ជាតិ
សង្គមជាតិ
បាក់ឌុប៖ ក្រសួងអប់រំចាត់មន្ត្រីជាង ៣ម៉ឺននាក់ ដើម្បីរៀបចំដំណើរប្រឡង និងកំណែវិញ្ញាសា
× ភ្នំពេញ៖ មន្ត្រីអប់រំជាង ៣ម៉ឺននាក់បានរៀបចំដំណើរការប្រឡង និងកំណែវិញ្ញាសាប្រឡងសញ្ញាបត្រមធ្យមសិក្សាទុតិយភូមិឆ្នាំ ២០១៥។ នេះបើតាមប្រសាសន៍របស់អ្នកនាំពាក្យក្រសួងអប់រំ យុវជន និងកីឡា។ ក្រសួងចំណាយថវិកាជាង ៣លានដុល្លារអាមេរិក តិចជាងឆ្នាំមុនដែលចំណាយអស់ជាង ៤លានដុល្លារ ស្របពេលបេក្ខជនចុះឈ្មោះប្រឡងក៏មានតិចជាងឆ្នាំមុនដែរ។
អ្នកនាំពាក្យក្រសួង អប់រំ លោក រស់ សាលីន បានប្រាប់សារព័ត៌មានថ្មីៗថា ក្នុងដំណើរការប្រឡងបាក់ឌុបឆ្នាំ២០១៥ នៃកំណែទម្រង់ប្រព័ន្ធអប់រំឆ្នាំទីពីរ ក្រសួងបានចាត់មន្ត្រីអប់រំចំនួន ១២០៤៥ នាក់ សម្រាប់រៀបចំដំណើរការប្រឡង និងមន្ត្រីចំនួន ១១២០៥នាក់ទៀត សម្រាប់រៀបចំដំណើរការអត្រាកំណែវិញ្ញាសា រីឯមន្ត្រី ៥៨៧នាក់ទៀត រៀបចំដំណើរការប្រកាសលទ្ធផល។ «ចំនួនមន្ត្រីអប់រំរៀបចំដំណើការប្រឡង និងអត្រាកំណែឆ្នាំនេះ ដូចគ្នានឹងដំណើរការកំណែទម្រង់ការប្រឡងឆ្នាំមុនដែរ»។ លោក រស់ សាលីន មានប្រសាសន៍បញ្ជាក់។
កន្លងទៅ ក្រសួងអប់រំបានចេញវិធានការ ដើម្បីពង្រឹងដំណើរការប្រឡង និងអត្រាកំណែវិញ្ញាសាបាក់ឌុប ដោយក្រសួងអប់រំធានាការប្រឡងបាក់ឌុប ប្រព្រឹត្តទៅតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។
ចំពោះដំណើរការអត្រាកំណែចាប់ផ្តើមពីថ្ងៃទី២៧ សីហា ដល់ថ្ងៃទី៣ខែកញ្ញា នៅមណ្ឌលអត្រាកំណែចំនួន ៩មណ្ឌល ក្រសួងចេញវិធានការរឹតបន្តឹងចំនួន ៤ចំណុច រួមមាន ទី១,បំប៉នអ្នករៀបចំអក្សរសម្ងាត់ អ្នកកាត់ក្បាលសន្លឹកកិច្ចការ រក្សាបានភាពសម្ងាត់របស់បេក្ខជន និងពន្យល់យន្ធការមណ្ឌលកំណែដែលមានស្រាប់ទាំងផ្នែកបច្ចេកទេស និងរដ្ឋបាល សំដៅធ្វើឲ្យការកែមានសុក្រឹត និងការទទួលខុសត្រូវខ្ពស់របស់អ្នកកែម្នាក់ៗ។
ទី២, បង្កើតគណៈកម្មការត្រួតពិនិត្យបច្ចេកទេសកំណែ ដែលមានសមាសភាពជាអធិការកិច្ចមធ្យមសិក្សាតាមមុខវិជ្ជាឯកទេស ជាអ្នកនិពន្ធសៀវភៅសិក្សារបស់ក្រសួង និងជាគ្រូរបស់គ្រឹះស្ថានបណ្តុះបណ្តាលគ្រូ ហើយមានភារកិច្ចត្រួតពិនិត្យអត្រាកំណែ និងការកែកិច្ចបេក្ខជន ប្រសិនបើរកឃើញថា ការកែរបស់អ្នកកែណាម្នាក់មានភាពមិនត្រឹមត្រូវ គណៈកម្មការនេះមានសិទ្ធិបញ្ជាឲ្យកែឡើងវិញ។ ទី៣, បង្កើតគណៈកម្មការកោសល្យវិច័យដើម្បីដោះស្រាយបញ្ហា ក្នុងករណីពិនិត្យឃើញថាមានភាពមិនប្រក្រតីលើកិច្ចការបេក្ខជន និងលើការអនុវត្តភារកិច្ចរបស់គណៈមេប្រយោគ និងគណៈកម្មការផ្សេង។ និងទី៤, បន្តសហការជាមួយអង្គភាពប្រឆាំងអំពើពុករលួយ ក្នុងការសង្កេតការណ៍នៅដំណើរការកំណែនេះ ដោយបំពាក់កាមេរ៉ាសុវត្ថិភាពនៅតាមបន្ទប់កំណែ និងបន្ទប់ចុះអក្សរសម្ងាត់ នៅតាមមណ្ឌលកំណែ។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជាក្នុងឆ្នាំ២០១៥នេះ ក្រសួងចំណាយថវិកាជាង ៣លានដុល្លារអាមេរិក តិចជាងឆ្នាំមុនដែលចំណាយអស់ជាង ៤ លានដុល្លារ ស្របពេលបេក្ខជនចុះឈ្មោះប្រឡងក៏មានតិចជាងឆ្នាំមុនដែរ។ ទាំងថ្នាក់វិទ្យាសាស្ដ្រ និងថ្នាក់វិទ្យាសាស្ដ្រសង្គម មានបេក្ខជនប្រឡងសរុបចំនួន ៨៨,៤៨៨ នាក់ និងមានមណ្ឌលប្រឡង ១៤៩មណ្ឌល ចែកជា ៣,៥៧៦បន្ទប់ នៅរាជធានីខេត្ដទាំង ២៥។
លទ្ធផលនៃការប្រឡងនឹងត្រូវប្រកាសនៅថ្ងៃទី ១៥ ខែកញ្ញា សម្រាប់មណ្ឌលក្នុងរាជធានីភ្នំពេញ និងខេត្តកណ្តាល និងនៅថ្ងៃទី ១៦ ខែកញ្ញា តាមបណ្តាមណ្ឌលក្នុងខេត្តទាំង ២៣ ៕
© រក្សាសិទ្ធិដោយ thmeythmey.com