ជាតិ
សេដ្ឋកិច្ច
ជនជាតិកូរ៉េឈរលំដាប់លេខ១ដែលមកទស្សនាខេត្តសៀមរាប
× សៀមរាប៖ ជនជាតិកូរ៉េ នៅតែបន្តកាន់កាប់ដំណែងភ្ញៀវទេសចរឈរនៅលំដាប់លេខ១ ដែលមកទស្សនាខេត្តសៀមរាបច្រើនជាងគេក្នុងរយៈពេលចុងក្រោយនេះ។ គិតត្រឹមរយៈពេល៥ខែក្នុងឆ្នាំ២០១៥ មានជនជាតិកូរ៉េជាង ១៧ម៉ឺននាក់ ដែលមកទស្សនាខេត្តសៀមរាប។
សូមស្ដាប់ព័ត៌មានលម្អិត៖
បើគេបានទៅទស្សនាប្រាសាទអង្គរវត្ត ឫតំបន់សំខាន់ៗក្នុងទឹកដីខេត្តសៀមរាប នោះគេនឹងបានឃើញវត្តមានភ្ញៀវទេសចរកូរ៉េ មានជាប់មិនលស់ឡើយ។ ពួកគេដើរកម្សាន្តជាក្រុមៗ ហើយស្លៀកសំលៀកបំពាក់ស្រដៀងៗគ្នា សមនឹងសម្បុរស ភ្នែកតឹងៗ ។ ក្នុងក្រុមរបស់ពួកគេមានមគ្គុទ្ទេសក៍ជនជាតិកូរ៉េមួយរូប កំពុងនិយាយនិងចង្អុលពីចំណុចផ្សេងៗនៅតាមប្រាសាទ ប្រាប់ដល់អ្នកទេសចរទាំងនោះ។
ចំនួនភ្ញៀវទេសចរកូរ៉េ រយៈពេល៥ខែដើមឆ្នាំ២០១៥នេះ គឺបានឈរនៅលំដាប់លេខរៀងទី១ គឺឈរនៅលើជនជាតិចិនទៅទៀត។ ត្រឹម៥ខែ គឺពីខែមករា ដល់ខែឧសភា មានទេសចរកូរ៉េចំនួន ១៧៦,១៥៤ ដែលមកទស្សនាខេត្តសៀមរាប។ នេះបើយោងតាមរបាយការណ៍ដែលមន្ទីរទេសចរណ៍ខេត្តប្រមូលបាន។
ដោយឡែកជនជាតិចិនវិញក៏មិនអត់ដែរ។ តួលេខបានប្រកៀកប្រកិតគ្នានឹងជនជាតិកូរ៉េ គឺមានចំនួន ១៧១,៧៧៩នាក់ ក្នុងរយៈពេលដូចគ្នា។ លេខ៣ បានទៅលើជនជាតិជប៉ុន ដែលមានចំនួន ៥៥,៣៧៨នាក់ បន្ទាប់មកមាន ថៃ អាមេរិក វៀតណាម អង់គ្លេស បារាំង អាឡឺម៉ង់ និងម៉ាឡេស៊ី។
របាយការណ៍របស់មន្ទីរទេសចរណ៍ខេត្តសៀមរាប បានសរុបតួលេខទាំងមូល ពីភ្ញៀវទេសចរអន្តរជាតិដែលមកកម្សាន្តក្នុងខេត្តសៀមរាបផងដែរ។ រយៈពេល៥ខែដើមឆ្នាំ មានទេសចរអន្តរជាតិចំនួន ៩៩០,៩៩៦ និងទេសចរក្នុងស្រុកមានចំនួន ១,៨១៩,៦៧២នាក់។
យ៉ាងណាម៉ិញ បើទោះជាចំនួនជនជាតិកូរ៉េឈរនៅលេខ១ក៏ពិតមែន តែចំនួននេះបានថយចុះជាលំដាប់។ ក្រុមហ៊ុនទេសចរណ៍របស់កូរ៉េ និងភោជនីយដ្ឋានមួយចំនួននៅខេត្តសៀមរាប បានបង្វែរទិសដៅទៅកាន់ប្រទេសមីយ៉ាន់ម៉ា វៀតណាមជាដើម ដែលគេដឹងថា មានភាពងាយស្រួល និងមានសេវាថោកជាងកម្ពុជា។
ទាក់ទងនឹងបញ្ហានេះ លោក ប៉ឹក ថុល ប្រធានសមាគមទ្រទ្រង់ក្តីសង្ឃឹមមគ្គុទ្ទេសក៍ទេសចរណ៍កូរ៉េ បានពន្យល់ពីមូលហេតុនៃការធ្លាក់ចុះភ្ញៀវជនជាតិកូរ៉េថា ដោយសារកត្តាពីរ។ ទីមួយ គឺការគៀបយកលុយរបស់ប៉ូលិសព្រលានយន្តហោះ និងការដំឡើងតម្លៃសេវា វីអាយភី។ ទីពីរ តម្លៃទំនិញ និងសេវាដឹកជញ្ជូនភ្ញៀវរៀបចំមិនបានល្អជាដើម។
លោក ថុល បន្ថែមយ៉ាងដូច្នេះថា៖« ភ្ញៀវជនជាតិអឺរ៉ុបមិនអីទេ តែជនជាតិកូរ៉េនេះមួយ ឲ្យតែឃើញគឺប៉ូលិសនៅព្រលានយន្តហោះសៀមរាបនេះ គឺចង់តែកាប់ឆៅតែម្តង មិនដឹងយ៉ាងម៉េច...រឿងតម្លៃទំនិញនៅតំបន់អង្គរ តម្លៃស្ថិតនៅលើមាត់អ្នកលក់ មានពេលខ្លះអ្នករត់រ៉ឺម៉ក់ជេរឲ្យភ្ញៀវក៏មានដែរ។ ពេលគេត្រឡប់ទៅវិញ តើគេហ្នឹងនិយាយអ្វីខ្លះដល់យើង»។
ប្រធានមន្ទីរទេសចរណ៍ខេត្តសៀមរាប លោក ងូវ សេងកាក់ បានឲ្យដឹងថា នៅខែនេះចំនួនភ្ញៀវទេសចរបានងើបឡើងវិញបន្តិចហើយ តែមិនបានបញ្ជាក់ថាភ្ញៀវជនជាតិណាច្រើនជាងគេនោះទេ។ សារព័ត៌មានថ្មីៗ ក៏មិនអាចសុំការបកស្រាយចំពោះការធ្លាក់ភ្ញៀវជនជាតិកូរ៉េនោះបានដែរ ដោយប្រធានមន្ទីរទេសចរណ៍ ថាគាត់កំពុងជាប់ប្រជុំ៕
© រក្សាសិទ្ធិដោយ thmeythmey.com