតម្លៃ ៩,៩៩ ដុល្លារសម្រាប់សារ ១៤០ អក្សរ។
ដោយទទួលបានជោគជ័យនៅក្នុងប្រទេសរបស់ខ្លួន Alex បានបើកបណ្តាញសាខានៃសេវាកម្មរបស់ខ្លួននៅបរទេសថែមទៀត ដូចជាអូស្ត្រាលី កាណាដា និងចក្រភពអង់គ្លេសជាដើម៕
© រក្សាសិទ្ធិដោយ thmeythmey.com