ជាតិ
នយោបាយជាតិ
×![]()
ឆ្លើយតបនឹងសំណួរអ្នកសារព័ត៌មានស្តីពីប្រសាសន៍របស់លោក ហ៊ុន សែន ទាក់ទងនឹងការកើតសង្គ្រាមជាថ្មីនោះ ប្រធានស្តីទីគណបក្សសង្គ្រោះជាតិលោក កឹម សុខា បានថ្លែងថា ការណ៍ដែលលោកនាយករដ្ឋមន្ត្រីនិយាយដូច្នេះ ដោយសារលោក ហ៊ុន សែន ដឹងខ្លួនថា គណបក្សសង្គ្រោះជាតិនឹងឈ្នះឆ្នោតនៅអាណត្តិក្រោយ។ អ្នកនាំពាក្យគណបក្សប្រជាជនកម្ពុជា ចាត់ទុកការលើកឡើងរបស់លោក កឹម សុខា គ្រាន់តែដើម្បីលើកទឹកចិត្តខ្លួនឯងប៉ុណ្ណោះ។
ស្តាប់សំឡេងលោក ជា ធីរិទ្ធ
ការកើតសង្គ្រាមជាថ្មីនៅពេលគណបក្សសង្គ្រោះជាតិឈ្នះឆ្នោត កំពុងក្លាយជាប្រធានបទដ៏ពេញនិយមដែលមេដឹកនាំនយោបាយឆ្លើយឆ្លងសារនយោបាយដាក់គ្នាសព្វថ្ងៃនេះ។ នៅថ្ងៃអង្គារនេះពីវិមានរដ្ឋសភា លោក កឹម សុខា បានចំអកឲ្យលោក ហ៊ុន សែន នៅចំពោះអ្នកកាសែត ក្រោយពីកិច្ចប្រជុំរដ្ឋសភាថា មូលហេតុដែលលោកប្រធានគណបក្សប្រជាជនកម្ពុជានិយាយពីរឿងសង្គ្រាមនៅពេលដែលគណបក្សប្រឆាំងឈ្នះឆ្នោត ពីព្រោះលោក ហ៊ុន សែន ដឹងខ្លួនជាមុនថា គណបក្សកាន់អំណាច នឹងចាញ់ឆ្នោតនៅពេលខាងមុខ។ ការដឹងខ្លួនជាមុននេះហើយ ដែលលោកប្រធានស្តីទីបក្សសង្គ្រោះជាតិចំអកថា លោកនាយករដ្ឋមន្ត្រីត្រូវធ្វើអ្វីមួយ ដើម្បីត្រៀមខ្លួនសម្រាប់ចាញ់ ដូចជា និយាយពីរឿងសង្គ្រាមនេះជាដើម។
ប្រសាសន៍របស់លោក កឹម សុខា ត្រូវអ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកថា ជាការឃោសនាមុនការបោះឆ្នោត និងដើម្បីលើកទឹកចិត្តខ្លួនឯងប៉ុណ្ណោះ។ អ្នកនាំពាក្យរូបនេះ ថែមទាំងអះអាងថា ការអួតពីបក្សខ្លួនឯងបែបនេះ មិនមែនជារឿងថ្មីឡើយ ហើយស្ទើរតែក្លាយជាទម្លាប់របស់លោក កឹម សុខា ទៅហើយ។ លោក សុខ ឥសាន បាននិយាយយ៉ាងប្រាកដដូចលោកនាយករដ្ឋមន្ត្រីណាស់ថា សង្គ្រាមនឹងកើតឡើង នៅពេលដែលគណបក្សសង្គ្រោះជាតិឈ្នះឆ្នោត។
បញ្ចប់ការឆ្លើយឆ្លងរបស់អ្នកនយោបាយត្រឹមនេះ ដោយងាកមកចាប់អារម្មណ៍ការវិភាគរបស់អ្នកតាមដានស្ថានការណ៍នយោបាយលោក អ៊ូ វីរៈ វិញ។ លោក អ៊ូ វីរៈ យល់ឃើញដូចគណបក្សសង្គ្រោះជាតិដែរថា សង្គ្រាមនឹងមិនអាចកើតឡើងនៅពេលគណបក្សនេះឈ្នះឆ្នោត ដោយសារតែការផ្តន្ទាទោសអ្នករកស៊ីទុច្ចរិត តាមរយៈតុលាការឯករាជ្យនៅពេលរដ្ឋាភិបាលថ្មីកើតឡើងនោះទេ។ អ្នកវិភាគរូបនេះ បានរិះគន់លោក ហ៊ុន សែន ដែលលើកពីរឿងសង្គ្រាមមកនិយាយសព្វថ្ងៃនេះថា កំពុងតែដើរផ្ទុយពីប្រជាធិបតេយ្យ៕
Tag:
កឹម សុខា
ហ៊ុន សែន
© រក្សាសិទ្ធិដោយ thmeythmey.com
