ជាតិ
សង្គមជាតិ
លោក ស ខេង បញ្ជានគរបាលឲ្យពង្រឹងច្បាប់ចរាចរណ៍
× ភ្នំពេញ៖ រដ្ឋមន្ត្រីក្រសួងមហាផ្ទៃលោក ស ខេង បានបញ្ជាដល់កម្លាំងនគរបាលចរាចរណ៍ទូទាំងប្រទេស បង្កើនការអនុវត្តច្បាប់ចរាចរណ៍ ពិសេសគឺ បទល្មើសចរាចរណ៍ជាក់ស្តែង។ នេះបើយោងតាមការផ្សាយរបស់អគ្គស្នងការដ្ឋាននគរបាលជាតិ។ លោកថ្លែងបែបបនេះ ក្នុងពិធីជួបសំណេះសំណាលជាមួយកងកម្លាំងនគរបាលចរាចរណ៍កាលពីថ្ងៃទី២ កញ្ញា នៅមជ្ឈមណ្ឌលកោះពេជ្រ។
រដ្ឋមន្ត្រីក្រសួងមហាផ្ទៃបានបញ្ជាស្នងការនគរបាលទាំងអស់ ឲ្យរាយការណ៍ការអនុវត្តន៍ការងាររបស់កងកម្លាំងនគរបាលឲ្យបានច្បាស់លាស់ ជៀសវាងបង្កភាពអយុត្តិធម៌ដល់នគរបាលដែលខិតខំអនុវត្តច្បាប់។ លោក ស ខេង និយាយលើកទឹកចិត្តដល់កម្លាំងនគរបាលថា ក្រសួងនឹងតំឡើងឋានន្តរសក្តិ ឬមុខតំណែងដល់កម្លាំងនគរបាលចរាចរណ៍ដែលព្យាយាមពង្រឹងការអនុវត្តច្បាប់ និងគោរពបទបញ្ជា វិន័យបានត្រឹមត្រូវ។ ដោយឡែកនគរបាលមិនគោរពវិន័យ និងបង្កកំហុសនោះ ក្រសួងនឹងមិនផ្តល់ការលើកទឹកចិត្តឡើយ។
ក្នុងឱកាសនោះ លោក រុន រ័ត្នវាសនា ប្រធាននាយកដ្ឋាននគរបាលចរាចរណ៌និងសណ្តាប់ធ្នាប់សាធារណៈ ថ្លែងថា នគរបាលនឹងបន្តរឹតបន្តឹងច្បាប់ចរាចរណ៍ ស្របពេលច្បាប់ចរាចរណ៍ថ្មី នឹងត្រូវប្រកាសអនុវត្តជាផ្លូវការនៅថ្ងៃទី១ ខែមករា ឆ្នាំ២០១៦ខាងមុខ។ លោកថា កងកម្លាំងចរាចរណ៍នឹងចុះធ្វើសកម្មភាពជាប់ជាប្រចាំនៅតាមដងផ្លូវ ហើយនគរបាលនឹងដាក់រថយន្តប្រដេញតាមឃាត់អ្នកល្មើសច្បាប់ នៅតាមដងផ្លូវជាតិសំខាន់ៗមួយចំនួន រួមមាន ផ្លូវជាតិលេខ១ លេខ ៤ លេខ ៥៕
© រក្សាសិទ្ធិដោយ thmeythmey.com