កីឡាជាតិ
ជាតិ
រឿង សោភ័ណ្ឌ ប៉ះគូសងសឹក និង មឿន សុខហ៊ុច ប៉ះថៃនៅសង្វៀន CTN កីឡាករជើងខ្លាំងម្ចាស់ជើងឯកថ្នាក់ជាតិ រឿង សោភ័ណ្ឌនឹងប៉ះគូសងសឹក ថៃ ចំណែកកីឡាករ មឿន សុខហ៊ុច និងប៉ះកីឡាករជើងខ្លាំងមកពីព្រះរាជាណាចក្រថៃ នៅលើសង្វៀន CTN នៅរសៀលថ្ងៃសៅរ៍ ទី៣១ ខែតុលា ចុងសប្តាហ៍នេះ ក្នុងកម្មវិធីប្រកួតក្បាច់បុរាណខ្មែរលក្ខណៈមិត្តភាពអន្តរជាតិ។
កីឡាកររឿង សោភ័ណ្ឌមានកំពស់ ១,៦២ម៉ែត្រ មកពីក្លិបម្កុដរាជសីហ៍មានអាយុ២២ឆ្នាំ ធ្លាប់ឆ្លងកាត់សង្វៀនប្រកួត ១២៥ដង ឈ្នះ១០៩ដង ចាញ់១៤ដង ស្មើ២ដង និងផ្តួលគូប្រកួតឱ្យសន្លប់ចំនួន ២៧ដង និងប៉ះគូសងសឹកជើងខ្លាំងថៃ ឆ្លាមដាំ ស៊ីតហ្វាំងម៉ៃ (CHHLAMDAMC SITHFANGMAY)មានអាយុ ២២ឆ្នាំមានកំពស់ ១,៧០ម៉ែត្រ ឆ្លងកាត់ការប្រកួត ៧៣ដង ឈ្នះ៥៤ដង ចាញ់១៩ដង និងផ្តួលគូប្រកួតឱ្យសន្លប់ ១២ដង កីឡាករទាំង ២ ប្រកួតក្នុងប្រភេទទម្ងន់ ៦៧គ.ក្រ។
គួរំឮកផងដែរថា កីឡាករ រឿង សោភ័ណ្ឌ និងកីឡាករ ឆ្លាមដាំ ស៊ីតហ្វាំងម៉ៃ (CHHLAMDAMC SITHFANGMAY) ធ្លាប់បានជួបគ្នាម្តងរួមមកហើយ កាលពីខែមុននៅសង្វៀន CTN អង្គរ ដោយលទ្ធផល កីឡាករ រឿង សោភ័ណ្ឌ បានយកឈ្នះកីឡាករ ឆ្លាមដាំ ស៊ីតហ្វាំងម៉ៃ (CHHLAMDAMC SITHFANGMAY)ដោយផ្តួលឱ្យសន្លប់នៅក្នុងទឹកទី២ ។ ដោយការមិនអស់ចិត្តរបស់កីឡាករថៃ រូបនេះ រូបគេបានស្នើរសុំគណកម្មការរៀបចំការប្រកួត សុំសងសឹក កីឡាករ រឿងសោភ័ណ្ឌ ម្តងទៀត ព្រោះរូបគេធ្លាប់យកឈ្នះលើកីឡាករ កម្ពុជា ជាច្រើនរូបមកហើយ ហេតុអ្វីមកចាញ់លើកណ្តាប់ដៃកីឡាករ កម្ពុជា រូបនេះ។
សម្រាប់កីឡាករ រឿង សោភ័ណ្ឌ ផ្ទាល់បាននិយាយថា «នៅក្នុងជំនួបលើកនេះរូបគេមិនហ៊ានកំណត់ថានឹងផ្តួលកីឡាករ ថៃ ម្នាក់នេះឱ្យសន្លប់នៅក្នុងទឹកទីប៉ុន្មាននោះទេ ដោយខ្ញុំគ្រាន់ដាក់ក្តីសង្ឃឹមឈ្នះ ៦០ ភាគរយទៅលើរូបគេតែប៉ុណ្ណោះ ទោះបីគេជាកីឡាករដែលធ្លាប់ចាញ់ក្រោមកណ្តាប់ដៃរបស់ខ្ញុំក៏ដោយ»។
ចំណែកកីឡាករដែលមានកំពស់ ១,៦៥ម៉ែត្រ មកពីក្លិបពុទ្ធសេរីវង្សកីឡាមឿន សុខហ៊ុច ដែលមានប្រវត្តិប្រកួតចំនួន ៩៣ដង ឈ្នះ៦៦ដង ចាញ់២២ដង ស្មើ៥ដង និងផ្តួលគូប្រកួតឱ្យសន្លប់ ១៣ដង នឹងជួបប្រកួតជាមួយកីឡាករជើងខ្លាំង ថៃ ដែលមានកំពស់ខ្ពស់ជាងខ្លួនបន្តិច ១,៦៨ម៉ែត្រ នីវវ៉ាំងច័ន្ទ (NIV VANGCHAN) ដែលមានប្រវត្តិប្រកួត ៨៥ដងឈ្នះ៦៥ដង ចាញ់១៧ដង ស្មើ៣ដង កីឡាករទាំង ២ ប្រកួតក្នុងប្រភេទទម្ងន់ ៦៩ គីឡូក្រាម។
គូរបញ្ជាក់ថា កីឡាករ រឿង សោភ័ណ្ឌ ជាម្ចាស់ជើងឯកថ្នាក់ជាតិប្រចាំឆ្នាំ២០១៥ ក្នុងប្រភេទទម្ងន់ ៧១គ.ក្រ ហើយកាលពីពេលថ្មីៗកន្លងទៅនេះ សោភ័ណ្ឌ បានប្រកួតផ្តួលកីឡាករ ថៃ ឱ្យសន្លប់ក្នុងទឹកទី២ផងដែរ នៅលើសង្វៀនបាយ័ន៕
© រក្សាសិទ្ធិដោយ thmeythmey.com