កីឡាជាតិ
ជាតិ
អត្តពលិកវ៉ូវីណាម ៩៩នាក់ ចាប់ផ្តើមយុទ្ធនាការដណ្តើមជើងឯកប្រចាំឆ្នាំ២០១៥
× អត្តពលិកកីឡាវ៉ូវីណាម មកពីទូទាំងប្រទេសកម្ពុជាចំនួន ៩៩នាក់ ត្រូវធ្វើការប្រកួតប្រជែងគ្នា នៅពហុកីឡដ្ឋានជាតិអូឡាំពិក ដែលចាប់ផ្តើមពីថ្ងៃទី២៩ ខែតុលា នេះ ហើយគ្រោងនឹងបញ្ចប់នៅថ្ងៃទី៣១ ខែតុលា ក្នុងកម្មវិធីប្រកួតជ្រើសរើសជើងថ្នាក់ជាតិប្រចាំឆ្នាំ២០១៥ ដែលជាកម្មវិធីប្រកួតប្រចាំឆ្នាំ របស់ក្រសួង អប់រំ យុវជន និងកីឡា។
អត្តពលិកទាំង ៩៩នាក់ ដែលមកចូលរួមប្រកួតនេះ ត្រូវប្រកួតតំណាងឲ្យក្លិប-សមាគមចំនួន៦ ក្នុងនោះមាន ក្លិបវ៉ូវីណាមវិទ្យាល័យវត្តកោះ ក្លិបវ៉ូវីណាមវិទ្យាល័យជាស៊ីមសាមគ្គី ក្លិបវ៉ូវីណាមអង្គការសង្គ្រោះកុមារកម្ពុជា ក្លិបវ៉ូវីណាមសាកលវិទ្យាល័យអាស៊ីអឺរ៉ុប ក្លិបវ៉ូវីណាមក្រុមហ៊ុនរ័ត្នសុខន និងក្លិបវ៉ូវីណាមក្រសួងមហាផ្ទៃ។
អត្តពលិកទាំងនេះប្រកួតលើវិញ្ញាសា ១៣ប្រភេទ ដោយក្នុងនោះ ការប្រកួតផ្នែកប្រយុទ្ធបុរសក្នុងប្រភេទទម្ងន់៥៥គ.ក្រ, ៦០គ.ក្រ និងទម្ងន់ ៦៥ គ.ក្រ ឯផ្នែកនារីប្រកួតក្នុងទម្ងន់ ៥៥គ.ក្រ និង៦០គ.ក្រ។ ចំណែកការប្រកួតសម្តែង រួមមានមេគុនបុរសឯកត្តជន មេគុនកាំបិតធំ ២នាក់បុរស សម្តែងជាក្រុមបុរស ៤នាក់មានអាវុធ មេគុនឯកត្តជននារី មេគុនដាវឯកត្តជននារី សម្តែងនារី ១នាក់ ជាមួយបុរស ១នាក់ សម្តែងនារី ១នាក់ជាមួយបុរស ៣នាក់មានអាវុធ៕
© រក្សាសិទ្ធិដោយ thmeythmey.com