ជាតិ
សង្គមជាតិ
បាក់ឌុប៖ ក្រសួងអប់រំដាក់ចេញវិធានការ៤ចំណុច ដើម្បីពង្រឹងដំណើរការកំណែ
× ក្រសួងអប់រំ យុវជន និងកីឡា បានដាក់ចេញនូវវិធានការចំនួន៤ចំណុច ដើម្បីពង្រឹងដំណើរការកំណែនៃការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ដែលបានរៀបចំធ្វើនៅថ្ងៃទី២៤ និងទី២៥ខែសីហាកន្លងទៅ។
បើយោងតាមសេចក្តីប្រកាសព័ត៌មានរបស់ក្រសួងអប់រំ វិធានការទាំងនេះ គឺដើម្បីធានាថាការប្រឡងបាក់ឌុបដែលទើបតែបញ្ចប់នេះ ប្រព្រឹត្តទៅតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។
វិធានការទាំង៤ចំណុចរួមមាន៖
១. បំប៉នអ្នករៀបចំអក្សរសម្ងាត់ អ្នកកាត់ក្បាលសន្លឹកកិច្ចការ រក្សាបានភាពសម្ងាត់របស់បេក្ខជន និងពន្យល់យន្ធការមណ្ឌលកំណែដែលមានស្រាប់ទាំងផ្នែកបច្ចេកទេស និងរដ្ឋបាល ក្នុងនោះណែនាំនឹងត្រួតពិនិត្យឲ្យមានការធ្វើអត្រាកំណែដោយដាក់ពិន្ទុឲ្យបានលម្អិតតាមស្តង់ការកំណត់ សំដៅធ្វើឲ្យការកែមានសុក្រឹត និងការទទួលខុសត្រូវខ្ពស់របស់អ្នកកែម្នាក់ៗ ។
២. បង្កើតគណៈកម្មការត្រួតពិនិត្យបច្ចេកទេសកំណែ ដែលមានសមាសភាពជាអធិការមធ្យមសិក្សាតាមមុខវិជ្ជាឯកទេស ជាអ្នកនិពន្ធសៀវភៅសិក្សារបស់ក្រសួង និងជាគ្រូរបស់គ្រឹះស្ថានបណ្តុះបណ្តាលគ្រូ ហើយមានភារកិច្ចត្រួតពិនិត្យអត្រាកំណែ និងការកែកិច្ចបេក្ខជន ប្រសិនបើរកឃើញថា ការកែរបស់អ្នកកែណាម្នាក់មានភាពមិនត្រឹមត្រូវ គណៈកម្មការនេះមានសិទ្ធិបញ្ជាឲ្យកែឡើងវិញ។
៣. បង្កើតគណៈកម្មការកោសល្យវិច័យដើម្បីដោះស្រាយបញ្ហា ក្នុងករណីពិនិត្យឃើញថាមានភាពមិនប្រក្រតីលើកិច្ចការបេក្ខជន និងលើការអនុវត្តភារកិច្ចរបស់គណៈមេប្រយោគ និងគណៈកម្មការផ្សេង។
៤. បន្តសហការជាមួយអង្គភាពប្រឆាំងអំពើពុករលួយ ក្នុងការសង្កេតការណ៍នៅដំណើរការកំណែនេះ ដោយបំពាក់កាមេរ៉ាសុវត្ថិភាពនៅតាមបន្ទប់កំណែ និងបន្ទប់ចុះអក្សរសម្ងាត់ នៅតាមមណ្ឌលកំណែ។
សូមបញ្ជាក់ថា ក្រសួងអប់រំបានចាត់មន្ត្រីអប់រំ ចំនួន ១១២០៥នាក់ សម្រាប់ដំណើរការអត្រាកំណែវិញ្ញាសាបាក់ឌុប ចាប់ពីថ្ងៃទី២៧ សីហា ដល់ថ្ងៃទី៣ខែកញ្ញា នៅមណ្ឌលអត្រាកំណែចំនួន៩មណ្ឌល នៅរាជធានីភ្នំពេញ។ បន្ទាប់ពីអត្រាកំណែវិញ្ញាសារួច ដំណើរការស្រង់បូកពិន្ទុដោយកុំព្យូទ័រនឹងប្រព្រឹត្តឡើងចាប់ពី ថ្ងៃទី៣ខែកញ្ញា ដល់ថ្ងៃទី១៣ ខែកញ្ញា។
លទ្ធផលប្រឡងសញ្ញាបត្រមធ្យមសិក្សា ទុតិយភូមិ នឹងត្រូវប្រកាសនៅរសៀលនៅថ្ងៃទី១៥ ខែកញ្ញា សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្តាល និងនៅថ្ងៃទី១៦ ខែកញ្ញា សម្រាប់មណ្ឌលប្រឡងនៅតាមបណ្តាខេត្តទាំង២៣ទៀត ព្រមទាំង ផ្សព្វផ្សាយតាមហេ្វសប៊ុកផ្លូវការក្រសួងអប់រំ យុវជន និងកីឡា www.facebook.com/ moeys.gov.kh ៕
Tag:
អប់រំ ប្រឡង បាក់ឌុប
© រក្សាសិទ្ធិដោយ thmeythmey.com