អន្តរជាតិ
សហរដ្ឋអាមេរិក ៖ លោកតាម្នាក់ត្រូវវះដាក់ម្រាមដៃក្រោមស្បែកពោះ បីសប្តាហ៍
×![]()
ដោយ: ធីតា
លោកតាម្នាក់អាយុ ៨៧ ឆ្នាំរស់នៅរដ្ឋ Texas ត្រូវវះកាត់ដាក់ម្រាមដៃរលាកក្រោមស្បែកពោះរយៈពេលបីសប្តាហ៍ ដើម្បីប្រើប្រាស់បានដូចដើមវិញ។
ម្រាមដៃត្រូវផ្សាំទៅក្នុងពោះ នេះគឺជាបច្ចេកវិទ្យាដ៏កម្របានឃើញមួយ។ បចេ្ចកទេសនេះនឹងជួយឲ្យលោក Frank Reyes ចៀសផុតពីការកាត់ម្រាមដៃចោល។ នេះមិនមែនជាបច្ចេកវិទ្យាថ្មីទេ វាត្រូវបានគេរកឃើញតាំងពីនៅដើមសតវត្សទី ២០ ក្នុងអំឡុងសម័យសង្គ្រាមលោកលើកទីមួយមកម្ល៉េះ។ លោក Anthony Echo គ្រូពេទ្យវះកាត់ផ្សាំសរីរៈនេះបានពន្យល់ថា៖ « ជួនកាល បច្ចេកទេសថ្មីៗគ្មានប្រសិទ្ធភាពទេ »។ ហេតុនេះ ក្រុមគ្រូពេទ្យនៅមន្ទីរពេទ្យ Houston Methodist រដ្ឋ Texas បានសម្រេចចិត្តប្រើប្រាស់វិធីចាស់នេះ គឺវះដាក់ម្រាមដៃនៅក្រោមស្បែកពោះអ្នកជំងឺ។
រឿងរ៉ាវបានកើតឡើង នៅពេលដែលលោកតា Frank Reyes កំពង់ប្តូរកង់រថយន្ត។ ដែកគ្រីបបានធ្លាក់សង្កត់ដៃរបស់គាត់ជាមួយនឹងឧបករណ៍លោហៈដ៏ក្តៅមួយ រហូតធ្វើឲ្យម្រាមដៃរបស់គាត់ស្ទើរតែជិតឆ្អិនទៅហើយ។ ជាមួយនឹងវិធីចាស់នេះ ដៃមានលទ្ធភាពបង្កើតសរសៃឈាមថ្មីឡើងវិញ។ បើមិនប្រើវិធីនេះទេ អ្នកជំងឺប្រហែលជាត្រូវបាត់បង់ម្រាមដៃទាំងអស់។
ប្រសិទ្ធភាពនៃវិធីនេះបានបង្ហាញឡើងនៅបីសប្តាហ៍ក្រោយ បន្ទាប់ពីការផ្សាំ។ ស្បែកដៃរបស់អ្នកជំងឺបានត្រឡប់មករកសភាពក្មេងឡើងវិញ។ តែគ្រូពេទ្យត្រូវវះកាត់ប្រអប់ដៃជាច្រើនដងទៀត ដើម្បីញែកម្រាមដៃ។ វិធីនេះក៏ត្រូវបានគ្រូពេទ្យជ្រើសរើសប្រើក្នុងករណីផ្សេងទៀតផងដែរ ដូចជាកម្មករចិនម្នាក់បានផ្សាំដៃបាក់ជាមួយនឹងកជើងរបស់ខ្លួនជាដើម៕
Tag:
សហរដ្ឋអាមេរិក
© រក្សាសិទ្ធិដោយ thmeythmey.com
