ជាតិ
សង្គមជាតិ
អ្នកលក់សាច់ជ្រូកនៅផ្សារលើសៀមរាបរអ៊ូរឿងលក់សាច់ជ្រូកមិនដាច់
សៀមរាប៖ ការផ្ទុះឡើងនូវវត្តមានជំងឺជ្រូកត្រចៀកខៀវនៅក្នុងតំបន់ខ្លះនៃខេត្តសៀមរាបបានធ្វើឲ្យអ្នកលក់សាច់ជ្រូកនៅផ្សារខាតបង់ច្រើន។ ប៉ុន្តែឈ្មួញដើរទិញជ្រូក អាចឆ្លៀតឱកាសចំណេញច្រើនទៅវិញ។
នៅរសៀលថ្ងៃអង្គារនេះ អ្នកលក់សាច់ជ្រូកជាច្រើននៅអង្គុយសម្លឹងមើលដុំសាច់ជ្រូកធំៗ ជើងជ្រូក និងឆ្អឹងជំនីជ្រូក ដែលត្រូវបានព្យូររណោងនៅពីមុខតូប។ មិនមានមនុស្សទិញច្រើនឡើយតាំងពីជាង១សប្តាហ៍មកហើយ ដោយសារពលរដ្ឋភ័យព្រួយពីជំងឺជ្រូកត្រចៀកខៀវ។
បងស្រីម្នាក់ដែលកំពុងអង្គុយលើតូបសាច់ជ្រូករបស់គាត់នៅក្នុងផ្សារលើ បានប្រាប់ថា បើទោះជាគាត់យកតែសាច់ជ្រូកល្អមកលក់ ហើយថាគាត់បានពន្យល់ប្រាប់អតិថិជនរបស់គាត់ថា ទីសត្តឃាតត្រូវបានត្រួតពិនិត្យដោយបសុពេទ្យ ដែលអនុញ្ញាតឲ្យកាប់តែជ្រូកល្អគ្មានជំងឺក៏ដោយ ក៏អតិថិជនរបស់គាត់ភាគច្រើនមិនហ៊ានជាវសាច់ជ្រូកទៀតដែរ។
«រាល់ដងធ្លាប់តែលក់២០០គកក្នុងមួយថ្ងៃ ឥឡូវនេះសាច់ជ្រូក៥០គក លក់មិនអស់ផង»។ នេះជាការបញ្ជាក់របស់បងស្រីអ្នកលក់សាច់ជ្រូកនៅផ្សារលើ។ នៅពេលដែលនិយាយជាមួយអ្នកកាសែតសារព័ត៌មានថ្មីៗ មានអតិថិជនប្រចាំរបស់បងស្រីម្នាក់បានមកទិញជើងជ្រូក។ ឮបងស្រីអ្នកលក់និយាយអំពីពលរដ្ឋលែងហ៊ានបរិភោគសាច់ជ្រូកដោយសារជំងឺជ្រូកត្រចៀកខៀវនោះ ស្ត្រីអតិថិជនក៏បានបន្លឺឡើងប្រាប់ថា ម្តាយគាត់ដែលចិញ្ចឹមជ្រូកលក់នោះ ត្រូវបានឈ្មួញបង្អាប់តម្លៃចុះខ្លាំងរហូតដល់៣០០០រៀលក្នុងមួយគីឡូក្រាម។
បងស្រីអ្នកលក់សាច់ជ្រូក២នាក់ទៀតដែលមានតូបនៅក្បែរគ្នានោះ កំពុងនិយាយរឿងសើចលេង ដើម្បីបញ្ជាក់ថា ពួកគាត់ពិតជាលក់មិនដាច់មែន ហើយមានតែនិយាយគ្នាលេង។
រាល់ដងដែលធ្លាប់លក់ជ្រូកអស់២ទំងន់ពី៧០ ទៅ៨០គីឡូក្រាម នៅថ្ងៃនេះ បងស្រីម្នាក់បានប្រាប់ថា គាត់លក់ជ្រូកទើបតែអស់មួយចំហៀង។ «មានតែលក់ឲ្យស្គាល់គ្នា ឬអ្នកលក់នៅជិតៗគ្នាដែលទុកចិត្តគ្នា។ មានតែអ្នកជិតស្និតគ្នាដែលជឿថា យើងលក់សាច់ល្អ។ ជ្រូកណាមានជំងឺ ខាងកុង្ស៊ី ដុតចោលអស់ហើយ»។ នេះជាការអះអាងរបស់អ្នកលក់សាច់ជ្រូក៕
© រក្សាសិទ្ធិដោយ thmeythmey.com