ជាតិ
សង្គមជាតិ
លោក ស ខេង ស្នើបញ្ជូននគរបាលកម្ពុជាទៅបណ្តុះបណ្តាលនៅឥណ្ឌា
× ភ្នំពេញ៖ រដ្ឋមន្ត្រីក្រសួងមហាផ្ទៃ លោក ស ខេង បានស្នើឯកអគ្គរដ្ឋទូតឥណ្ឌាថ្មីប្រចាំកម្ពុជាឲ្យជួយបញ្ជូនកម្លាំនគរបាលកម្ពុជាទៅចូលរួមវគ្គបណ្តុះបណ្តាលនៅប្រទេសឥណ្ឌា និងបញ្ជូនសាស្ត្រាចារ្យឥណ្ឌាមកបណ្តុះបណ្តាលនគរបាលកម្ពុជានៅក្នុងប្រទេសកម្ពុជា។ នេះបើតាមការផ្សាយលើគេហទំព័រអគ្គស្នងការដ្ឋាននគរបាលជាតិ។
ថ្លែងក្នុងជំនួបពិភាក្សាការងារជាមួយឯកអគ្គរដ្ឋទូតឥណ្ឌាថ្មីប្រចាំកម្ពុជាលោក Naveen Srivastava នាថ្ងៃទី២៣ កញ្ញានេះ នៅទីស្តីការក្រសួងមហាផ្ទៃ លោក ស ខេង និយាយថា ការងារការពារសន្តិសុខ សណ្តាប់ធ្នាប់សង្គម ដែលជាកត្តាស្នូលក្នុងការអភិវឌ្ឍន៍សង្គមកម្ពុជា ដោយលោកស្នើស្ថានទូតឥណ្ឌាថ្មីប្រចាំកម្ពុជា ជួយជំរុញការបញ្ជូនកម្លាំនគរបាលកម្ពុជាទៅសិក្សានៅប្រទេសឥណ្ឌា ឬក៏បញ្ជូនគ្រូបង្រៀនមកកម្ពុជាវិញ។
តាមប្រភពប៉ូលីស ទន្ទឹមគ្នានឹងពង្រឹងពង្រីកទំនាក់ទំនង សេដ្ឋកិច្ច សន្តិសុខរវាងប្រទសកម្ពុជា ឥណ្ឌា លោក Naveen Srivastava សន្យាថា ឥណ្ឌានឹងជំរុញឲ្យកម្លាំងនគរបាលប្រទេសទាំងពីរ បានជួបទំនាក់ទំនង និងទទួលបានបណ្តុះបណ្តាលហ្វឹកហ្វឺនជំនាញការពារសន្តិសុខ ពិសេសគឺ ការជំរុញឲ្យនគរបាលជាតិកម្ពុជា ទទួលបានការហ្វឹកហ្វឺនជំនាញទប់ស្កាត់ បទល្មើសបច្ចេកវិទ្យានៅកម្ពុជា ស្របពេលកម្លាំងនគរបាលឥណ្ឌា កំពុងមានជំនាញរីកចម្រើនផ្នែកបច្ចេកវិទ្យាព័ត៌មាន៕
© រក្សាសិទ្ធិដោយ thmeythmey.com