ប្រាក់ឈ្នួលកម្មករអាចនឹងកើនឡើងទៀត ក្រោយពីបញ្ចប់ការចរចានៅខែតុលា

ជាតិ

សង្គមជាតិ

ប្រាក់ឈ្នួលកម្មករអាចនឹងកើនឡើងទៀត ក្រោយពីបញ្ចប់ការចរចានៅខែតុលា

09, Sep 2015 , 9:06 am

រូបភាព

ដោយ: ម៉ៅ សុផា

ក្រសួងការងារ និងបណ្តុះបណ្តាលវិជ្ជាជីវៈ បានរៀបចំសិក្ខាសាលា ស្តីពីប្រាក់ឈ្នួលអប្បបរមានៅកម្ពុជា ដែលប្រព្រឹត្តទៅ នាពេលព្រឹក ថ្ងៃទី៨ ខែកញ្ញា ឆ្នាំ២០១៥ នៅសណ្ឋាគារភ្នំពេញ។ ក្នុងសិក្ខាសាលានេះ ភាគីរដ្ឋាភិបាល និងភាគីនិយោជិក សុទ្ធតែសម្តែងនូវក្តីសង្ឃឹមយ៉ាងមាំថា ប្រាក់ឈ្នួលអប្បបរមាសម្រាប់កម្មករនៅកម្ពុជា នឹងមានការកើនឡើងទៀត ក្រោយពីបញ្ចប់ការចរចា រវាងភាគីទាំងបី គឺភាគីរដ្ឋាភិបាល ភាគីនិយោជក និងភាគីនិយោជិក។

លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអះអាងថា ប្រាក់ឈ្នួលអប្បបរិមាសម្រាប់កម្មករ ក្នុងវិស័យវាយនភណ្ឌកាត់ដេរ និងផលិតស្បែកជើង នឹងមានការកើនឡើង សម្រាប់ឆ្នាំ២០១៦ ។ ក្នុងពិធីបើកសិក្ខាសាលាស្តីពីប្រាក់ឈ្នួលអប្បបរមានៅកម្ពុជា រដ្ឋមន្ត្រីរូបនេះបញ្ជាក់យ៉ាងដូច្នេះថា៖ «ឡើងគឺពិតជាឡើងហើយ តែឡើងប៉ុន្មានឲ្យពិតប្រាកដនោះ ខ្ញុំមិនទាន់អាចនិយាយបានទេ។ រឿងនេះទុកឲ្យត្រីភាគីជាអ្នកសម្រេច។ យើងសង្ឃឹមថានឹងកើនឡើង ព្រោះដោយសារតែការកើនឡើងនូវប្រាក់ឈ្នួលក្នុងរយៈពេលកន្លងមកនេះ គឺមិនមានការប៉ះពាល់ទៅដល់វិស័យឧស្សាហកម្មកាត់ដេរ»។

ទាក់ទងនឹងបញ្ហាដំឡើងប្រាក់ឈ្នួលនេះ លោក សោម អូន ប្រធានក្រុមប្រឹក្សាសហជីពជាតិកម្ពុជា ក៏បានសម្តែងនូវក្តីសង្ឃឹមយ៉ាងមុតមាំថា ការចរចាសូមដំឡើងប្រាក់ឈ្នួលនេះនឹងទទួលបានជោគជ័យ។ លោកបញ្ជាក់ថា៖ «វេទិកាថ្ងៃនេះ គឺជាឱកាសល្អមួយដែលត្រីភាគីនឹងអាចជជែកគ្នាពីបញ្ហាប្រាក់ឈ្នួល។ ហើយយើងសង្ឃឹមថា ប្រាក់ឈ្នួលកម្មករនឹងកើនឡើង ពីព្រោះយើងបានរៀបចំរួចហើយថា ការចរចាប្រាក់ឈ្នួលត្រូវកើនឡើងរាល់ឆ្នាំ តាំងពីឆ្នាំ២០១៣ មក គ្រាន់តែថា កើនឡើងប៉ុន្មាន យើងមិនទាន់ដឹងច្បាស់។ តែបើតាមការសិក្សា និងការប៉ាន់ស្មាន ខ្ញុំគិតថា ការកើនឡើងនេះនឹងអាចសមរម្យ មិនអន់ជាងឆ្នាំមុនទេ»។

កន្លងមកសមាគមរោងចក្រដាត់ដេរកម្ពុជា (GMAC) បានអះអាងថា ការដំឡើងប្រាក់ឈ្នួលនេះ ជាផលពិបាកមួយសម្រាប់រោងចក្រ និងអាចបណ្តាលឲ្យរោងចក្រមួយចំនួដួល ឬក៏ត្រូវផ្លាស់ប្តូរទៅប្រទេសផ្សេង។ ប៉ុន្តែការអះអាងនេះ ត្រូវបានលោក អាត់ ធន់ តំណាងសហជីពកម្ពុជាចាត់ទុកថា ជាលេសរបស់ភាគីនិយោជក ដែលតែងតែលើកឡើង ក្នុងការចរចាដើម្បីដំឡើងប្រាក់ឈ្នួលដល់កម្មករ។

លោកបញ្ជាក់ថា៖ «ខ្ញុំសូមបញ្ជាក់ផងដែរថា នៅក្នុងដំណើរការនៃការចរចានេះយើងមានបទពិសោធជាង១០ឆ្នាំហើយ។ ដូច្នេះយើងដឹងយ៉ាងច្បាស់ថា និយោជកតែងតែរកលេសគ្រប់បែបយ៉ាងដើម្បីធ្វើឲ្យរំខាន និងជាឧបសគ្គក្នុងការចរចាប្រាក់ឈ្នួល»។តំណាងសហជីពរូបនេះបន្លែមទៀតថា៖ «កាលពីខែកក្កដាកន្លងមក យើងបានប្រជុំពិភាក្សាគ្នា ហើយយើងបានលើកឡើងនូវប្រាក់ឈ្នួលទាបបំផុតត្រឹម ១៧៧ដុល្លារ ដើម្បីចរចាជាមួយភាគីនិយោជក។ តែចំនួនថានឹងបានប៉ុន្មាននោះ យើងមិនទាន់ដឹងទេក្នុងកំឡុងពេលចរចា»។

សូមបញ្ជាក់ថា បច្ចុប្បន្ននេះ ប្រាក់ឈ្នួលកម្មករទាបផុតគឺ ១២៨ដុល្លារ៕