ជាតិ
នយោបាយជាតិ
លោក ខឹម វាសនា ចាត់ទុកអ្នកចង់សម្លាប់រូបលោក ថាជាជនដែលត្រូវជួយសង្គ្រោះ
×
លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ ត្រូវបានបុរសមិនស្គាល់អត្តសញ្ញាណ បានទូរសព្ទទៅគំរាមសម្លាប់ កាលពីព្រឹក ថ្ងៃទី២០ ខែតុលា ឆ្នាំពី២០១៥ ។ ប្រមុខបក្សរូបនេះ មិនបានចាត់ទុកការគំរាមនេះ ថាជាទម្រង់នៃការប៉ុនប៉ងធ្វើឃាតពិតប្រាកដនោះទេ តែគ្រាន់ជាកំហឹងរបស់ជនដែលមិនពេញចិត្តនឹងចលនានយោបាយរបស់លោកតែប៉ុណ្ណោះ។
អនាមិកជនម្នាក់ មានបំណងទូរសព្ទទៅលោក ខឹម វាសនា ដើម្បីគំរាមសម្លាប់ តែដោយមិនស្គាល់លេខទូរសព្ទរបស់ប្រធានបក្សរូបនេះ រូបគេក៏ហៅទៅលេខទូរសព្ទទីស្នាក់ការបក្សតែម្តង។ ក្នុងការឆ្លងឆ្លើយជាមួយលោក កូវ គា អគ្គលេខាធិការរងគណបក្ស ដែលជាអ្នកលើកទូរសព្ទ បុរសនោះបានសួរថា៖ «អ្នកណានិយាយហ្នឹង គឺ លោក ខឹម វាសនា ឬមិនមែនទេ?»។ ពេលដឹងថាអ្នកដែលនិយាយមិនមែនជាលោក ខឹម វាសនា ជនមិនស្គាល់មុខនោះក៏ចាប់ផ្តើមនិយាយឌឺដងផង និងជេរប្រមាថផង ទៅកាន់លោក ខឹម វាសនា។ បុរសនោះបានគំរាមដូច្នេះថា៖ «ខឹម វាសនា ជេរបានល្អណាស់ ចង់ទៅបាញ់ ខឹម វាសនា ចោល។ ខឹម វាសនា ជេរល្អ ពូកែជេរ ចង់ទៅអារក ខឹម វាសនា ទម្លាក់ទឹកចោល»។
បន្ទាប់ពីគំរាមសម្លាប់ដូច្នេះហើយ បុរសនោះក៏ឆ្លៀតប្រើពាក្យប្រមាថ និងជេរប្រទេចយ៉ាងអសុរោះបន្ថែមទៀត ទៅកាន់ប្រមុខបក្សនេះផងដែរ មុខនឹងដាក់ទូរសព្ទចុះ។
ថ្លែងប្រាប់សារព័ត៌មានថ្មីៗ លោក ខឹម វាសនា ហាក់ដូចជាមិនចាប់អារម្មណ៍ ឬក៏មានការភិតភ័យអ្វីឡើយចំពោះហេតុការណ៍នេះ។ រូបលោក អះអាងថា កាគំរាមសម្លាប់នេះ មិនមែនកើតឡើងពីគំនុំគុំកួន ឬចង់ធ្វើឃាតមែនទែននោះឡើយ តែលោកយល់ថា ការដែលជនមិនស្គាល់មុខ ហៅទូរសព្ទមកជេរប្រមាថ និងគំរាមសម្លាប់នោះ ព្រោះរូបគេមានការក្តៅក្រហលក្រហាយចំពោះចលនានយោបាយរបស់គណបក្សសម្ព័ន្ធដើម្បីប្រជាធិបតេយ្យ ដែលប៉ះពាល់ផលប្រយោជន៍ផ្ទាល់ខ្លួនរបស់គេ។
ជាងនេះទៅទៀត ប្រមុខបក្សរូបនេះ មិនត្រឹមតែមិនខឹងចំពោះបុគ្គលនេះទេ តែរូបលោកបែរជាសម្តែងនូវក្តីសង្វេគ និងការអាណិតទៅវិញ ព្រោះលោកគិតថា អ្នកដែលខលមកចង់សម្លាប់នោះ មិនបានយល់ពីដួងចិត្ត និងមនោគមន៍វិទ្យានយោបាយរបស់លោក ដែលធ្វើនយោបាយចង់ជួយជាតិ។ លោកបញ្ជាក់ដូច្នេះថា៖ «មនុស្សប្រភេទនេះ គឺជាក្រុមមនុស្សល្ងង់ ដែលចលនារបស់យើងត្រូវជួយសង្គ្រោះ មិនមែនត្រូវកំចាត់ ឬតាមកំទេចនោះទេ។ តែបើយើងវាយបំបាក់ គឺ វាយបំបាក់ចំពោះភាពល្ងង់ខ្លៅ និងភាពអាក្រក់របស់បុគ្គលនោះប៉ុណ្ណោះ»។
លោក ខឹម វាសនា អះអាងថា នេះជាលើកទីមួយហើយ ដែលរូបលោក ទទួលនូវការគំរាមសម្លាប់ដូច្នេះ។ កន្លងមក ប្រធានបក្សរូបនេះ ក៏ធ្លាប់ត្រូវបានគេខលទៅរិះគន់ និងជេរប្រមាថដែរ តែមិនដែលគំរាមថាចង់សម្លាប់រូបលោក ដូចជាពេលនេះឡើយ៕
Tag:
គណបក្សសម្ព័ន្ធដើម្បីប្រជាធិបតេយ្យ
ខឹម វាសនា
© រក្សាសិទ្ធិដោយ thmeythmey.com