កីឡាជាតិ
ជាតិ
ភ្នំពេញក្រោនមានប្រៀបលើថាយហ្គឺរ ហើយការពន្យាជំនួបណាហ្គា-បឹងកេត កើតជាអាយ៉ៃឆ្លើយឆ្លង
× ភ្នំពេញក្រោន ត្រូវធ្វើដំណើរទៅជួបខេមបូឌានថាយហ្គឺរនៅជើងទីពីរវគ្គពាក់កណ្តាលផ្តាច់ព្រ័ត្រនៃក្របខណ្ឌមិត្តហ្វូនខេមបូឌានលីក ជាមួយនឹងលទ្ធផលមានប្រៀប ៤-១ ប៉ុន្តែជំនួបរវាងណាហ្គាវើល និងបឹងកេតអង្គរ ត្រូវលើកពេលទៅប្រកួតនៅថ្ងៃទី៧ ខែវិច្ឆិកា។
នាវេលាម៉ោង៣ និង៣០នាទី រសៀលនេះ ក្លិបខេមបូឌានថាយហ្គឺរ ត្រូវប្រើប្រាស់កីឡដ្ឋានវេស្ទើនដើម្បីទទួលភ្នំពេញក្រោន សម្រាប់ជំនួបជើងទីពីរនៃវគ្គពាក់កណ្តាលផ្តាច់ព្រ័ត្រ ក្របខណ្ឌមិត្តហ្វូនខេមបូឌានលីកឆ្នាំ២០១៥ ។ វាជាភ្នំដ៏សែនខ្ពស់ និងពិបាកឡើងបំផុតសម្រាប់ក្រុមខ្លា ដោយពួកគេត្រូវបានម្ចាស់ជើងឯក៥ជំនាន់ ភ្នំពេញក្រោននាំមុខរហូតដល់ ៤-១ កាលពីជើងទីមួយ។
ភ្នំពេញក្រោនកំពុងមានទំនុកចិត្តយ៉ាងខ្លាំងក្នុងការរក្សាតំណែងជើងឯករបស់ខ្លួននៅរដូវកាលនេះ បន្ទាប់ពីបាត់បង់ឱកាសធ្វើជាតំណាងរបស់កម្ពុជាក្នុងព្រឹត្តិការណ៍ Toyota Mekong Club។ គ្រូបង្វឹកជនជាតិស្វីស លោក Sam Schweingruber មានកង្វល់តិចតួចប៉ុណ្ណោះលើស្ថានភាពកីឡាករដែលឈឺ និងរងរបួស ជាពិសេស គួច ដានី និង Shane Booysen ដែលខកខានមិនបានចូលហ្វឹកហាត់កាលពីម្សិលមិញ។ ទោះបីជាយ៉ាងណាក៏ដោយ ក្លិបខេមបូឌានថាយហ្គឺរ នៅតែពង្រឹងការតាំងចិត្តរបស់ខ្លួនក្នុងការបោះជំហានទៅកាន់វគ្គផ្តាច់ព្រ័ត្រ។ ក្លិបដែលស្ថិតក្រោមការដឹកនាំរបស់លោក Masakazu Kihara បានបង្ហាញជំហរយ៉ាងមុតមាំថា៖ «យើងមិនដែលបោះបង់ចោលនូវការតាំងចិត្តដើម្បីឆ្ពោះទៅកាន់វគ្គផ្តាច់ព្រ័ត្រនោះឡើយ»។
ដោយជំនួបដែលគ្រោងរៀបចំឡើងនៅពហុកីឡដ្ឋានជាតិ រវាងណាហ្គាវើល និងបឹងកេតអង្គរត្រូវបានលើកទៅប្រកួតនៅថ្ងៃទី៧ ខែវិច្ឆិកា ដោយយោងតាមសេចក្តីជូនដំណឹងរបស់ លោក គល់ សុផាណា អគ្គលេខាធិការសហព័ន្ធកីឡាបាល់ទាត់កម្ពុជា (FFC) ។ ការលើកពេលប្រកួតនេះ នាំឲ្យថ្នាក់ដឹកនាំណាហ្គាវើល មានការអាក់អន់ចិត្តយ៉ាងខ្លាំង បើទោះបីជាពួកគេមានប្រៀបក្នុងលទ្ធផល ៣-១ នៅជើងទីមួយក៏ដោយ។
ថ្នាក់ដឹកនាំណាហ្គាវើល បានប្រើប្រាស់គណនីហ្វេសប៊ុកដើម្បីបង្ហាញពីការមិនពេញចិត្តរបស់ខ្លួន ដោយកត់សម្គាល់ថា ការលើកពេលនេះ ធ្វើឡើងក្រោយពេលដែលបឹងកេតអង្គរចាញ់ប្រៀបណាហ្គាវើល។ ទាំងលោក ឡាំ ទីនី អ្នកដឹកនាំ និងទាំងលោក មាស ចាន់ណា ជាគ្រូបង្វឹកបានចោទជាសំណួរថា តើអាចមានការលើកពេលដែរឬទេ ក្នុងករណីបឹងកេតឈ្នះណាហ្គា ៥-០ នៅជើងទីមួយ? ពួកលោកបានកត់សម្គាល់ថា បើការលេងធ្វើតាមកាលវិភាគចាស់ ណាហ្គាវើលបន្តមានប្រៀបដោយសារតែកីឡាករមួយចំនួនរបស់បឹងកេតរងរបួស។
ទាក់ទងនឹងករណីនេះ ក្លិបបឹងកេតអង្គរ តាមរយៈទំព័រហ្វេសប៊ុករបស់ខ្លួន បានបង្ហាញភស្តុតាងថា ពួកគេបានផ្ញើរលិខិតសុំលើកពេលប្រកួតតាំងពីមុនជំនួបជើងទីមួយមកម្ល៉េះ។ ការសុំលើកពេលប្រកួតនេះ ដោយសារតែបឹងកេតចង់ទុកពេលឲ្យកីឡាករបានសម្រាកយកកម្លាំងទៅប្រកួតលើកមុខមាត់ជាតិនៅលើឆាកអន្តរជាតិក្នុងពានរង្វាន់ Totoya Mekong Club Championship ឆ្នាំ២០១៥ ដែលចាប់ផ្ដើមនៅប្រទេសឡាវនៅថ្ងៃទី១ ខែវិច្ឆិកា។ ក្លិបដែលបញ្ចប់ចំណាត់លេខមួយ បានពន្យល់ហេតុផលបន្ថែមថា៖ «ក្រុមជម្រើសជាតិកម្ពុជាក៏ត្រូវត្រៀមខ្លួនសម្រាប់ប្រកួតមិត្តភាពអន្តរជាតិនិងការប្រកួតជម្រុះ 2018 FIFA World Cup ផងដែរ»៕
© រក្សាសិទ្ធិដោយ thmeythmey.com