ជាតិ
សង្គមជាតិ
×![]()
ដោយ: ថ្មីៗ
ភ្នំពេញ៖ ជំនន់ទឹកភ្លៀងនៅរាជធានីភ្នំពេញ បានធ្វើឲ្យជាងជួសជុលម៉ូតូបីកន្លែងផ្សេងគ្នា មានភាពសប្បាយរីករាយយ៉ាងខ្លាំង ព្រោះតែខ្លួនអាចទទួលបានថវិកាកាន់តែច្រើននៅពេលទឹកលិចក្រុងម្តងៗ ។ នេះគឺជាការលើកឡើងរបស់ជាងជួសជុលម៉ូតូនៅផ្សារអូឬស្សី ផ្សារដើមគ និងផ្សារកណ្ដាល។ ក្នុងចំណោមកន្លែងជួសជុលបីកន្លែង មានយ៉ាងតិចម៉ូតូចំនួនជាង២០០គ្រឿងបានចូលជួសជុលព្រោះ ដោយសារលិចទឹកភ្លៀងកាលពីថ្ងៃទី០៣ ខែកញ្ញាកន្លងទៅនេះ។
មានសំលៀកបំពាក់ប្រលាក់ដោយប្រេងម៉ាស៊ីន ជាងជួសជុលម៉ូតូមួយរូប នៅម្ដុំផ្សារអូឬស្សីបានលើកឡើងថា បន្ទាប់ពីមេឃភ្លៀងខ្លាំងម្ដងៗ រូបគាត់ពិតជាមានការមមារញឹកយ៉ាងខ្លាំង ព្រោះតែមានអតិថិជនចូលមកជួសជុលម៉ូតូយ៉ាងច្រើនខុសពីថ្ងៃធម្មតា។ ជាងម៉ូតូរូបនេះបាននិយាយថា ឲ្យតែមានភ្លៀងខ្លាំងម្ដងៗកន្លែងរបស់គាត់មានយ៉ាងតិចណាស់ម៉ូតូជាង៦០គ្រឿង បានចូលមកកន្លែងរបស់គាត់។
មិនខុសពីជាងនៅម្ដុំផ្សារអូឬស្សីឡើយ លោក សុវណ្ណ ជាងជួសជុលម៉ូតូនៅផ្សារកណ្ដាលបានលើកឡើងថា នៅកន្លែងរបស់គាត់គឺពិតជារវល់ខ្លាំងណាស់ នៅពេលមានភ្លៀងខ្លាំងម្ដងៗ ក្នុងរាជធានីភ្នំពេញ។ លោកថានៅថ្ងៃធម្មតា នៅកន្លែងគាត់មានម៉ូតូចូលមកជួសជុលប្រមាណ២០គ្រឿងក្នុងមួយថ្ងៃ តែនៅពេលមានភ្លៀងខ្លាំង ដូចជាថ្ងៃទី០៣ កញ្ញានេះមានយ៉ាងតិចម៉ូតូជិត៧០គ្រឿង។ លោកមានការសប្បាយចិត្តព្រោះ មានអតិថិជនកាន់តែច្រើន ធ្វើឲ្យលោកកាន់តែទទួលបានប្រាក់ចំណូលកាន់ច្រើន។
ចំណែកឯជាងជួសជុលមួយរូបទៀតនៅផ្សាដើមគ ដែលកំពុងតែជួសជុលយ៉ាងសកម្ម ដោយសារមានម៉ូតូខូចដែលត្រូវជួសជុល ។ ខោអាវប្រឡាក់សុទ្ធតែប្រេងមាស៊ីន លោក ប្រាជ ប៊ុនចិន បានមានប្រសាសន៍ថា លោកសប្បាយចិត្តពេលមានម៉ូតូចូលមកធ្វើច្រើននៅកន្លែងរបស់លោក។ ពេលមានភ្លៀងម្ដងៗកន្លែងរបស់លោកទទួលអតិថិជនយ៉ាងហោចណាស់៦០ ទៅ៧០គ្រឿងក្នុងមួយថ្ងៃ ដែលធ្វើឲ្យលោកមានចំណូលយ៉ាងច្រើន។
លើកឡើងស្រដៀងៗគ្នាផងដែរ ជាងជួសជុលទាំងអស់គ្នា បានមាននិយាយដូចៗគ្នាថា លោកសប្បាយចិត្ត នៅពេលមានអតិថិជនចូលមកធ្វើម៉ូតូបានច្រើន តែពួកគាត់មិនមែនចង់ឲ្យមានភ្លៀងខ្លាំងលិចក្រុងរាល់ថ្ងៃនោះទេ។ ព្រោះពេលមេឃភ្លៀងម្ដងៗលោកក៏មានការលំបាកដូចគ្នា ផ្ទះរបស់គាត់ត្រូវទឹកលិច ហើយម៉ូតូរបស់គាត់ក៏ធ្លាប់ខូចដោយសារទឹកលិចដែរ។
គួរបញ្ជាក់ថា កន្លែងជួសជុលតែបីកន្លែងមានម៉ូតូចូលធ្វើរហូតដល់ជាង២០០ម៉ូតូ ចុះបើទូទាំងរាជធានីភ្នំពេញតើមានប៉ុន្មាន? ម៉ូតូមួយគ្រឿងត្រូវចំណាយប៉ុន្មាន? នៅពេលមេឃភ្លៀងម្ដងៗធ្វើឲ្យសេដ្ឋកិច្ចគ្រួសាររបស់ប្រជាពលរដ្ឋក្រីក្រនៅរាជធានីភ្នំពេញកាន់តែជួបការលំបាក។ ជាពិសេសគឺ អ្នករត់ម៉ូតូឌុប អ្នករត់រ៉ឺម៉កកង់បី សិស្សនិស្សិត និងប្រជាជនទូទៅកាន់តែជួបការលំបាកកាន់តែខ្លាំង ពោលគឺមិនមែនជារឿងចំណេញសម្រាប់ប្រជាជននោះទេ។ ទឹកលិចក្រុងបានធ្វើឲ្យមានការខាតបង់ជាច្រើនឥតគណនា។
© រក្សាសិទ្ធិដោយ thmeythmey.com
