កីឡាជាតិ
ជាតិ
ខេមបូឌានលីក៖ ណាហ្គាវើល និងភ្នំពេញក្រោន មានប្រៀបនៅវគ្គ១/២ជើងទីមួយ
×![]()
ដោយ: រួបរួម
ណាហ្គាវើល និងភ្នំពេញក្រោន សុទ្ធតែទទួលបានជ័យជម្នះរៀងៗខ្លួនពីការប្រកួតវគ្គពាក់កណ្តាលផ្តាច់ព្រ័ត្រជើងទីមួយនៃក្របខណ្ឌមិត្តហ្វូនខេមបូឌានលីកឆ្នាំ២០១៥ កាលពីថ្ងៃទី២៥ ខែតុលា។ ណាហ្គាវើលបានយកឈ្នះបឹងកេតអង្គរ ៣-១ មុនពេលភ្នំពេញក្រោនបំបាក់ខេមបូឌានថាយហ្គឺរ ៤-១ ។
នៅលើទីលានកងយោធពលខេមរភូមិន្ទ ក្រុមលេខ៤ ណាហ្គាវើល បាននាំមុខក្រុមកំពូលតារាង បឹងកេតអង្គរ ៣-០ ដែលសម្រេចបានដោយ Barry Lelouma, ប្រាក់ ចាន់រតនា និងឃឹម បូរី ខណៈ Paul Emogba វាយបកតាមពីក្រោយមួយគ្រាប់សម្រាប់បឹងកេតអង្គរ។
រីឯជំនួបនៅលើទីលាន RSN កីឡាករវ័យក្មេង អ៊ិន សុដាវីត រកបានគ្រាប់នាំមុខសម្រាប់ក្រុមម្ចាស់ផ្ទះភ្នំពេញក្រោននៅក្នុងតង់ទីមួយ។ Mbarga Privat វាយបកតាមស្មើ សម្រាប់ខេមបូឌានថាយហ្គឺរនៅដើមតង់ទីពីរ មុនពេលដែលភ្នំពេញក្រោនរក៣គ្រាប់បានបន្ថែមទៀត តាមរយៈការទាត់បាល់ ប៉េណាល់ទីរបស់ ប៊ិន ធារី ការបំប៉ោងសំណាងរបស់ Odion Obadin និងវ៉ា សុខថន។
ណាហ្គាវើល និងភ្នំពេញក្រោន រង់ចាំជំនួបជើងទីពីរជាមួយនឹងការមានប្រៀបរៀងៗខ្លួនលើបឹងកេតអង្គរ និងខេមបូឌានថាយហ្គឺរ។ ការប្រកួតជើងទីពីរគ្រោងប្រព្រឹត្តទៅនៅថ្ងៃពុធទី២៨ ខែតុលា ដោយខេមបូឌានថាយហ្គឺរយកកីឡដ្ឋានវេស្ទើនដើម្បីស្វាគមន៍ភ្នំពេញក្រោន មុនពេលណាហ្គាវើលប្រើប្រាស់ពហុកីឡដ្ឋានជាតិអូឡាំពិកធ្វើជាផ្ទះរបស់ខ្លួនដើម្បីទទួលបឹងកេតអង្គរ ៕
Tag:
MCL2015
© រក្សាសិទ្ធិដោយ thmeythmey.com
