អន្តរជាតិ
នៅតែមួយថ្ងៃទៀតទេបងប្អូនកូរ៉េទាំងពីរបែកគ្នា៦ទសវត្ស អាចជួបគ្នាបានហើយ
× ការប្រឈមមុខនៃកងកម្លាំងដាក់គ្នារបស់រដ្ឋាភិបាលក្រុងសេអ៊ូល និង ក្រុងព្យុងយ៉ាង មិនត្រឹមតែគំរាមកំហែងទៅដល់សន្តិសុខប៉ុណ្ណោះនោះទេ តែវា ក៏បានធ្វើឲ្យប្រជាជនកូរ៉េទាំងពីរដែលបានបែកគ្នាអស់រយៈ ពេល៦ទសវត្សរ៍ហើយនោះ ក៏ត្រូវបានមានការភ័យខ្លាចផងដែរ។ នោះ ក៏ព្រោះតែបើភាពតានតឹងនៅតែបន្តនោះការជួបជុំនឹងត្រូវពន្យារពេលជាបន្តបន្ទាប់។យ៉ាងណាមិញ ចាប់ពីថ្ងៃស្អែកទៅ ប្រជាជនកូរ៉េទាំងពីរដែលបានចុះឈ្មោះជួបជុំគ្រួសារ នឹងចាប់ផ្តើមជួបជុំគ្នាប្រចាំឆ្នាំហើយ។
លោក មុំ ពិទូរ្យ លម្អិតព័ត៌មាននេះ
សល់តែមួយថ្ងៃទៀតទេ បងប្អូនកូរ៉េទាំងពីរ នឹងអាចជួបជុំគ្រួសារពួកគេដែលបានបែកគ្នាតាំងពីបញ្ចប់សង្គ្រាមឆ្នាំ១៩៥០-១៩៥៣ហើយ ។ ខណៈពេលនេះ ប្រជាជនកូរ៉េទាំងពីរដែលបានចុះឈ្មោះក្នុងការជួបជុំ បានសម្តែងភាពរីករាយនិង កំពុងតែត្រៀមខ្លួនសម្រាប់ការជួបជុំគ្នាដ៏កម្រមួយនេះ។
កាលពីខែសីហាកន្លងទៅនេះ ស្ថានភាពនៅឧបទ្វីបកូរ៉េ បានឈានដល់កម្រិតមួយគួរឲ្យព្រួយបារម្ភ ដ្បិត កូរ៉េទាំងពីរ បានបញ្ជូនទ័ពជាច្រើនទៅកាន់តំបន់ព្រំដែន និង ថែមទាំងបានបាញ់គ្រាប់ផ្លោងដាក់គ្នាទៅវិញទៅមកទៀតផង។ យ៉ាងណាមិញ ក្រោមការចរចាដ៏តានតឹងនៅថ្ងៃទី២៥ខែសីហា ដោយមានការ អន្តរាគមន៍ពីចិនផងដែរនោះ ភាគីទាំងពីបានព្រមព្រៀងគ្នាដកកងទ័ពដើម្បីបន្ធូរបន្ថយស្ថានភាព។ ហើយលទ្ធផលជាផ្លែផ្កានោះ ភាគីទាំងពីរ បានកំណត់ឲ្យមានការជួបជុំគ្រួសារប្រចាំឆ្នាំដែលបានបែកបាក់គ្នាអស់រយៈពេលជាង៦០ឆ្នាំហើយនោះ ដើម្បីជាការបង្កើនទំនុកចិត្តគ្នាឡើងវិញ។
បើយោងតាមការកំណត់នៃកិច្ចព្រមព្រៀងនោះដែរ រដ្ឋាភិបាលកូរ៉េទាំងពីរ បានកំណត់ចាប់ពីថ្ងៃស្អែក រហូតដល់ថ្ងៃទី២៦ ខែតុលា ជាថ្ងៃជួបជុំបងប្អូនកូរ៉េប្រចាំឆ្នាំ ដែលនឹងត្រូវធ្វើឡើងនៅឯរមណីយដ្ឋានក្បែរព្រំដែនកូរ៉េខាងជើង។ ក្រុមគ្រួសារដែលនឹងត្រូវជួបជុំគ្នានោះ មានប្រមាណ១៧០គ្រួសារ។
កន្លងមកក្រសួងរួបរួមកូរ៉េខាងត្បូង បានអះអាងថា គិតចាប់ពីឆ្នាំ១៩៨៨ប្រជាជនកូរ៉េខាងត្បូងប្រមាណ ជាងដប់ម៉ឺននាក់ បានចុះឈ្មោះដើម្បីសុំជួបជុំគ្រួសារ។ ក៏ប៉ុន្តែមកទល់ពេលនេះ មានប្រជាជនប្រមាណជាងប្រាំម៉ឺននាក់តែប៉ុណ្ណោះដែលកំពុងមានជីវិត និង ទន្ទឹងរង់ចាំការជួបជុំនេះ។
មុនពេលមកដល់ពេលនេះ ពោលគឺក្រោយពេលដែលកិច្ចព្រមព្រៀងថ្ងៃទី២៥ ខែសីហា គេសង្កេត ឃើញមានភាពរកាំរកូសជាច្រើន បានកើតឡើងរវាងរដ្ឋាភិបាលកូរ៉េទាំងពីរ។ ក្នុងនោះ មេដឹកនាំកំពូលកូរ៉េខាងជើង លោក គីម ជុងអ៊ុន ក៏ធ្លាប់ព្រមានលុបចោលនៃការជួបជុំនេះ ព្រោះរដ្ឋាភិបាលកូរ៉េខាងត្បូង បានរិះគន់ខ្លួននៅក្នុងឆាកអន្តរជាតិម្តងហើយម្តងទៀត។
ដោយឡែក ប្រសិនបើការជួបជុំនេះ អាចប្រព្រឹត្តទៅដោយរលូននោះ វាអាចជាសញ្ញាមួយវិជ្ជមាននៃ ការកសាងទំនុកចិត្ត និង កសាងសន្តិភាពនៅក្នុងឧបទ្វីបកូរ៉េ។ កាលពីប៉ុន្មានថ្ងៃកន្លងទៅនេះ មេដឹកនាំកំពូលកូរ៉េខាងជើង ក៏បានទទូចឲ្យរដ្ឋាភិបាលសហរដ្ឋអាមេរិកក្នុងការចរចាលើកិច្ចព្រមព្រៀងសន្តិភាពថ្មីមួយនៅក្នុងឧបទ្វីបកូរ៉េ ដើម្បីជំនួសកិច្ចព្រមព្រៀងសន្តិភាពឧបទ្វីបកូរ៉េដែលបានធ្វើតាំងពីឆ្នាំ១៩៥៣ ផងដែរ៕
© រក្សាសិទ្ធិដោយ thmeythmey.com