បទយកការណ៍ / បទសម្ភាសន៍
×![]()
ភ្នំពេញ៖ ជាសិស្សនៅជនបទចុងកាត់មាត់ញក កញ្ញា ប្រសិត លក្ខណា ជាសិស្សនៅវិទ្យាល័យថ្មគោល ស្ថិតក្នុងស្រុកថ្មគោល ខេត្តបាត់ដំបង ដែលទទួលបាននិទ្ទេស A ក្នុងសម័យប្រឡងបាក់ឌុបឆ្នាំនេះ។ ទទួលបាននិទ្ទេសA មិនមែនជាការងាយស្រួលប៉ុន្មានទេ តែកើតឡើងពីការខិតខំប្រឹងប្រែងរៀនសូត្រយ៉ាងយកចិត្តទុកដាក់បំផុត។ ហើយបញ្ហាជីវភាពមិនបានក្លាយជាឧបសគ្គដែលធ្វើឲ្យកញ្ញាទទួលជោគជ័យ ក្នុងការសិក្សានោះទេ។
តទៅនេះសូមស្តាប់បទយកការណ៍របស់លោក រ៉ឹម ភារី៖
កញ្ញា ប្រសិត លក្ខណា ជាសិស្សទទួលបាននិទ្ទេសA នៅឆ្នាំនេះ បានសម្តែងការសប្បាយរីករាយចំពោះលទ្ធផលដ៏ល្អរបស់នាង។ និទ្ទេសA គឺជាក្តីស្រម៉ៃ របស់សិស្សគ្រប់រូបប្រាថ្នាចង់បាន ប៉ុន្តែមិនមែនងាយស្រួលទទួលបាននោះទេ គឺទាមទារឲ្យមានការខិតខំប្រឹងប្រែងខ្លាំង និងអត់ធ្មត់ក្នុងការសិក្សា។ ហើយបញ្ហាជីវភាពក្រីក្រគ្មានលទ្ធភាព មិនជាបញ្ហាធំក្នុងការសិក្សានោះទេ តែឆន្ទៈមុះមុត និងការព្យាយាមឲ្យអស់ពីលទ្ធភាពក្នុងសិក្សា គឺជាឱសថយ៉ាងសក្តិសិទ្ធ ធ្វើឲ្យនាងទទួលបានជោគជ័យ។
កើតក្នុងគ្រូសារជាអ្នកធ្វើស្រែចំការ ឪពុកជាគ្រូបង្រៀន ម្តាយជានាយិកាសាលាបឋមសិក្សា មានជីវភាពមិនជាមានបានប៉ុន្មាននោះទេ។ ទោះបីប្រាក់ខែឪពុកម្តាយតិច មិនមានសម្ភារៈទំនើបប្រើប្រាស់ រៀននៅសាលាជនបទ ខ្វះគ្រូបង្រៀន ខ្វះសម្ភារៈសិក្សា និងតម្រូវការមួយចំនួនក៏ដោយ តែវាមិនមែនជារនាំងរារាំងគោលបំណងរបស់យើងនោះទេ។ យុវជនវ័យ១៨ឆ្នាំរូបនេះអះអាងថា បើទោះបីជាគ្រូសារកញ្ញាជាអ្នកក្រតែការជំរុញពីគ្រួសារគឺជាគន្លឹះធ្វើឲ្យនាងទទួលបានការសិក្សាល្អ«ថ្វីដ្បិតតែគ្រួសារខ្ញុំក្រីក្រ ប៉ុន្តែគាត់ជំរុញខ្ញុំឲ្យខំរៀន គាត់ថាការសិក្សាគឺជាការសំខាន់សម្រាប់កូនៗ ទោះបីជាគាត់ទទួលបានប្រាក់ខែមិនច្រើន តែគាត់ជំរុញឲ្យកូនសិក្សា ហើយខ្ញុំទទួលបានកម្លាំងចិត្តច្រើនពីគ្រួសារ»។
មានស្រុកកំណើត នៅភូមិតាសី ឃុំតាម៉ឺន ស្រុកថ្មគោល ខេត្តបាត់ដំបង កញ្ញាប្រសិត លក្ខណា ឲ្យដឹងថា កម្លាំងចិត្តពីគ្រួសារជារឿងមួយ តែអ្វីដែលធ្វើឲ្យកញ្ញា ទទួលបាននិទ្ទេស A នៅឆ្នាំនេះ គឺការព្យាយាមរៀនដោយខ្លួនឯង និងបាទទួលបានការណែនាំពីគ្រូបង្រៀន។ ហើយគន្លិះដែលសំខាន់នោះគឺការរៀបចំកាលវិភាគដើម្បីរៀនឲ្យបានទៀងទាត់។ ការគោរពកាលវិភាគ វាពិបាក តែបើយើងចង់ទទួលបានលទ្ធល្អ គឺត្រូវតែធ្វើឲ្យបាន។ លើសពីនេះ ការរាប់អានមិត្តភក្តិដោយមិនរើសអើង ក៏ជារឿងមិនអាចមើលរំលងបាន។ កញ្ញាចាត់ទុក មនុស្សនៅជុំវិញខ្លួនគឺជាគ្រូ និងជាអ្នកផ្តល់គំនិត។ មិនត្រឹមតែប៉ុណ្ណោះ ការស្រាវជ្រាវឯកសារគឺជាគន្លិះ នៃអភិវឌ្ឍន៍ការសិក្សារបស់នាងបានយ៉ាងច្រើន។ ជាកូនច្បងក្នុងចំណោមបងប្អូនពីរនាក់ លក្ខណា បានផ្ញើសារទៅដល់ប្អូនៗជំនាន់ក្រោយ ឲ្យខិតខំរៀនសូត្រ ព្រោះមានតែការសិក្សាតែមួយប៉ុណ្ណោះ ទើបធ្វើឲ្យអនាគតយើងល្អប្រសើរ។ ហើយមិនត្រូវឈ្លក់វង្វេងជាមួយសម្ភារៈនិយមហួសហេតុដែលអាចធ្វើឲ្យយើងបរាជ័យក្នុងការសិក្សានោះទេ «បងចង់ផ្តាំប្អូនៗថា យើងត្រូវខំរៀន ព្រោះគ្រួសារយើង គ្រួយើង និងអ្នកនៅជុំវិញខ្លួនរបស់យើង ចង់ឃើញយើងទទួលបានលទ្ធផលល្អ។ ហើយត្រូវបែងចែកការសប្បាយ និងការសិក្សាឲ្យបានច្បាស់លាស់ មិនត្រូវឲ្យសម្ភារៈទំនើបអូសទាញយើងនោះទេ»។
ចំណែកលោក អ៊ិត ប្រសិត ជាឪពុករបស់កញ្ញា លក្ខណា ដែលបានជូនកូនមកភ្នំពេញ ដើម្បីជួបសំណះសំណាលជាមួយលោកនាយករដ្ឋមន្ត្រីហ៊ុន សែន នោះ បាននិយាយរៀបរាប់ពីភាពសកម្មរបស់កូនក្នុងសិក្សារៀនសូត្រ រហូតទទួលបានលទ្ធផលគួរជាទីគាប់ ប្រសើរ ថាលោកតែងតែតាមដានកាលវិភាគរៀនរបស់កូន ហើយជំរុញកូនឲ្យអនុវត្តន៍តាមកាលវិភាគឲ្យបានខ្ជាប់ខ្ជួន។ ជាគ្រូបង្រៀនម្នាក់នៅសាលាបឋមសិក្សាមួយ លោកប្រសិត បានលើកសរសើរកូនស្រីមិនដាច់ពីមាត់ថា កូនស្រីគាត់រៀនស្ទើរគ្មានពេលទំនេរ «វាខំរៀនណាស់ វាមានកម្មវិធីស្វ័យសិក្សានៅផ្ទះ កម្មវិធីសិក្សានៅសាលាគួរ និងកម្មវិធីសិក្សានៅសាលារដ្ឋត្រឹមត្រូវ និងច្បាស់លាស់។ ពេលយប់ម៉ោងប្រាំពីរ ទើបចេញពីរៀន ហើយពេលហូបបាយហើយរៀនដល់ម៉ោងដប់មួយយប់ និយាយទៅវារៀនរហូត ស្ទើរគ្មានពេលទំនេរ សម្រាកបានតែថ្ងៃអាទិត្យមួយគត់»។
ចំពោះលទ្ធផលដ៏ល្អដែលទទួលបាននៅថ្ងៃនេះ កញ្ញា ប្រសិត លក្ខណា បានសម្តែងអារម្មណ៍សប្បាយរីករាយចំពោះ ការរិតបន្តឹងការប្រឡងរបស់ក្រសួងអប់រំ យុវជន និងកីឡា ព្រោះកញ្ញាយល់ថា ការរិតបណ្តឹងការប្រឡងធ្វើឲ្យសិស្សបញ្ចេញសមត្ថភាពពិត និងធ្វើឲ្យសិស្សខិតខំរៀនទាំងសិស្សខ្លួនឯង និងឪពុកម្តាយក៏ជំរុញកូនឲ្យរៀនកាន់តែខ្លាំងដែរ«វាជាការល្អ វាផ្តល់ឳកាសដល់សិស្សកម្ពុជាឲ្យខិតខំរៀន ហើយយកតម្រាប់តៗគ្នា មិតត្រឹមតែប៉ុណ្ណោះការរិតបន្តឹងការប្រឡងធ្វើឪពុកម្តាយសិស្សកាន់តែជំរុញកូនឲ្យខំរៀន។ ហើយខ្ញុំមើលឃើញថា ប្អូនៗជំនាន់ក្រោយនេះ ខំប្រឹងរៀនមែនទែន បន្ទាប់មានការធ្វើកំណែទម្រង់មក» ។
ក្នុងការប្រឡងសញ្ញាបត្រទុតិយភូមិឆ្នាំសិក្សា២០១៤ ២០១៥នេះ សិស្សជាប់មានចំនួនជាង៥៥ភាគរយ បើប្រៀបធៀបនឹងឆ្នាំមុនមានការប្រឡងដល់ទៅចំនួនពីរដង តែសិស្សជាប់មានត្រឹមតែចំនូនជាង៤០ភាគតែប៉ុណ្ណោះ។ លើសពីនេះសិស្សជាប់និទ្ទេសA នៅឆ្នាំនេះមានរហូត១០៨នាក់ បើធៀបនឹងឆ្នាំមុនមានត្រឹមតែ១១នាក់៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
22 ម៉ោង
