ព័ត៍មានសុខភាព
ពលរដ្ឋខ្មែរដែលចូលចិត្តញ៉ាំប្រៃ កំពុងប្រឈមមុខនឹង ជំងឺតម្រងនោមដោយមិនដឹងខ្លួន
×
វេជ្ជបណ្ឌិតជំនាញបានបង្ហើបឲ្យដឹងថា ពលរដ្ឋខ្មែរភាគច្រើន ទទួលទានជាតិសូដ្យួម ឬចូលចិត្តញ៉ាំប្រៃ លើសពីតម្រូវការប្រចាំថ្ងៃ។
ចំណីអាហារ ដែលសម្បូរទៅដោយប៉ូតាស្យូម និងសូដ្យូម អាចបណ្តាលឲ្យកើតជំងឺតម្រងនោមរ៉ាំរ៉ៃ លើសសម្ពាធឈាម និងជំងឺបេះដូង។
វេជ្ជបណ្ឌិតជាច្រើន ក៏បានក្រើនរំលឹងផងដែរថា ពលរដ្ឋខ្មែរភាគច្រើន នឹងត្រូវចំណាយសុខភាព ពេលវេលា និងថវិការជាច្រើន ដើម្បីពិនិត្យ និងព្យាបាលជំងឺរបស់គេ នៅក្នុងពេលខាងមុខ ប្រសិនបើពួកគេ នៅតែបន្តការទទួលទាន អាហារប្រចាំថ្ងៃដូចសព្វថ្ងៃនេះ។ ជាការពិតណាស់ ពលរដ្ឋចូលចិត្តញ៉ាំប្រៃ គឺថែមអំបិលផង ថែមទឹកត្រីផង ថែមសាច់ដុំខ្នរផង ហើយថែមប៊ីចេងទៀត នោះហើយគឺ សុទ្ធតែអំបិល។
គ្រូពេទ្យដឹងថា អ្នកជំងឺទទួលទានខុស ប៉ុន្តែ មិនមានការណែនាំជាក់លាក់ណាមួយ ដើម្បីពន្យល់ និងប្រាប់ពួកគេឡើយ។ នៅអាមេរិច គេប៉ាន់ប្រមាណថា ប្រជាជនប្រហែលជា ២៦ លាននាក់ នឹងកើតជំងឺតម្រងនោម ប៉ុន្តែ នៅខ្មែរវិញក៏មិនតិចដែរ គ្រាន់តែយើងគ្មានការសិក្សាច្បាស់លាស់ប៉ុណ្ណោះ។ ជំងឺតម្រងនោមរ៉ាំរ៉ៃ អាចបណ្តាលឲ្យខ្សោយតម្រងនោម ប្រឈមមុខនឹងជំងឺបេះដូង និងស្លាប់មុនអាយុ។
នៅអាមេរិច គេបានសាកល្បងសិក្សាទៅលើ មនុស្សជាង ៤ ពាន់នាក់ ដើម្បីយកទឹកនោមមកវិភាគ ដើម្បីឲ្យដឹងថា តើជាតិប៉ូតាស្យូម និងសូដ្យូម ជះឥទ្ធិពលបែបណា ទៅលើតម្រងនោម។ ជាតិសូដ្យូម និងប៉ូតាស្យូមខ្ពស់ បានផ្សារភ្ជាប់ទៅនឹង ការវិវត្តយ៉ាងលឿន នៃជំងឺតម្រងនោម។ អ្នកចូលរួមទទួលទានជាតិសូដ្យូម ច្រើនជាងតម្រូវការប្រចាំថ្ងៃ ដែលប្រហែលជា ២.៤០០ មីលីក្រាម ដោយពួកគេញ៉ាំជាមធ្យម ៣.៧០០ ក្នុងមួយថ្ងៃ៕
© រក្សាសិទ្ធិដោយ thmeythmey.com