កីឡាជាតិ
ជាតិ
កីឡាអេឡិចត្រូនិចរកឃើញ២ក្រុមនៅតំបន់ទី១ទៅកាន់វគ្គផ្តាច់ព្រ័ត្រហើយ
× ការប្រកួតជ្រើសរើសជើងឯកកីឡាអេឡិចត្រូនិចជាតិឆ្នាំ២០១៥ (Cambodian Cyber Championship, CCC 2015) លើវិញ្ញាសា AK 2 រកឃើញជើងខ្លាំងនៅតំបន់ទីមួយហើយ ដោយមានក្រុម OverCome ពីខេត្តស្វាយរៀង និងក្រុម YouWillKnow ពីខេត្តកណ្តាល។
ក្នុងតំបន់ទី១ នៃការប្រកួតជ្រើសរើសជើងឯកកីឡាអេឡិចត្រូនិចជាតិឆ្នាំ២០១៥ ដែល បញ្ចប់កាលពីថ្ងៃទី២៤ ខែតុលា មានកីឡាករមកពីខេត្តចំនួន៤ ចូលរួមប្រកួតក្នុងនោះរួមមាន ខេត្តស្វាយរៀង ខេត្តព្រៃវែង ខេត្តកណ្ដាល និងខេត្តកំពង់ចាម។ ពីរក្រុមខ្លាំងតំណាងអោយតំបន់ទី១ ដែលមានក្រុមឈ្មោះ OverCome មកពីខេត្តស្វាយរៀង និងក្រុម YouWillKnow មកពីខេត្តកណ្ដាល មានឈ្មោះទៅចូលរួមការប្រកួតផ្ដាច់ព្រ័ត្រកីឡាអេឡិចត្រូនិកថ្នាក់ជាតិ នៅថ្ងៃទី១១-១២ ខែធ្នូ ក្នុងកម្មវិធីបុណ្យសមុទ្រ នៅឯខេត្តកំពត។
ព្រឹត្តិការណ៍ CCC 2015 ដែលរៀបចំដោយសហព័ន្ធកីឡាអេឡិចត្រូនិចកម្ពុជា ជាមួយគណៈកម្មាធិការជាតិអូឡាំពិកកម្ពុជា និងដៃគូផ្សេងទៀតនោះ គឺក្នុងគោលបំណងស្វែងរកជ័យលាភី២ក្រុមតំណាងឲ្យកម្ពុជា សម្រាប់ចេញទៅប្រកួតក្នុងព្រឹត្តិការណ៍កីឡាអេឡិចត្រូនិចអន្តរជាតិ MATIC 2016 នៅប្រទេសឥណ្ឌូនេស៊ី នាខែមករា ឆ្នាំ២០១៦ ដោយកម្ពុជាត្រូវការពារតំណែងជើងឯករបស់ខ្លួន។
តំបន់៦ដែលរៀបចំការប្រកួត CCC 2015 រួមមាន តំបន់ទី១ (ស្វាយរៀង កំពង់ចាម ព្រៃវែង និងតាខ្មៅ) ចាប់ដំណើរការពីថ្ងៃទី១៩ ដល់ថ្ងៃទី២៤ ខែតុលា ហើយបន្តទៅតំបន់ទី២ (រតនគីរី មណ្ឌលគីរី ស្ទឹងត្រែង និងក្រចេះ) ពីថ្ងៃទី២៦ ដល់ថ្ងៃទី៣១ ខែតុលា។ នៅតំបន់ទី៣ រួមមាន សៀមរាប ឧត្តរមានជ័យ ព្រះវិហារ និងកំពង់ធំ ពីថ្ងៃទី២ ដល់ថ្ងៃទី៨ ខែវិច្ឆិកា។
ពីថ្ងៃទី៩ ដល់ថ្ងៃទី១៤ ខែវិច្ឆិកា ការប្រកួតប្រព្រឹត្តទៅនៅតំបន់ទី៤ ដែលមានខេត្តបាត់ដំបង បន្ទាយមានជ័យ ប៉ៃលិន កំពង់ឆ្នាំង និងពោធិ៍សាត់។ តំបន់ទី៥ គឺស្ថិតក្នុងរាជធានីភ្នំពេញ ដោយដំណើរការពីថ្ងៃទី១៦ ដល់ថ្ងៃទី២១ ខែវិច្ឆិកា មុននឹងបញ្ចប់ដំណើរនៅតំបន់ទី៦ (កំពង់សោម កំពត កោះកុង កំពង់ស្ពឺ និងតាកែវ) ពីថ្ងៃទី៧ ដល់ថ្ងៃទី១១ ខែធ្នូ។
ក្រុមជើងឯកចំនួន១៦ដែលរកឃើញតាមតំបន់នីមួយៗ ឈានទៅកាន់វគ្គផ្តាច់ព្រ័ត្រដែកនឹងរៀបចំនៅថ្ងៃទី១២ ខែធ្នូ ឆ្នាំ២០១៥ នាកម្មវិធីបុណ្យសមុទ្រក្នុងខេត្តកំពត។ ជ័យលាភីប្រចាំតំបន់នីមួយៗ ដោយលេខមួយទទួលបាន១៥០០ដុល្លារអាមេរិក លេខ២ បាន១០០០ដុល្លារអាមេរិក ខណៈជ័យលាភីវគ្គផ្តាច់ព្រ័ត្រ ក្រុមជើងឯកបាន៣០០០ដុល្លារអាមេរិក ជើងឯករងបាន២០០០ដុល្លារអាមេរិក និងលេខបី បាន៥០០ដុល្លារអាមេរិក។ ជើងឯក និងជើងឯករងក្លាយជាតំណាងរបស់កម្ពុជាក្នុងព្រឹត្តិការណ៍ MATIC 2016 នៅប្រទេសឥណ្ឌូនេស៊ី នាខែមករា។
គួរបញ្ជាក់ផងដែរថា AK Online ជាប្រភេទកីឡាអេឡិចត្រូនិកដែលតម្រូវឲ្យកីឡាករធ្វើការសហការណ៍គ្នាជាក្រុម ហ្វឹកហាត់ និងរៀបចំយុទ្ធសាស្ត្រ ទៅតាមទីតាំងភូមិសាស្ត្រខុសៗគ្នា ដើម្បីយកជ័យជំនះលើក្រុមម្ខាងទៀត។ កីឡាប្រភេទនេះ គឺផ្ដោតសំខាន់ទៅលើ ការហ្វឹកហាត់ខួរក្បាល ភាពប៉ិនប្រសព្វក្នុងការដឹកនាំ ថ្វីដៃក្នុងការប្រើប្រាស់កុំព្យូទ័រក្នុងការបញ្ជាបាញ់ទៅលើគូសត្រូវ ហើយកីឡាប្រភេទនេះត្រូវបានរាប់បញ្ចូលទៅក្នុង សហព័ន្ធកីឡាជាតិនៃព្រះរាជាណាចក្រកម្ពុជា (NOCC)៕
Tag:
កីឡាអេឡិចត្រូនិច
© រក្សាសិទ្ធិដោយ thmeythmey.com