ជាតិ
នយោបាយជាតិ
×![]()
ភ្នំពេញ៖ បន្ទាប់ពីមានការរិះគន់យ៉ាងខ្លាំងពីមហាជនដែលថា ការពាក់មួកនិយាយជាមួយព្រះសង្ឃគឺជារឿងអសីលធម៌ លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ (LDP) បានធ្វើការពន្យល់បកស្រាយពីករណីនេះ តាមរយៈទំព័រហ្វេសប៊ុករបស់ខ្លួនកាលពីថ្ងៃទី១៨ ខែតុលា។
លោក ខឹម វាសនា បានសរសេរបកស្រាយ នៅលើហ្វេសប៊ុកផ្លូវការ របស់ខ្លួនថា ការពាក់មួកគឺជាចំណង់ចំណូលចិត្តរបស់លោក តាំងពីក្មេង ហើយបច្ចុប្បន្ននេះ មួក LDP បានក្លាយជាអត្តសញ្ញាណរបស់គណបក្ស។ លើសពីនេះ លោក ខឹម វាសនា ក៏បានច្រានចោលការរិះគន់ ដែលថា ការពាក់មួកនិយាយជាមួយព្រះសង្ឃជាការមិនគោរពព្រះសង្ឃ គឺជាចេតនាមួលបង្កាច់ចំពោះលោក និងបក្សរបស់លោក។
ប្រធានគណបក្ស LDP បានបង្ហាញមូលហេតុ ដែលលោកតែងតែពាក់មួកនិយាយនៅក្នុងវេទិកាសាធារណៈដែលមានការចូលរួមពីព្រះសង្ឃ និងមនុស្សចាស់ថា ជាទម្លាប់របស់លោក។ លោកបានបញ្ជាក់ថា៖ « ខ្ញុំចង់ប្រាប់ថា មនុស្សខ្ញុំចូលចិត្តមួកណាស់តាំងពីខ្ញុំនៅក្មេង ខ្ញុំមានអារម្មណ៍ថា មួកជួយអោយចិត្តខ្ញុំស្វាហាប់ ទោះមានមនុស្សច្រើនប្រាប់ខ្ញុំថា ខ្ញុំពាក់មួកច្រើន ខ្ញុំនឹង ប្រឈមនឹងការជ្រុះសក់ ក៏ខ្ញុំនៅតែពាក់វាដែរ ព្រោះខ្ញុំស្រឡាញ់មួក ចូលចិត្តមួក វាជារឿងចំណូលចិត្តរបស់មនុស្ស»។
ការពាក់មួកនៅក្នុងវេទិកា ដែលមានព្រះសង្ឃចូលរួម ត្រូវបាន លោក ខឹម វាសនា និយាយថា វេទិកានេះ មិនមែនជាពិធីសាសនានោះទេ ប៉ុន្តែវាជាវេទិកានយោបាយ ដែលលោកនិយាយជាមួយមនុស្សទូទៅ មិនមែនជានិយាយទៅកាន់ព្រះសង្ឃនោះទេ។ លោកថា ការពាក់មួក វាបញ្ជាក់ពីភាពស្មើភាពគ្នា មិនមែនជារឿងអសីលធម៌នោះទេ។ លោកបន្ថែមថា បើសិនជាលោកនិយាយផ្ទាល់ជាមួយព្រះសង្ឃឬមនុស្សចាស់ជាងលោក គឺលោកតែងដោះមួក ព្រោះជាសីលធម៌របស់ខ្មែរ។
មិនត្រឹមតែបកស្រាយពីមូលហេតុនៃការពាក់មួកនោះ ប្រធានបក្សចាស់វស្សារូបនេះ ចង់ឲ្យអ្នករិះគន់លោក គួរតែរិះគន់មេបក្សប្រឆាំងនៅកម្ពុជាផងដែរ ព្រោះកាលពីធ្វើបាតុកម្មកន្លងមក ប្រធានបក្សប្រឆាំងទាំងពីរគឺលោក កឹម សុខា និងលោកសម រង្ស៊ី បានថ្លែងលើវេទិកាដោយពាក់មួកគណបក្ស ដែលមានអ្នកចូលរួមជាព្រះសង្ឃ និងមនុស្សចាស់ជាច្រើននៅក្រោមវេទិកា។
គួររម្លឹកថា លោក ខឹម វាសនា និងសកម្មជនគណបក្សសម្ព័ន្ធដើម្បីប្រជាធិបតេយ្យ តែងតែ ពាក់មួកនៅពេលមានវេទិកាសាធារណៈម្តងៗ ទោះបីជាវេទិកាសាធារណៈនោះ ធ្វើឡើងដោយមានការចូលរួមពីព្រះសង្ឃក្តី។ ទង្វើនេះហើយ ទើបធ្វើឲ្យមតិមហាជនរិះគន់យ៉ាងចាស់ដៃថា ជាទង្វើអសីលធម៌ ប្រមាទសាសនា និងផ្ទុយទៅនឹងទំនៀមទម្លាប់ខ្មែរ ដែលតែងតែដោះមួក ពេលជួបមនុស្សចាស់ឬព្រះសង្ឃ។ ប៉ុន្តែមេបក្សរូបនេះ បានបកស្រាយនៅថ្ងៃម្សិលមិញថា ពាក់មួកក្នុងវេទិកានយោបាយគឺជារឿងមិនខុសទេ ណាមួយការពាក់មួកជាចំណង់ចំណូលចិត្តរបស់លោកតាំងពីក្មេង ហើយជាអត្តសញ្ញាណរបស់បក្សLDP៕
Tag:
ខឹម វាសនា
គណបក្ស LDP
© រក្សាសិទ្ធិដោយ thmeythmey.com
