អន្តរជាតិ
អាមេរិកបារម្ភពីសក្តានុពលយោធារុស្ស៊ីក្នុងទឹកដីស៊ីរី
× ក្រសួងការបរទេសអាមេរិកបានប្រកាសនៅថ្ងៃសៅរ៍ម្សិលមិញថា ប្រមុខការទូត ចន ឃែររី បានទូរសព្ទទៅប្រមុខការទូតរុស្ស៊ី ស៊ែរហ្កី ឡាវ្រូវ ដើម្បីបង្ហាញពីការបារម្ភរបស់លោក ប្រសិនបើកងទ័ពរុស្ស៊ីធ្វើសកម្មភាពជាយថាហេតុណាមួយ ក្នុងទឹកដីស៊ីរី។ ដោយឡែក ផ្នែកការទូតរុស្ស៊ីបានលើកឡើងថា ប្រមុខការទូតទាំង២ មិនបានជជែកក្នុងន័យនេះទេ តែជជែកពីការប្រយុទ្ធនឹងក្រុមជីហាតរដ្ឋអ៊ីស្លាមទៅវិញទេ។
យោងតាមក្រសួងការបរទេសអាមេរិក លោកឃែររី បានប្រាប់លោកឡាវ្រូវថា បើសិនជាព័ត៌មានដែលលើកឡើងថា សក្តានុពលយោធារុស្ស៊ីកំពុងតែកើនឡើងក្នុងទឹកដីស៊ីរី ពិតជាព័ត៌មានពិតប្រាកដ នោះសកម្មភាពយោធារុស្ស៊ីនៅស៊ីរី អាចនឹងសម្លាប់មនុស្សស្លូតត្រង់ច្រើនថែមទៀត ហើយក៏អាចនឹងធ្វើអោយមានជនភៀសខ្លួនតាមទូកកាន់តែច្រើនដែរ។ លើសពិនេះ រុស្ស៊ីក៏អាចប្រឈមនឹងប្រទេសសម្ព័ន្ធមិត្ត ដែលកំពុងប្រយុទ្ធជាមួយក្រុមរដ្ឋអ៊ីស្លាម នៅស៊ីរីដែរ។
បើយោងតាមក្រសួងការបរទេសរុស្ស៊ីវិញ លោកចន ឃែររីពិតជាបានទូរសព្ទទៅលោក ស៊ែរហ្កី ឡាវ្រូវមែន តែមិនបាននិយាយគ្នាដូច្នេះទេ។ បុរសទាំង២បានជជែកគ្នាពីរឿងប្រយុទ្ធប្រឆាំងក្រុមជីហាតនៅស៊ីរីទៅវិញទេ។ ផ្នែកការទូតរុស្ស៊ីលើកឡើងទៀតថា ប្រមុខការទូតឃែររី និងឡាវ្រូវ បានជជែកគ្នាពីកិច្ចសហប្រតិបត្តិការរវាងក្រុងម៉ូស្គូ និងក្រុងវ៉ាស៊ីនតោន ក្នុងការគាំទ្រអង្គការសហប្រជាជាតិអោយជំរុញអោយមានដំណើរការនយោបាយនៅស៊ីរី។
ដោយឡែក កាលពីថ្ងៃសុក្រ ប្រធានាធិបតីពូទីន បានលើកឡើងថា ការនិយាយពីការធ្វើសកម្មភាពយោធានៅស៊ីរី គឺហាក់ដូចជាលឿនពេកហើយ ពោលអោយចំ គឺមិនទាន់ដល់ពេលដែលរុស្ស៊ីត្រូវធ្វើសកម្មភាពយោធានៅស៊ីរីទេ ត្បិតថា រុស្ស៊ីបានលក់អាវុធអោយទៅស៊ីរីយូរយារមកហើយក៏ដោយចុះ។ គួរបញ្ជាក់ថា បើរុស្ស៊ីគាំទ្ររដ្ឋាភិបាលលោកអាសាដ នៅស៊ីរី អាមេរិកនិងអារ៉ាប៊ីសាអូឌីត ដែលទើបជួបជជែកគ្នាពីបញ្ហាស៊ីរី ថ្មីៗនេះ បានបង្ហាញបំណងចង់អោយលោកអាសាដ ចុះពីអំណាច៕
© រក្សាសិទ្ធិដោយ thmeythmey.com