ជាតិ
សហភាពអឺរ៉ុបផ្តល់ថវិកា១.៦លានអឺរ៉ូ ដើម្បីការពារព្រៃឈើ និងលើកកម្ពស់ជីវភាពនៅជនបទ
×
សហភាពអឺរ៉ុប (EU) បានផ្តល់ទឹកប្រាក់ចំនួន១.៦លានអឺរ៉ូ សម្រាប់គម្រោងគ្រប់គ្រងព្រៃឈើដោយនិរន្តរភាព និងការលើកកម្ពស់របរចិញ្ចឹមជីវិតនៅតាមជនបទ តាមរយៈការពព្រឹងជំនាញក្នុងការគ្រប់គ្រងព្រៃឈើដោយនិរន្តរភាពនៅកម្ពុជា។
ទំហំទឹកប្រាក់ចំនួន១.៦លានអឺរ៉ូ ដែលសហភាពអឺរ៉ុបផ្តល់ឲ្យតាមរយៈមជ្ឈមណ្ឌលសម្រាប់មនុស្ស និងព្រៃឈើ (RECOFTC) និងអង្គការអុកហ្វាម (Oxfam) សម្រាប់សហការជាមួយរដ្ឋបាលព្រៃឈើ ដើម្បីលើកកម្ពស់របរចិញ្ចឹមជីវិតនៅជនបទ តាមរយៈសហគមន៍ព្រៃឈើ និងការកាត់បន្ថយការបញ្ចេញឧស្ម័នដែលបណ្តាលមកពីការបាត់បង់ និងការរិចរឹលព្រៃឈើកម្ពុជា។
ជាមួយគ្នានេះដែរ ទីប្រឹក្សា និងជាប្រធានផ្នែកសហប្រតិបត្តិការ នៃប្រតិភូសហភាពអឺរ៉ុបប្រចាំកម្ពុជា លោកស្រី ហ្វីអូណា រ៉ាមស៊ី ជឿជាក់ថា តួនាទីរបស់ប្រជាជនមូលដ្ឋានក្នុងការការពារ គ្រប់គ្រងព្រៃឈើប្រកបដោយនិរន្តរភាព គឺអាចជួយលើកកម្ពស់របរចិញ្ចឹមជីវិតរបស់ពួកគាត់។
លោកស្រីប្រធានផ្នែកសហប្រតិបត្តិការ នៃប្រតិភូសហភាពអឺរ៉ុបប្រចាំនៅកម្ពុជារូបនេះ បានបញ្ជាក់នៅក្នុងសិក្ខាសាលាបូកសរុបលទ្ធផលការងារ នៃការអនុវត្តគម្រោងរបស់ខ្លួននៅថ្ងៃទី ១៨ ខែកញ្ញានេះ ថាគម្រោងខាងលើនេះបានប្រព្រឹត្តិទៅរយៈពេល៥៧ខែមកហើយ គឺគិតចាប់ពីថ្ងៃទី៣០ខែធ្នូឆ្នាំ២០១០ មកដល់ខែកញ្ញាឆ្នាំ២០១៥នេះ ដោយអនុវត្តន៍នៅក្នុងខេត្តគោលដៅចំនួន៩ រួមមាន៖ ខេត្តកំពត កែប តាកែវ ពោធិ៍សាត់ កំពង់ធំ ព្រះវិហារ ក្រចះ ស្ទឹងត្រែង និងខេត្តរតនគិរី។
សូមបញ្ជាក់ថា គិតមកដល់ចុងឆ្នាំ២០១៤ កម្ពុជាមានព្រៃសហគមន៍សរុបចំនួន៤៨៥កន្លែង គ្រប់ដណ្តប់លើផ្ទៃដីប្រមាណ ៤១០,០២៥ហិកតា។ ក្នុងនោះក្រសួងបានទទួលស្គាល់សហគមន៍ព្រៃឈើចំនួន៣៦៤កន្លែង គ្របដណ្តប់លើផ្ទៃដីព្រៃប្រមាណ ៣២៩.៥៨៧ហិកតា។ ក្នុងចំណោមនេះមានសហគមន៍ព្រៃឈើចំនួន៣០៩កន្លែងស្នើនឹង ២៧៥.៦៣៣ហិកតា បានទទួលកិច្ចព្រមព្រៀងព្រៃសហគមន៍ស្របច្បាប់រវាងខណ្ឌរដ្ឋបាលព្រៃឈើសាម៉ី ជាមួយគណៈកម្មការគ្រប់គ្រងសហគមន៍ព្រៃឈើ៕
ប្រភព៖ AKP
© រក្សាសិទ្ធិដោយ thmeythmey.com