ជាតិ
លោក កឹម គុណវឌ្ឍ ពន្យល់មូលហេតុដែលទ.ទ.ក ផ្សាយផ្ទាល់ព្រឹត្តិការណ៍ផ្ទៀងផ្ទាត់ផែនទី ក្រុមការងារ ទទក នៅវិមានសន្តិភាព
× ខុសពីការផ្ទៀងផ្ទាត់ផែនទីដែលត្រូវបានធ្វើជាមួយមន្ត្រីអង្គការសហប្រជាជាតិ ពិធីផ្ទៀងផ្ទាត់ផែនទីផ្លូវការរបស់រដ្ឋាភិបាលកម្ពុជា ជាមួយផែនទីដែលរក្សាដោយប្រទេសបារាំង ត្រូវបានផ្សាយផ្ទាល់តាមទូរទស្សន៍ និងវិទ្យុជាតិនៅព្រឹកថ្ងៃទី៣កញ្ញានេះ។ លើសពីនេះ ទូរទស្សន៍ និងវិទ្យុឯកជនជាច្រើនទៀតដែលមានសម្មានចិត្តចំពោះរដ្ឋាភិបាលដឹកនាំដោយគណបក្សប្រជាជនកម្ពុជា បានសហការផ្សព្វផ្សាយបន្តព្រឹត្តិការណ៍ផ្ទៀងផ្ទាត់ផែនទីពីទូរទស្សន៍ជាតិកម្ពុជាទៀតផង។
សម្រាប់លោក កឹម គុណវឌ្ឍ អគ្គនាយកនៃទូរទស្សន៍ជាតិកម្ពុជា ព្រឹត្តិការណ៍នៃការផ្ទៀងផ្ទាត់ផែនទីនៅព្រឹកថ្ងៃទី៣កញ្ញា គឺជាព្រឹត្តិការណ៍ពិសេសមួយ ពីព្រោះ ពលរដ្ឋខ្មែរគ្រប់ៗរូបចង់ដឹងថា តើផែនទីគូសក្នុងសម័យបារាំងកាន់កាប់ឥណ្ឌូចិន និងកាន់កាប់កម្ពុជា វាមានរូបរាង ជាក់ស្តែងពិតយ៉ាងដូចម្តេច? លោកអគ្គនាយករូបនេះបញ្ជាក់បន្ថែមប្រាប់សារព័ត៌មានថ្មីៗយ៉ាងដូច្នេះ៖ «គឺដោយមូលហេតុដ៏សំខាន់នេះហើយ បានជារាជរដ្ឋាភិបាល ចង់បង្ហាញដោយចំហរជាសាធារណៈជូនប្រជាពលរដ្ឋ និងគ្រប់មជ្ឈដ្ឋានជាតិ-អន្តរជាតិ ឲ្យដឹង ឲ្យឃើញ និងយល់ថា ផែនទីដែលរាជរដ្ឋាភិបាលប្រើជាផ្លូវការ និងស្របច្បាប់ ក្នុងការកំណត់ព្រំដែនជាមួយប្រទេសវៀតណាម គឺដូចគ្នាទៅនឹងផែនទីដើមដែលបារាំងបានគូស និងដែលត្រូវបានផលិតដោយក្រុមភូមិសាស្ត្រឥណ្ឌូចិន»។
គឺដោយមានលក្ខណៈសំខាន់ពិសេស និងជាប្រវត្តិសាស្ត្រយ៉ាងដូច្នេះហើយ ទើបបានជាទូរទស្សន៍ជាតិកម្ពុជា ចាំបាច់ត្រូវផ្សាយផ្ទាល់ ហើយក៏មានការចូលរួមគាំទ្រ ពីវិទ្យុ ទូរទស្សន៍ នានាចូលរួមផ្សាយបន្តនៅព្រឹកថ្ងៃទី៣កញ្ញានេះ។ នេះបើតាមការអះអាងរបស់លោក កឹម គុណវឌ្ឍ ដោយបន្តថា បារាំងបាននៅកម្ពុជា និងនៅតំបន់ឥណ្ឌូចិនប្រមាណ១ទស្សវត្សរ៍ហើយ ដូច្នេះសម្រាប់លោក គឺមានតែបារាំងទេ ទើបអាចបញ្ជាក់ថា ផែនទីកម្ពុជាមានសណ្ឋាន និងលក្ខណៈភូមិសាស្ត្រដូចម្តេច៕
© រក្សាសិទ្ធិដោយ thmeythmey.com