ជាតិ
សង្គមជាតិ
សេដ្ឋកិច្ច
ការឈប់យកពន្ធលើមធ្យោបាយដឹកជញ្ជូនមិនអាចជួយដោះស្រាយបញ្ហាជីវភាពពលរដ្ឋឡើយ
×![]()
អ្នកវិភាគនយោបាយ យល់ឃើញថា គោលនយោបាយលុបចោលការយកពន្ធលើមធ្យោបាយដឹកជញ្ជូនរបស់រដ្ឋាភិបាលនោះ គឺមិនអាចជួយដោះស្រាយបញ្ហាជីវភាពរបស់ប្រជាពលរដ្ឋ ឲ្យមានភាពប្រសើឡើងឡើយ បើសិនជាមិនមានការកំណត់ថ្លៃពន្ធប្រេងឲ្យបានសមរម្យ។ រដ្ឋាភិបាលបានឆ្លងសេចក្តីព្រាងច្បាប់ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ ២០១៦ លុបចោលការយកពន្ធលើមធ្យោបាយដឹកជញ្ជូន ដើម្បីលើកស្ទួយដល់វិស័យកសិកម្ម និងកាត់បន្ថយបន្ទុកចំណាយរបស់ប្រជាពលរដ្ឋដែលមានអាជីវកម្មជាលក្ខណៈគ្រួសារ និងមានចំណូលទាប។
បើទោះជារដ្ឋាភិបាលបានកំណត់គោលនយោបាយ មិនឲ្យប្រជាពលរដ្ឋបង់ពន្ធមធ្យោបាយដឹកជញ្ជូននៅឆ្នាំ២០១៦ក៏ដោយ តែអ្នកវិភាគនយោបាយ លោក មាស នី យល់ឃើញថា ការកំណត់គោលនយោបាយថ្មីមួយនេះ គឺមិនអាចជួយដោះស្រាយបញ្ហាជីវភាពរបស់ប្រជាពលរដ្ឋបានឡើយ បើសិនជារដ្ឋាភិបាលមិនបានកំណត់ពន្ធប្រេងឲ្យបានសមរម្យ។ លោក មាស នី បន្ថែមថា គោលនយោបាយលុបចោលការយកពន្ធលើមធ្យោបាយដឹកជញ្ជូនរបស់រដ្ឋាភិបាលនោះ គឺជាគោលនយោបាយប្រជាភិថុត ដើម្បីទាក់ទាញសន្លឹកឆ្នោតពីប្រជាពលរដ្ឋប៉ុណ្ណោះ។
ថ្លែងប្រាប់សារព័ត៌មានថ្មីៗ អ្នកវិភាគនយោបាយរូបនេះ បានពន្យល់យ៉ាងដូច្នេះថា៖«ការឈប់យកពន្ធម៉ូតូ រថយន្តនោះគឺមិនអាចជួយដោះស្រាយជីវភាពប្រជាពលរដ្ឋបានទេ បើសិនជាពន្ធប្រេងនៅតែថ្លៃនោះប្រជាពលរដ្ឋគឺនៅតែចំណាយច្រើនលើថ្លៃប្រេងជាងថ្លៃពន្ធម៉ូតូ។ ហើយការឈប់យកពន្ធម៉ូតូ រថយន្តនេះ គឺធ្វើឲ្យប្រជាពលរដ្ឋសើចចំអកទៅវិញទេ ព្រោះថ្លៃពន្ធម៉ូតូមួយឆ្នាំបង់តែ៤ពាន់រៀល ដូចនេះពួកគេអាចមានលទ្ធភាពបង់បាន តែថ្លែប្រេងគឺនៅតែជារឿងសំខាន់ជាងថ្លៃពន្ធម៉ូតូ»។
មិនខុសពីលោក មាស នី នោះទេ លោក សូ ចន្ថា អ្នកវិភាគនយោបាយ យល់ឃើញថា ការកំណត់លុបចោលការយកពន្ធលើមធ្យោបាយដឹកជញ្ជូន គឺជាផ្នែកមួយជួយដោះស្រាយបញ្ហាប្រជាពលរដ្ឋ តែបើប្រេងនៅតែថ្លៃនោះ ប្រជាពលរដ្ឋនៅតែជួបការលំបាកដដែល។ លោក សូ ចន្ថា ដែលបានតាមដានគោលនយោបាយថ្មីនេះ បានដាក់ចម្ងល់ថា តើគោលនយោបាយថ្មីរបស់រដ្ឋាភិបាលមួយនេះ គឺជាការចង់ជួយដោះស្រាយបញ្ហាជីវភាពរបស់ប្រជាពលរដ្ឋ ឬក៏គ្រាន់តែចង់ទាក់ទាញប្រជាប្រិយភាពរបស់ខ្លួន«ខ្ញុំសូមសារទចំពោះការកំណត់គោលនយោបាយលុបចោលការយកពន្ធលើមធ្យោបាយដឹកជញ្ជូននេះ។ តែខ្ញុំឆ្ងល់ថា តើរដ្ឋាភិបាលនឹងមានថវិការមកពីណាដើម្បីបំពេញតម្រូវការជំនួសការប្រមូលពន្ធម៉ូតូនេះ។ហើយបើឈប់យកពន្ធម៉ូតូរថយន្ត តែពន្ធប្រេងនៅតែថ្លៃនោះ ក៏មិនអាចជួយដោះស្រាយបញ្ហាប្រជាពលរដ្ឋដែរ។ នេះជាការបញ្ជាក់របស់លោក សូ ចន្ថា ដែលបានបន្ថែមថា នេះគឺជាការផ្លាស់ប្ដូររូបភាពនយោបាយរបស់គណបក្សកាន់អំណាច ដើម្បីទាក់ទាញប្រជាប្រិយភាពពីប្រជាពលរដ្ឋ។
គួរបញ្ជាក់ថា នៅថ្ងៃទី២១ខែតុលា ឆ្នាំ២០១៥ រដ្ឋាភិបាលបានឆ្លងសេចក្តីព្រាងច្បាប់ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ ២០១៦ លុបចោលការយកពន្ធលើមធ្យោបាយដឹកជញ្ជូនចំនួន រួមមាន ទោចក្រយានយន្ត ត្រីចក្រយានយន្ត ជលយានយន្តធុនតូច ត្រាក់ទ័រ និងគ្រឿងយន្តប្រហាក់ប្រហែល ដើម្បីលើកស្ទួយដល់វិស័យកសិកម្ម ពិសេសគឺ កាត់បន្ថយបន្ទុកចំណាយរបស់ប្រជាពលរដ្ឋដែលមានអាជីវកម្មជាលក្ខណៈគ្រួសារ និងមានចំណូលទាប។
បើតាមសេចក្តីព្រាងច្បាប់រដ្ឋនឹងបាត់បង់ចំណូលចំនួន ៥៨០២លានរៀល ស្មើនឹងជាង ១លាន៤សែនដុល្លារអាមេរិកក្នុងមួយឆ្នាំ ដោយសារការលុបចោលពន្ធលើមធ្យោបាយដឹកជញ្ជូននិងយានជំនិះខាងលើ៕
© រក្សាសិទ្ធិដោយ thmeythmey.com
