ជាតិ
សង្គមជាតិ
ហេ្វសប៊ុកកំពុងទាញផលិតភាពសេដ្ឋកិច្ចខ្មែរឲ្យធ្លាក់ចុះ!
× ភ្នំពេញ៖ មកដល់សតវត្សទី២១នេះ ហ្វេសប៊ុកដើរតួនាទីសំខាន់ក្នុងការទំនាក់ទំនងគ្នា។ ទន្ទឹមនឹងមានផលប្រយោជន៍ ហ្វេសប៊ុក ក៏បានធ្វើឲ្យខាតបង់សេដ្ឋកិច្ចមិនតិចទេ ដោយសារ ការប្រើប្រាស់មិនត្រឹមត្រូវ និងមិនចំទិសដៅ។ តើអ្វីខ្លះជាគុណសម្បត្តិ និងអ្វីខ្លះជាគុណវិបត្តិនោះ?
សូមអញ្ជើញស្តាប់បទអត្ថាធិប្បាយរបស់លោក រ៉ឹម ភារី៖
កាលពីសម័យបុរាណ ដើម្បីទំនាក់ទំនង ឬផ្ញើឯកសារ គឺត្រូវប្រើអ្នកនាំសារ ជាមនុស្សក្តីឬសត្វព្រាបក្តី ដើម្បីនាំដំណឹង ឬសារ ទៅឲ្យអ្នកដែលនៅឆ្ងាយ។ កាលណោះ គេត្រូវប្រើពេលវេលាយូរ និងប្រាក់កាសយ៉ាងច្រើន ដើម្បីធ្វើកិច្ចការទាំងនេះ។ ប៉ុន្តែមកដល់បច្ចុប្បន្ននេះ ប្រព័ន្ធទំនាក់ទំនង ចាប់ផ្តើមរីកចម្រើនគួរឲ្យកត់សម្គាល់ដែលធ្វើឲ្យការទំនាក់របស់មនុស្ស កាន់តែងាយស្រួល។ ការបង្កើតទូរស័ព្ទ អ៊ីម៉ែល និងហ្វេសប៊ុកជាដើម គឺធ្វើឲ្យមានភាពងាយស្រួលក្នុងការទំនាក់ទំនង និងធ្វើការងាររបស់ស្ថាប័នផ្សេង។
មិនខុសគ្នាទេ នៅកម្ពុជាមានប្រជាជនជាយុវជនភាគច្រើនបានប្រើប្រាស់ប្រព័ន្ធហ្វេសប៊ុក ដើម្បីទំនាក់ និងធ្វើការងារ។ លើសពីនេះ ហ្វេសប៊ុក បានក្លាយជាឧបករណ៍ដ៏ល្អបំផុត សម្រាប់ផ្សព្វផ្សាយពាណិជ្ជកម្ម ពិភាក្សាពីបញ្ហាសង្គម និងនយោបាយ ព្រមទាំងងាយស្រួលក្នុងបង្កើតទំនាក់ទំនងគ្នាពីមនុស្សម្នាក់ទៅមនុស្សម្នាក់ឬ ក្រុមមួយទៅក្រុមមួយទៀត។ ស្របពេលដែលហ្វេសប៊ុកមានផលប្រយោជន៍ ហ្វេសប៊ុកក៏បានធ្វើឲ្យកម្ពុជាខាតបង់សេដ្ឋកិច្ចមិនតិចដែរ។ គ្រូបង្រៀន ប្រើហ្វេសប៊ុកពេលកំពុងបង្រៀន តំណាងរាស្ត្រប្រើហ្វេសប៊ុកពេលកំពុងប្រជុំ មន្ត្រីរដ្ឋាភិបាលប្រើហ្វេសប៊ុកក្នុងម៉ោងធ្វើការ បុគ្គលិករដ្ឋ និងឯកជនប្រើប្រាស់ហ្វេសប៊ុកពេលកំពុងបំពេញការងារជាដើម។
ការប្រើប្រាស់ហ្វេសប៊ុកក្នុងខណៈដែលកំពុងធ្វើការ ឬក្នុងម៉ោងការងារ វាបានធ្វើឲ្យខាតបង់កម្លាំងផលិតកម្ម របស់ស្ថាប័ន ឬក្រុមហ៊ុន និងវាធ្វើឲ្យមានភាពកម្សោយនៃផលិតភាពការងារយ៉ាងច្រើនទៀតផង។ មិនត្រឹមតែធ្វើឲ្យខាតបង់ផ្នែកសេដ្ឋកិច្ចប៉ុណ្ណោះទេ តែហ្វេសប៊ុកក៏បានធ្វើឲ្យបាត់បង់សេចក្តីថ្លៃថ្នូរបស់មនុស្សផងដែរ។ នៅពេលជួបជុំគ្នាម្តងៗ ដូចជា មិត្តភក្តិ បងប្អូន និងក្រុមគ្រួសារជាដើម យុវជនខ្លះ បានដកទូរសព្ទទំនើប ដើម្បីលេងហ្វេសប៊ុកដោយមិនបានខ្វល់ពីទំនាក់ទំនាក់ជាមួយសាច់ញ្ញាតិឡើយ។ ឥរិយាបថនេះ បានក្លាយជាទម្លាប់មិនល្អទៅហើយ សម្រាប់យុវជនខ្មែរមួយចំនួន ។ រីឯសិស្សនិស្សិតមួយចំនួនធំផ្សេងទៀត ពួកគេតែងតែប្រើប្រាស់ហ្វេសប៊ុកពេលកំពុងសិក្សា។ កាយវិការបែបនេះ បានធ្វើឲ្យសិស្ស និងគ្រូបង្រៀន មិនអាចផ្ទេរ និងទទួលចំណេះដឹងពីគ្នាទៅវិញទៅមក។
ប្រសិនបើ៤មនុស្សត្រូវចំណាយពេលមួយថ្ងៃ ពី២ទៅ៣ម៉ោង ក្នុងពេលធ្វើការ ដើម្បីប្រើប្រាស់ហ្វេសប៊ុក នោះក្រុមហ៊ុនឯកជន សា្ថប័នរដ្ឋ រោងចក្រ សហគ្រាស និងសិប្បកម្មជាដើម នឹងត្រូវខាតបង់ច្រើនលានដុល្លារអាមេរិក ដោយសារតែបរិមាណផលិតកាន់តែតិច គុណភាពកាន់ថយចុះ ទីបំផុត ប្រាក់ចំណូលក៏ធ្លាក់ចុះ ទៅតាមនោះដែរ។ ហើយបើប្រទេសមួយ មានមនុស្សកាន់តែច្រើនចំណាយពេលលេងហ្វេសប៊ុកកាន់តែយូរ នោះសេដ្ឋកិច្ចជាតិទាំងមូល នឹងត្រូវធ្លាក់ចុះជាស្វ័យប្រវត្តិ។ រហូតមកដល់ពេលនេះ គេគ្មានតួលេខចំនួនអ្នកប្រើប្រាស់បណ្តាញសង្គមហេ្វសប៊ុកពិតប្រាកដមែន។ ប៉ុន្តែ តាមការប៉ាន់ស្មានខ្លះ ចំនួនអ្នកប្រើប្រាស់បណ្តាញសង្គមហ្វេសប៊ុក អាចមានចំនួនជាង១លាននាក់។ ប្រសិនបើមនុស្សម្នាក់ចំណាយពេលលេងហ្វេសប៊ុកពី២ទៅ៣ម៉ោងដោយគេចវេះពីការងារ ពេលនោះ ផលិតភាពការងារនឹងធ្លាក់ចុះខ្លាំង ហើយសង្គមជាតិទាំងមូល ទាំងវិស័យឯកជន ទាំងរដ្ឋ ខាតបង់ថវិកាជាតិរាប់រយលានដុល្លារក្នុងមួយឆ្នាំៗដោយសារតែការលេងបណ្តាញហ្វេសប៊ុកអត់ប្រយោជន៍។
ជាការពិត ហ្វេសប៊ុក បានផ្តល់អត្ថប្រយោជន៍ដល់អ្នកប្រើប្រាស់យ៉ាងច្រើន ប៉ុន្តែវាក៏បាន បង្កើតគុណវិបត្តិជាច្រើនដល់អ្នកប្រើប្រាស់ ក្នុងករណីអ្នកប្រើប្រាស់ មិនបានប្រើឲ្យត្រូវពេលវេលា និងចេះទាញប្រយោជន៍វានោះ។
ដូច្នេះ ចាប់ពីពេលនេះតទៅ ប្រជាពលរដ្ឋខ្មែរគួរផ្លាស់ប្តូរទម្លាប់មិនល្អទាំងនេះ ឲ្យអស់ពីសង្គមខ្មែរ ព្រោះបើទម្លាប់ទាំងនេះនៅតែមានច្រើន វានឹងទាញទម្លាក់ ឬពន្យឺតកំណើនសេដ្ឋកិច្ចជាតិដែលកំពុងតែកើនឡើងនេះ ជាក់ជាពុំខានឡើយ៕
Tag:
សង្គម
សេដ្ឋកិច្ច
ផលិតភាព
© រក្សាសិទ្ធិដោយ thmeythmey.com