លោក ម៉ម សូណង់ដូ កំពុងពិចារណាលើកំហុសអនុប្រធានគណបក្សខ្លួន

ជាតិ

នយោបាយជាតិ

លោក ម៉ម សូណង់ដូ កំពុងពិចារណាលើកំហុសអនុប្រធានគណបក្សខ្លួន

01, Oct 2015 , 10:17 am

រូបភាព

ដោយ: ធឿន បញ្ញាឬទិ្ធ

លោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យ កំពុងពិចារណាលើកំហុសរបស់អនុប្រធានគណបក្ស លោក ហារី សំអាត ដែលមានបំណងចង់ប្រមូលសកម្មជនបក្ស ទៅចូលជាមួយគណបក្សដទៃទៀត។

លោក ម៉ម សូណង់ដូ បានបញ្ជាក់ថា លោកបានទទួលរបាយការណ៍ និងភស្តុតាងនានា ពាក់ព័ន្ធនឹងលោក ហារី សំអាត ដែលមានបំណងដឹកនាំសមាជិកបក្សចូលរួមជាមួយគណបក្សខ្មែរសាមគ្គី របស់អ្នកស្រី ឡាក់ សុភាព ហើយដែរ តែលោកមិនទាន់សម្រេចយ៉ាងណាឡើយ។

ថ្លែងប្រាប់សារព័ត៌មាននៅថ្ងៃព្រហស្បតិ៍នេះ ប្រធានគណបក្សរូបនេះ បន្ថែមយ៉ាងដូច្នេះថា៖«គណៈកម្មការពិន័យបានប្រគល់កំណត់ហេតុឲ្យខ្ញុំ ហើយខ្ញុំកំពុងពិចារណាឲ្យគ្រប់ជ្រុងជ្រោយសិនមុននឹងសម្រេចយ៉ាងណា។ព្រោះបើសិនជារកឃើញថាគាត់មានគំនិតចង់បំបែកផ្ទៃក្នុងបក្សមែន យើងនឹងបណ្ដេញគាត់ចេញពីគណបក្ស។ តែបើរកមិនឃើញថាគាត់មិនមានគំនិតបំបែកបក្សទេ យើងគ្រាន់សម្របសម្រួលបញ្ហានេះ»។

គណបក្សសំបុកឃ្មុំសង្គមប្រជាធិបតេយ្យ ទើបតែរៀបចំរចនាសម្ព័ន្ធ កាលថ្ងៃទី ៩ ខែ កញ្ញា ដោយលោក ម៉ម សូណង់ដូ ធ្វើជាប្រធានបក្ស និងអនុប្រធានបក្សពីររូបទៀត គឺលោកបណ្ឌិត ហ៊ាង រិទ្ធី អ្នកវិភាគស្ថានការណ៍នយោបាយ និងលោក ហារី សំអាត តែមិនបែងចែកអនុប្រធានទី ១ និងទី ២ ឡើយ៕