អន្តរជាតិ
រុស្ស៊ី ៖ ក្មេងប្រុសអាយុ ៥ ឆ្នាំពីរនាក់ជីករូងផ្លូវក្រោមដីដើម្បីគេចសាលា
× ក្មេងប្រុសអាយុ ៥ ឆ្នាំពីរនាក់បានជីករូងផ្លូវក្រោមដី ដោយប្រើប៉ែលជីកដីខ្សាច់ ដើម្បីគេចពីសាលាមត្តេយ្យទៅរកទិញរថយន្តទំនើបមួយគ្រឿង នេះបើតាមការចុះផ្សាយរបស់ព័ត៌មានក្នុងស្រុកកាលពីថ្ងៃអង្គារកន្លងទៅនេះ។
ក្មេងប្រុសទាំងពីរបានចាកចេញពីសាលាមត្តេយ្យនៅទីក្រុង Magnitogorsk ប្រទេសរុស្ស៊ី ក្នុងអំឡុងពេលលេងកម្សាន្តនាពេលរសៀល តាមច្រកតូចមួយដែលពួកគេបានជីកអស់រយៈពេលប៉ុន្មានថ្ងៃ ដោយប្រើប៉ែលសម្រាប់កូនក្មេង។ ក្រោយពីចេញផុតពីរបងសាលាហើយ ពួកគេធ្វើដំណើរប្រមាណ ២ គីឡូម៉ែត្រទៅអគារតាំងលក់រថយន្តទំនើប ដើម្បីរកមើលទិញរថយន្តមួយគ្រឿង។
ដោយក្តីសង្ស័យដែលបានឃើញក្មេងទាំងពីរកំពុងសម្លឹងមើលរថយន្តដាក់តាំង ស្ត្រីអ្នកដំណើរម្នាក់ក៏បានពួកគេថា មកពីធ្វើអ្វីនៅទីនោះ។ ពួកគេបានពន្យល់ថា ពួកគេមកទីនោះដើម្បីរកទិញរថយន្តជិះ នេះបើតាមសារព័ត៌មាន The Serian Times ។ យើងមិនដឹងថា តើពួកគេមានប្រាក់ប៉ុន្មានក្នុងហ៊ោប៉ៅនោះទេ។ បន្ទាប់មក ស្ត្រីនោះបាននាំក្មេងទាំងពីរទៅប៉ុស្តិ៍ប៉ូលិស។
អាណាព្យាបាលក្មេងទាំងពីរមិនបានដាក់ពាក្យបណ្តឹងទេ បន្ទាប់ពីឃើញពួកគេទាំងពីរមានសុវត្ថិភាព។ ប៉ុន្តែ អ្នកគ្រូដែលទទួលបន្ទុកមើលថែក្មេងប្រុសទាំងពីរនោះត្រូវបានបណ្តេញចេញពីការងារហើយ៕
© រក្សាសិទ្ធិដោយ thmeythmey.com