ជាតិ
សង្គមជាតិ
ជនជាតិវៀតណាម១៥នាក់ទៀត ត្រូវបានបណ្តេញចេញពីកម្ពុជា រូបថត៖ ហ្វេកប៊ុកនាយកដ្ឋានស៊ើបអង្កេត និងអនុវត្តន៍នីតិវិធី
× នៅព្រឹកថ្ងៃទី២៨ខែ សីហានេះ នាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ បានបណ្តេញជនជាតិវៀតណាម ចំនួន១៥នាក់បន្ថែមទៀត ចេញពីប្រទេសកម្ពុជា តាមច្រកទ្វារអន្តរជាតិបាវិត។
បើតាម លោក អ៊ុក ហៃសិឡា ប្រធាននាយកដ្ឋានស៊ើបអង្កេត និងអនុវត្តនិតិវិធី នៃអគ្គនាយកដ្ឋានអន្តោប្រវេសន៍ ជនជាតិវៀតណាមទាំង១៥នាក់នេះ បានលួចឆ្លងដែនស្នាក់នៅ និងធ្វើការដោយខុសច្បាប់នៅរាជធានីភ្នំពេញ ខេត្តតាកែវ ខេត្តបន្ទាយមានជ័យ និងខេត្តកណ្តាល។
លោក អ៊ុក ហៃសិឡា បានបញ្ជាក់ថា ប្រតិបត្តិការរុករកជនអន្តោប្រវេសន៍ខុសច្បាប់នៅតែបន្តធ្វើជារៀងរាល់ថ្ងៃ។ ក្រៅពីពង្រឹងកិច្ចប្រតិបត្តិការចុះចាប់ជនអន្តោប្រវេសន៍ខុសច្បាប់ អគ្គនាយកដ្ឋានអន្តោប្រវេសន៍ ក៏នឹងចាត់វិធានការដ៏ម៉ឺងម៉ាត់ ដើម្បីទប់ស្កាត់លំហូរចូលជនអន្តោប្រវេសន៍ខុសច្បាប់មកកម្ពុជាផងដែរ។ លោក អ៊ុក ហៃសិឡា ក៏អំពាវនាវដល់ប្រជាពលរដ្ឋ ជួយសហការជាមួយសមត្ថកិច្ច ក្នុងការឃាត់ខ្លួនជនអន្តោប្រវេសន៍ ដែលលួចមកស្នាក់នៅ និងរកស៊ីដោយខុសច្បាប់នៅកម្ពុជា។
សូមបញ្ជាក់ថា គិតចាប់ពីខែកក្កដាឆ្នាំ២០១៤ រហូតមកទល់ពេលនេះ អគ្គនាយកដ្ឋានអន្តោប្រវេសន៍ បានរកឃើញជនអន្តោប្រវេសន៍ខុសច្បាប់បានចំនួន៣,៣២១នាក់ រួមមាន៤៦សញ្ជាតិ ក្នុងនោះស្រីចំនួន៥០០នាក់។ ដោយឡែកបើរាប់តែជនអន្តោប្រវេសន៍វៀតណាមមានចំនួន២,៥៩២នាក់ ក្នុងស្រី៤៥៨នាក់៕
© រក្សាសិទ្ធិដោយ thmeythmey.com