សៀមរាប៖ រមណីយដ្ឋានភ្នំគូលេន ត្រូវបានគេស្គាល់ថា ជាទិសដៅដ៏ទាក់ទាញមួយសម្រាប់ទេសចរ ដែលមកកម្សាន្តក្នុងទឹកដីខេត្តសៀមរាប។ នៅពេលមានពិធីបុណ្យទាន ឫរាល់ថ្ងៃចុងសប្តាហ៍ ភ្ញៀវទេសចរជាច្រើន បានសម្រុកឡើងទៅលើភ្នំគូលែន។ ការណ៍នេះហើយ ធ្វើឲ្យបរិស្ថាននៅតំបន់ទេសចរធម្មជាតិមួយនេះមិនសូវបំព្រង ជារួមមានការបោះចោលសំរាមពាសវាលពាសកាល។
អាជ្ញាធរពាក់ព័ន្ធ មានមន្ទីរបរិស្ថានខេត្តសៀមរាប បានសម្តែងក្តីបារម្ភចំពោះបញ្ហាអនាម័យនៅរមណីយដ្ឋានភ្នំគូលែន។ ភាពកម្សោយផ្នែកអនាម័យ ពិតជាចំណែកមួយយ៉ាងសំខាន់ ទាញទម្លាក់សម្រស់រមណីយដ្ឋានប្រវតិ្តសាស្ត្រ និងធម្មជាតិភ្នំគូលែន។
ប្រធានមន្ទីរបរិស្ថានខេត្តសៀមរាប លោក ភួង លីណា បានរៀបរាប់ពីទីតាំងសំខាន់ៗ ដែលមាននៅក្នុងរមណីយដ្ឋានភ្នំគូលេន ក្នុងនោះមិនត្រឹមតែមានកន្លែងទឹកជ្រោះ លិង្គមួយពាន់ ព្រះអង្គធំប៉ុណ្ណោះទេ តាមការសិក្សាស្រាវជ្រាវ ភ្នំគូលេនមានប្រាសាទបុរាណជាច្រើនកន្លែងទៀត។ យ៉ាងណា លោក លីណា បានសម្តែងកង្វល់ពីការបាត់ប្រជាប្រិយភាព និយាយជារួម ភ្ញៀវទេសចរនឹងលែងមកកម្សាន្តក្នុងតំបន់នេះទៀត ប្រសិនបើការគ្រប់គ្រងអនាម័យនៅទីនោះមិនទាន់បានល្អនោះ
លោក លីណា បន្ថែមថា៖« ប៉ុន្តែអ្វីដែលយើងបានឃើញ វាបែរជាមានបញ្ហាទាក់ទងនឹងការគ្រប់គ្រងសំណល់រឹងសំរាមទៅវិញ។ អី្វៗរីកចម្រើន តែការគ្រប់គ្រងសំណល់រឹងសំរាមមិនទាន់រីកចម្រើនទៅតាមអ្វីដែលយើងធ្វើនៅទីនេះទេ ដែលជាហេតុធ្វើឲ្យតំបន់នេះទទួលរងផលប៉ះពាល់ពីសំណល់រឹងសំរាមនេះ។ លោក លីណា ពន្យល់ពីមូលហេតុយ៉ាងដូច្នេះ៖« ទីមួយទាក់ទងនឹងប្រជាពលរដ្ឋរស់នៅទីនេះផ្ទាល់ រួមនិងភ្ញៀវទេសចរដែលមិនទាន់យល់ច្បាស់ពីការគ្រប់គ្រងសំណល់រឹងសំរាម។ ទីពីរបុគ្គលិកអនាម័យនៅមានតិចតួចនៅឡើយ ជាហេតុធ្វើឲ្យការប្រមូលសំរាមមិនទាន់បានល្អ»។
ទាក់ទងនឹងបញ្ហានេះ លោក ស៊ិន សួន តំណាងក្រុមហ៊ុននគរគោកធ្លក ដែលកំពុងគ្រប់គ្រងក្នុងតំបន់រមណីយដ្ឋានភ្នំគូលែន បានពន្យល់ថា បុគ្គលិកប្រចាំការនៅលើភ្នំគូលែនទាំងអស់មាន ១៩នាក់ ក្នុងនោះផ្នែកសន្តិសុខ៩នាក់ និងផ្នែកអនាម័យ១០នាក់។ លោក សួន បន្ថែមថា នៅថ្ងៃធម្មតា បញ្ហាអនាម័យនៅកន្លែងរបស់លោកមិនចោទជាបញ្ហាទេ ប៉ុន្តែសម្រាប់ថ្ងៃបុណ្យធំៗ ដូចជារដូវបុណ្យភ្ជុំបិណ្ឌ ដែលទើបកន្លងផុតទៅថ្មីៗនេះ មានភ្ញៀវទេសចររាប់រយនាក់ ដែលសម្រុកឡើងទៅលេង ដែលធ្វើឲ្យការប្រមូលសំរាមមិនទាន់ពេលវេលា។
លោក សួន បន្តលើកពីហេតុផលយ៉ាងដូច្នេះ៖« ដោយសារកន្លែងយើងមិនសូវសម្បូរធុងសំរាម ហើយណាមួយប្រជាពលរដ្ឋយើងមិនមានការវេចខ្ចប់ល្អ ភាគច្រើនគាត់ហូបហើយគាត់ទុកនៅហ្នឹង។ បញ្ហាតែនៅពេលបុណ្យទានទេ សម្រាប់ថ្ងៃធម្មតាកំលាំងយើងអាចរើសបានដឹកយកទៅដុតចោលបាន»។
មេឃុំខ្នងភ្នំ លោក ឈឿម តាំង បានឲ្យដឹងថា ឃុំរបស់លោកមាន៤ភូមិ មានប្រជាពលរដ្ឋសរុបចំនួនជាមួយពាន់នាក់។ លោក តាំង ទទួលស្គាល់ថាប្រជាពលរដ្ឋរបស់លោកមិនទាន់យល់ដឹងច្រើននោះទេ ទាក់ទងនឹងការសម្អាតបរិស្ថាននេះ។ មន្ត្រីឃុំរូបនេះ ស្នើឲ្យមានការចុះអប់រំប្រជាពលរដ្ឋរបស់លោក ឲ្យយល់ដឹងពីអនាម័យខ្លួនឯង និងអនាម័យជុំវិញផ្ទះ ដើម្បីឲ្យពលរដ្ឋទាំងនោះ បានរួមចំណែកសម្អាតបរិស្ថានទៅថ្ងៃអនាគត។
ដោយមានការឧបត្ថម្ភពីសប្បុរសជន ដែលជាជនជាតិកូរ៉េលោក Jay Sue ក្លឹបអ្នកជិះកង់ដើម្បីសហគមន៍ សហការជាមួយនិងមន្ទីរបរិស្ថានខេត្តសៀមរាប នៅព្រឹកថ្ងៃទី១៨ តុលា ឆ្នាំ២០១៥ បាននាំយកធុងសំរាមសរុបចំនួន ៣០ធុង ទៅដាក់នៅរមណីយដ្ឋានភ្នំគូលេន។ ពួកគេចង់ឃើញប្រជាពលរដ្ឋ រួមនិងភ្ញៀវទេសចរ សហការគ្រប់គ្រងសំណល់នៅភ្នំគូលេន ដើម្បីអនាគតនៅរមណីយដ្ឋានដ៏ស្រស់ត្រកាលមួយនេះ៕