រដ្ឋាភិបាល៖ ការវាយដំលើអ្នកតំណាងរាស្ត្រកើតឡើងមួយម៉ោងក្រោយបាតុករនាំគ្នារំសាយ

ជាតិ

នយោបាយជាតិ

រដ្ឋាភិបាល៖ ការវាយដំលើអ្នកតំណាងរាស្ត្រកើតឡើងមួយម៉ោងក្រោយបាតុករនាំគ្នារំសាយ

27, Oct 2015 , 7:08 pm

រូបភាព

ដោយ: រួបរួម

អ្នកនាំពាក្យរដ្ឋាភិបាលកម្ពុជានាល្ងាចថ្ងៃទី២៧ ខែតុលា នេះ បានចេញសេចក្តីថ្លែងការណ៍ដើម្បីបង្ហាញពីការសោកស្តាយចំពោះបាតុកម្មដែលបានបង្កទៅលើអ្នកតំណាងរាស្ត្រគណបក្សសង្គ្រោះជាតិ គឺលោក គង់ សភា និងលោក ញ៉យ ចំរើន នៅច្រកខាងត្បូងឈៀងខាងកើត របងរដ្ឋសភា កាលពីវេលាថ្ងៃត្រង់ម្សិលមិញនេះ។

អ្នកនាំពាក្យរដ្ឋាភិបាល បានលើកឡើងថា សកម្មភាពវាយប្រហារបង្កឡើងដោយជនមួយក្រុមតូច ហើយវាបានកើតឡើងប្រមាណជាង១ម៉ោង បន្ទាប់ពីបាតុកម្មប្រឆាំងលោក កឹម សុខា បានបញ្ចប់ ពោលគឺក្រោយពេលដែលបាតុករទាំងអស់ត្រូវបានរំសាយនៅវេលាម៉ោង១១ព្រឹក។

ជាមួយគ្នានេះ រដ្ឋាភិបាលបានថ្កោលទោសយ៉ាងម៉ឺងម៉ាត់ចំពោះអំពើបង្ករបួសស្នាមនេះ ហើយបានចាត់វិធានការដោយបញ្ជាឲ្យក្រសួងមហាផ្ទៃបើកការស៊ើបអង្កេត និងចាប់ជនល្មើសទៅផ្តន្ទាទោសតាមច្បាប់។

រដ្ឋាភិបាលក៏បានអំពាវនាវផងដែរឲ្យការសហការផ្តល់ភស្តុតាងពាក់ព័ន្ធនានា ដើម្បីរកយុត្តិធម៌ដល់ជនរងគ្រោះឲ្យបានឆាប់តាមដែលអាចធ្វើទៅបាន៕