អន្តរជាតិ
×![]()
×![]()
ដោយ: ថ្មីៗ
នៅពេលដែល Gabrielle Hendel រើស Snorri មកចិញ្ចឹម វាគឺជាកូនឆ្មាអនាថាស្គមស្គាំង និងអត់ឃ្លានមួយក្បាល។ តើសត្វឆ្មានេះចង់អរគុណម្ចាស់របស់វាឬ ទើបវានាំយកអំណោយជាហូរហែមកឲ្យម្ចាស់ ?
នៅក្នុងសង្កាត់ Montavilla ប្រជាពលរដ្ឋបាននាំគ្នាដាក់ពាក្យបណ្តឹង ដោយសារតែបាត់អីវ៉ាន់ក្នុងផ្ទះមិនឈប់ឈរ។ នៅទីបំផុត ចោរអំបុកអំបែងក៏ត្រូវបានគេវែកមុខឃើញ តាមរយៈកាមេរ៉ាសុវត្ថិភាព។ ចោរនោះគឺជាសត្វឆ្មាឈ្មោលមួយក្បាលឈ្មោះ Snorri ។ វាតែងតែលួចអីវ៉ាន់របស់អ្នកជិតខាងមកផ្ទះជារៀងរាល់ថ្ងៃ។ វាអាចពាំបានទាំងអស់ តាំងពីស្រោមដៃ ឆ្នុកដប គ្រឿងប្រដាប់តែងខ្លួនរបស់កូនក្មេង អាវយឺត កន្សែងដៃ ប្រអប់ឈើគូស ស្បែកជើងម្ខាង ឬស្បែកជើងទាំងគូក៏មាន។ Snorri មានអាយុ ២ ឆ្នាំហើយ វាមានភាពស្ទាត់ជំនាញក្នុងការលួច ព្រោះថាវាបានរៀនពាំអីវ៉ាន់ផ្សេងៗមកដាក់ក្នុងផ្ទះ តាំងពីអាយុ ៦ ខែ។
Gabbie បាននិយាយថា៖ « នៅរាល់ពេលដែល Snorri លួចអីវ៉ាន់រួច វាបញ្ចេញប្រតិកម្មបែ្លក។ វាស្រែកម៉េវៗមិនឈប់ ហើយមើលទៅ ហាក់ដូចជាសប្បាយចិត្តណាស់ »។ ម្ចាស់របស់វាបានបង្ហោះរូបភាពទ្រព្យសម្បត្តិទាំងអស់ដែលសត្វឆ្មារបស់ខ្លួនបានលួច នៅលើទំព័រ Facebook នៃសង្កាត់ដែលនាងរស់នៅ។ Gabbie បានបញ្ជាក់ថា៖ « ពេលនេះ Snorri ចូលចិត្តលួចស្បែកជើងណាស់។ បន្ទាប់ពីឃើញរូបហើយ អ្នកជិតខាងខ្លះបានមកយកអីវ៉ាន់របស់គេទៅវិញ។ ប៉ុន្តែ Snorri តែងតែផ្លាស់ប្តូរផ្ទះដែលវាត្រូវលួចជាញឹកញាប់ »។
Snorri ពិតជាមានការតាំងចិត្តខ្ពស់ក្នុងការនាំយកអំណោយមកឲ្យម្ចាស់របស់វា ព្រោះថាការពាំអីវ៉ាន់ចុះឡើងតាមច្រកទ្វាររបស់សត្វឆ្មា ដែលគេចោះត្រឹមតែមួយល្មមខ្លួនរបស់វានោះ មិនមែនជារឿងងាយស្រួលប៉ុន្មានទេ៕
Tag:
សហរដ្ឋអាមេរិក
© រក្សាសិទ្ធិដោយ thmeythmey.com
