អន្តរជាតិ
នយោបាយអន្តរជាតិ
បោះឆ្នោតសភាក្រិក៖ អាឡិចស៊ិស ស៊ីប្រាស ទទួលជ័យជម្នះជាថ្មីម្តងទៀត
× ការបោះឆ្នោត សភាក្រិកដែលប្រព្រឹត្តទៅនៅថ្ងៃអាទិត្យម្សិលមិញ បានផ្តល់ជោគជ័យជាថ្មីម្តងទៀត ដល់លោកអាឡិចស៊ិស ស៊ីប្រាស។ បក្សឆ្វេងនិយមជ្រុលស៊ីរីហ្សារបស់លោក បានទទួលសំឡេងឆ្នោតពី៣៣ទៅ ៣៥ភាគរយ ឈ្នះលើគណបក្សប្រជាធិបតេយ្យថ្មី ដែលទទួលបានសំឡេងឆ្នោត តែពីជាង២៨ទៅ៣០ភាគរយប៉ុណ្ណោះ។ នេះសបង្ហាញថា ពលរដ្ឋនៅតែបន្តទុកចិត្តអោយបក្សស៊ីរីហ្សា គ្រប់គ្រងប្រទេស។
ក្នុងប្រព័ន្ធបោះឆ្នោតក្រិក គេផ្តល់រង្វាន់៥០កៅអីអោយបក្សដែលទទួល សំឡេងច្រើនជាងគេ។ ដូច្នេះ សម្រាប់រដ្ឋាភិបាលថ្មី លោកស៊ីសប្រាសអាចទទួលបានកៅអីប្រមាណ១៤៥កៅអី។ រីឯបក្សអភិរក្សនិយមប្រជាធិបតេយ្យថ្មីវិញ អាចទទួលបាន៧៥កៅអី។ ដើម្បីទទួលបានសំឡេង ដាច់ខាត លោកស៊ីសប្រាសអាចនឹងបង្កើតរដ្ឋាភិបាលចម្រុះជាមួយបក្សពលរដ្ឋ ក្រិកឯករាជ្យស្តាំនិយមរបស់លោក ប៉ាណុស កាំម៉ឺណុស។ បក្សនេះទទួលសម្លេងឆ្នោតពី៣ទៅ៤ភាគរយ ហើយទទួលកៅអីសភា១០កៅអី។ លោកស៊ីសប្រាសក៏អាចចាប់ដៃគូរដ្ឋាភិបាលចម្រុះជាមួយបក្សសង្គមនិយម ដែលអាចទទួលបាន១៧កៅអីនៅសភាផងដែរ។
ជោគជ័យថ្មី របស់បក្សឆ្វេងនិយមជ្រុលស៊ីរីហ្សា ក្នុងការបោះឆ្នោតសភាក្រិកនៅថ្ងៃអាទិត្យម្សិលមិញ សបង្ហាញថា ប្រជាជនក្រិកនៅតែបន្តផ្តល់ទំនុកចិត្តដល់លោកស៊ីសប្រាស ព្រមអោយលោកបន្តដឹកនាំប្រទេសតទៅមុខ បើទោះជាកន្លងមក លោកស៊ីសប្រាសសុខចិត្តទទួលយកលក្ខខណ្ឌត្បិតត្បៀតការចាយវាយសាធារណៈរបស់ម្ចាស់បំណុលក្តី។
ទោះយ៉ាងណាក៏ដោយ សំឡេងអនុប្បវាទមានលើសពី៤០ភាគរយ ជាតួលេខខ្ពស់ក្នុងប្រទេស ព្រោះថាក្រិកផ្តល់សារៈសំខាន់ណាស់ដល់ការបោះឆ្នោត។ នេះសបង្ហាញផងដែរថា ប្រជាជនប្រហែលចង់ព្រមានរដ្ឋាភិបាលលោកស៊ីសប្រាស ពីបទពិសោធន៍ជូរចត់ក្នុងការដោះស្រាយវិបត្តិបំណុលជាតិ។ កាលពីខែកក្កដា ពលរដ្ឋក្រិកភាគច្រើនបានបោះឆ្នោតប្រជាមតិទាត់ចោលសំណើម្ចាស់បំណុលដែល ទាមទារអោយក្រិករឹតបន្តឹងចំណាយសាធារណៈអោយខ្ពស់ជាងមុន។ ប៉ុន្តែ លោកស៊ីសប្រាសបានដើរផ្ទុយពីការចង់បានរបស់ប្រជាជន ដោយលោកសុខចិត្តទទួលយកសំណើម្ចាស់បំណុល៕
© រក្សាសិទ្ធិដោយ thmeythmey.com